MATAYO 28 - BUKUIT NE TILIL

Ng’eetyetab Jesu

¹ Kingo negit kogesgei betutab sabato, ko katoi koeech emet eng’ betutab tai ne bo wigit, kobwa Maria Magdalene ak Maria age kogeer kererit.

² Ak ogeero, kibotan ng’ony mising’; amu kichorgei eng’ kipsengwet malaikaiyatab Kiptaiyat, ak kinyo komilda koita, ak kotebe koyata.

³ Ki u kalyelet itondanyi, ak ki leelach mising’ ngoroikyik ko u teluji:

⁴ kibotanso ribik, amu kiiywei inendet, koigei bik che kagobek.

⁵ Ak kiwolji malaikaiyat kobogorisiek kolenji, Amoiywei okwek: amu angen ale, ocheng’e Jesu, ne kigigartat.

⁶ Ma komi yu; amu kagong’eet, ko u ye kiga mwa. Obwa, ogeer ole korue Kiptaiyat.

⁷ Ak obe ochakte omwachi alamalyennyi olenji, Kagong’eet eng’ che kigobek; ak ogeero, indoenok kowendi Galili; ogeere inendet eng’ oloto: ogaso, kaamwawok.

⁸ Ak kiba kochakta eng’ kererit eng’ kaiyweisiet ak boiboiyet ne o, kiruai koba komwachi alamalyennyi.

⁹ Ak ogeero, kituiye Jesu ichek, ak kolenji, Chamge. Ak kobwa konam kelyekyik, ak kolos inendet.

¹⁰ Kilenji Jesu anyun ichek, Amoiywei: oba omwachi che kitupche koba Galili, ak kogeera eng’ olindo.

¹¹ Ak ye kita kobendi, ogeero, komong’ji nganaset alak eng’ ribik, ak komwachi tisiik che eechen tuguk tugul che kagoyaagis.

¹² Ak ye kingo kagoyumgei koboto boisiek, ak koruoch, kogochi askarik fedaisiek che chang’,

¹³ kolenji, Omwa okwek, ole, Kobwa alamalyennyi kemoi, ak kochor inendet koib kota keruitosi.

¹⁴ Ak ngo kas bounindet ng’olyondonito, kigaigai inendet, ak kesoruok eng’ nyalilda.

¹⁵ Kotaach anyun fedaisiek, ak koyai ko u ye kaginet: ak kiyom ng’olyondonito Yahudik, agoi ra.

Koborjingei Jesu che kiyoktoi eng’ Galili

¹⁶ Ago kiba Galili alamalyet tamanu ak agenge, agoi tulwet ole kiga koarorji Jesu.

¹⁷ Ak ye kingogeer inendet, kolos: ago kisage alage.

¹⁸ Ak kinyonji Jesu ichek ak kong’alalji, kolenji, Kigegona kimnatet tugul eng’ kipsengwet ak ng’ony.

¹⁹ Noto anyun oba, ak oyai bikab bororiosiek tugul koek alamalaik, obatisan ichek eng’ kainetab Kwanda ak ne bo Werit ak ne bo Tamirmiriet ne Tilil;

²⁰ onet ichek kosub tuguk tugul che kaang’atak: ak ogeero, ami kobotok eng’ betusiek tugul, agoi kagesunetab ng’ony.