MATAYO 4 - BUKUIT NE TILIL

Yomsetab Jesu eng’ surkwen

¹ Kiimut anyun Tamirmiriet Jesu kotogosta kwo surkwen si koyom oindet.

² Ak ye kingo kagorugutgei betusiek artam ak kemousiek artam eng’ let koam rubet.

³ Ak kinyo yomindet ak kolenji, Ngo i Weritab Jehovah, ing’at koichu koek makatinik.

⁴ Ago kiwolji kole, Sirat, Masobei chi eng’ makatiat inegei, ago eng’ ng’olyot age tugul ne mong’une kutitab Jehovah.

⁵ Yeityo komut oindet inendet kwo nganaset ne tilil; kiimut kwo kimonjogut ne bo hekalut,

⁶ ak kolenji, Ngo i Weritab Jehovah, iwirjige ng’ony: amu sirat kole, Iyogu malaikaisiekyik agobo inye: Ak kotaachin eng’ eunekwak, Si marus koita keldang’ung’.

⁷ Kilenji Jesu, Sirat kogeny kole, Meyom Kiptaiyat Jehovah neng’ung’.

⁸ Kiimut kogeny oindet inendet kwo tulwet ne koi mising’, ak koborji bororiosiek tugul che bo ng’ony, ak telunatet ne bo choto,

⁹ ak kolenji, Agonin tuguchu tugul, ngibutya iloswa.

¹⁰ Kilenji Jesu anyun, Ui eng’ oli, Setani: amu sirat kole, Ilosu Kiptaiyat Jehovah neng’ung’, ak iboisiechi inendet inegei.

¹¹ Kibagach oindet anyun inendet; ak ogeero, kibwa malaikaisiek si koboisiechi.

Kowendi Jesu Galili

¹² Ak ye kingogas Jesu kole ki kerat Johana, kwo inendet Galili;

¹³ ak kiwa eng’ Nasaret, kwo kotebe Kapernaum, ne mi ye negite araraita, eng’ tabanwek che bo Sebulun ak Naptali:

¹⁴ si kosulda ne kiga mwa maotiot Isaia, kole,

¹⁵ Emetab Sebulun ak emetab Naptali, Oret ne negit araraita, Jordan bitonin, Galili ne bo Bororiosiek,

¹⁶ Kigeer bik che kitebe mesundeito Lapkeiyet ne o, Ak kichorjigei lapkeiyet, Che kitebe koret ak uruet ne bo meet.

Kotau Jesu koamdoi ng’alek

¹⁷ Koboch yoto kotoi Jesu koamda, ak kole, Osigu; amu kagorik bounatetab kipsengwet.

Kuurei Jesu alamalyennyi, che bo tai

¹⁸ Ak ye kiwendote ngegutab araraita ne bo Galili, kogeer bik aeng’ che tupcho, Simon ne kiguure Petero, ak Andrea ng’etab kamet, kowirjinoti regereiywot ne kiname njirenik araraita; amu ki ramikab njirenik.

¹⁹ Ak kolenji, Obwa osubwa, si ayaak oegu ramikab bik.

²⁰ Ak kibagach ngunoto regereiywekwak, ak kosub inendet.

²¹ Ak ye kingota kowendi eng’ oloto, kogeer bik aeng’ alak che tupcho, Jakobo weritab Sebedi, ak Johana ng’etab kamet, komitei moingetab beek koboto Sebedi kwandanywa, konabei regereiywekwak; ak koguur ichek.

²² Ak kibagach ngunoto moinget ak kwandanywa, ak kosub inendet.

Wendoti Jesu eng’ Galii koboisioti

²³ Ak kiwendoti Jesu eng’ Galili komugul, konetisioti eng’ sunagogisiekwak, ak koamdaati logoiywek che miach che bo bounatet, ak kosobooti che tinyei korotwek alak tugul ak mianwek alak tugul eng’ bik.

²⁴ Ak kiyesta ng’alek agobo inendet eng’ Suria komugul, ak kigimutyi inendet bik tugul che miandos, che kinam korotwek ak ng’woninwek che terotin, ak che kitinyei oik, ak che kitanuitos, ak che ki meiyotin borwek; ak kiisoob ichek.

²⁵ Ak kiisub inendet tuiyosiek che eechen che kibunu Galili ak Dekapoli ak Jerusalem ak Judea ak Jordan bitonin.