MATAYO 3 - BUKUIT NE TILIL

Johana kabatisanindet ak ng’alekyik

¹ Ak kinyo eng’ betusiechoto Johana Kabatisanindet koamdaati eng’ surkwenetab Judea,

² kolen, Osigu; amu kagorik bounatetab kipsengwet.

³ Amu inendet ni ne kiga mwa maotiot Isaia, kole, Kutitab chi ne ititeni eng’ surkwen, kolen, Ochob oretab Kiptaiyat, Olititoti ole bunoti.

⁴ Ak kiilaachi Johana inendet sambutab tambesik, ak kirategei birenetab muito; ak amitwogikyik ko ki chereng’endet ak kumikab timin.

⁵ Ak ngunoto anyun, koba ole mi inendet bikab Jerusalem ak Judea komugul, ak komoswek tugul che negite Jordan;

⁶ ak kiibatisan inendet ichek eng’ ainet ne kiguure Jordan, kong’anyei tengekwogikwak.

⁷ Ago ye kingogeer kobwanji kabatisanennyi che chang’ che bo Parisaik ak Sadukaik, kolenji, Okwek lagokab erenok che ng’wonen, ng’o ne kiiteeywok omwee nereknatet ne nyonei?

⁸ Oi anyun logoek che nyoljin sigunet:

⁹ amat obwat eng’ oring’wong’ ole, Kitinye kwandanyo Abraham: amu amwawok ale, imuchi Jehovah kong’eetyi Abraham lagok eng’ koichu.

¹⁰ Agot nguno ko kaginde aiywet tigitikab ketik: kiebei anyun ketit age tugul ne maiyiei logoek che miach, ak kewirji ma.

¹¹ Abatisanok iman eng’ beek amu sigunet: ago tinyei kimnatet kosiira inendet ne isubwa, ma nyolu aipchinot kweonikyik: ibatisanok inendet eng’ Tamirmiriet ne Tilil ak mat:

¹² tinyei eng’ eunnyi keibennyi, ak kotilili komie ruanyut; ak koyumji nganok chogennyi, ak kobeele metetek mat ne ma misoksei.

Kabatisanet ne bo Jesu

¹³ Kinyo anyun Jesu kobunu Galili konyo Jordan ole mi Johana, si kibatisan.

¹⁴ Ago kimachei Johana koesio, kole, Kanyol ibatisana, ago kenyonja ane?

¹⁵ Ago kiwolji Jesu kolenji, Cham nguno: amu kanyoljech kigesu imanda tugul ko u noto. Kocham anyun.

¹⁶ Ak ye kingo kagibatisan Jesu, kotogos ngunoto eng’ beek: ogeero, kigiyatyi kipsengwetisiek, ak kogeer inendet Tamirmirietab Jehovah kochorugei ko u cheptuget, ak konyonji baragunnyi;

¹⁷ ogeero, kimong’une kutit kipsengwet, kole, Ni ko Werinnyu, chamanennyu, abaibai mising’ eng’ inendet.