MATAYO 5 - BUKUIT NE TILIL

Ng’alek che kigiamda eng’ tulwet barak

¹ Ak kingogeer tuiyosiek, kotogosta tulwet: ak kingo kagoteb ng’ony, kobwanji alamalyennyi:

² ak kiyat kutinnyi, ak konet ichek kolenji,

Che boiboen

³ Boiboen che bonon eng’ tamirmiriet: amu nenywa bounatetab kipsengwet.

⁴ Boiboen che arogendos: amu tun kigoigoi.

⁵ Boiboen che taloen: amu tun bunjin ng’ony.

⁶ Boiboen che amei rubo ak melelda agobo imanda: amu tun biyong’dos.

⁷ Boiboen che riregei: amu tun nyoru agichek rirenetab ge.

⁸ Boiboen che tililen mugulelwek: amu tun keerei Jehovah.

⁹ Boiboen che yaei kalyet: amu kiguure werikab Jehovah.

¹⁰ Boiboen che kageusaus agobo imanda: amu nenywa bounatetab kipsengwet.

¹¹ Oboiboi ye churok bik, ak ye usausok, ak ye mwaitaenak yaitiet age tugul kong’ochok agobo ane.

¹² Oboiboitu, ak ogasge mising’: amu o melektang’wong’ eng’ kipsengwet: amu kigiusaus ko u noto maotik che kiindounenok.

Ng’alek che kinetegei munyuk ak tait

¹³ O munyukab ng’ony: ago ngo bet anyinyindab munyuk, ko ta kenyorundo ano anyinyindo? Koboch yoto ko ma kotilei kiy, ago ketumda ak kotiegat bik.

¹⁴ O lapkeiyatab ng’ony. Magimuchi keuny nganaset ne mi tulwet barak.

¹⁵ Ak mainaami bik tait, ak konde kitonget orit, ago indoi kit ne tonone; ak kokweng’ji bik tugul che mi go.

¹⁶ Ongoluu lapkeiyeng’wong’ ko u noto eng’ taitab bik, si komuch kogeer boisionikwok che miach, si kolos Kwandang’wong’ ne mi kipsengwet.

Ng’atutiet ne bo keny ak ng’atutiet ne bo Jesu

¹⁷ Molen kianyo abut Ng’atutiet anan maotik: kima anyo abut, ago ayai kosulda.

¹⁸ Amu amwawok iman ale, Agoi kosiirto kipsengwet ak ng’ony, ko masiirtoi agot tisiet anan kiy ne ming’in eng’ Ng’atutiet, agoi kosulda tuguk tugul.

¹⁹ Noto anyun, chi age tugul ne butei ng’atutiet agenge ne ming’in kot, eng’ ng’atutichu, ak koneti bik ko u noto, keguure inendet ne ming’in eng’ tugul eng’ bounatetab kipsengwet: ago chi tugul ne yaei ak koneti choto, keguure inendet ne o eng’ bounatetab kipsengwet.

²⁰ Amu amwawok ale, ngot ko masiir imandang’wong’ imanda ne bo sirik ak Parisaik, ko moite bounatetab kipsengwet matiny.

Nereknatet ak rumisiet

²¹ Kiogas kele, kigilenji ichek che bo keny, Merumisie; ak age tugul ne rumisiei ko kagorikyi kiruoget:

²² ago amwawok ale, Age tugul ne nerekyin ne tupcho ko kagorikyi kiruoget; ak age tugul ne lenji ne tupcho, Raca, ko kagorikyi kapkiruoget; ak age tugul ne mwaei kole, Abusanani, ko kagorikyi Gehenna, oldab mat.

²³ Noto anyun ngigoite kagochineng’ung’ eng’ kaptisisiet, ak ibwat eng’ oloto ile, ting’enen ne otupche ng’olyot,

²⁴ ibagakte eng’ oloto kagochineng’ung’ eng’ taitab kaptisisio ak iwe anyun, ochamnyege korok ak ne otupche, si inyo igoite kagochinengung’.

²⁵ Osib ochamnyege ak bunyondeng’ung’, kota imi oret koboto inendet; si maimutyin bunyondeng’ung’ kiruogindet, ak komutyin kiruogindet ribindet, ak ketoorjin korgoret.

²⁶ Amwaun iman, Memong’u eng’ oloto matiny, agoi iyaakte sendeiyot ne bo let.

Ibetab ge ak alak

²⁷ Kiogas kele kigimwa kele, Moipge:

²⁸ ago amwawok ale, age tugul ne keerei kobogorio ak kogase miat inendet, ko kagoipgei ak inendet eng’ muguleldanyi.

²⁹ Ak ngo riichin kondang’ung’ ne bo tai, ibalu, ak iwirte: amu kaigai eng’ inye ngo betenen kebeberta agenge eng’ borto kosiir ketoorji Gehenna bortang’ung’ komugul.

³⁰ Ak ngo riichin eung’ung’ ne bo tai, itil, ak iwirte: amu kaigai eng’ inye ngo betenen kebeberta agenge eng’ borto, kosiir kwo Gehenna bortang’ung’ komugul.

³¹ Kigimwa kogeny kele, Age tugul ne onei osotiondennyi, ko ingogochi anyun siret ne bo besiet:

³² ago amwawok ale, Age tugul ne onei osotiondennyi, ama eng’ sokset, ko kayai inendet koegunot chebaigeiyat: ak age tugul ne ituni kobogoriondonoto ne kigeon, ko kabaigei.

Kayosiosiek ak ng’alek che bo iman

³³ Kiogas kogeny kele kigemwachi ichek che bo keny, kelenji, Ameyosiechigei eng’ lembech, ago yachi Kiptaiyat kayosiosieguk:

³⁴ ago amwawok ale, Amoyosie agot kitigin; agot agobo kipsengwet, amu ng’echeretab Jehovah noto;

³⁵ anan agobo ng’ony, amu keldebesaikab kelyekyik; anan agobo Jerusalem, amu nganasetab Laitoriat ne o.

³⁶ Anan iyosie agobo meting’ung’, amu memuchi iyai sumeiyot agenge koleelit anan kotuuit.

³⁷ Ago ingoek ng’alaleng’wong’, Ee ko ee; Achicha ko achicha; ak kiy age tugul ne siirei chuto kobunu inendet ne ya.

Yaaktaetab mugetut

³⁸ Kiogas kele, kigimwa kele, Konda eng’ konda, ak keldet eng’ keldet;

³⁹ ago amwawok ale, Amogirinde ne ya; ago age tugul ne irabachin matandab tai, iweekyi age agine.

⁴⁰ Ak ngomutyin age tugul kapkiruok, komachei korebenen sumeng’ung’, ko ingoib ngorieng’ung’ agine.

⁴¹ Ak age tugul ne birjinin iwe mailit agenge, obe tuwai mailisiek aeng’.

⁴² Igochi inendet ne somin, ametuktochi batai inendet ne machei kobesenin.

Chamnyet ak atebet ne igesunotget

⁴³ Kiogas kele kigimwa kele, Cham chitab kokweng’ung’, ak iwech bunyondeng’ung’:

⁴⁴ ago amwawok ale, Ocham bunikwok, ak osachi ichek che usok;

⁴⁵ si oegu werikab Kwandang’wong’ ne mi kipsengwet; amu igochin asistanyi kochorji che yaach ak che miach, ak iyokyin ropta che bo imanda ak che ma bo imanda.

⁴⁶ Amu ngot ochame ichek che chamok, ko nee melekto ne otinye? Mayaei ko u noto agot taagikab aisurut?

⁴⁷ Ak ngot ogati che otupche kityo, ko koyai nee ne siirei alak? Tos mayaei ko u noto agot Bororiosiek?

⁴⁸ Noto anyun, oegu okwek che igesunotgei ko u ye igesunotgei Kwandang’wong’ ne bo kipsengwet.