MATAYO 27 - BUKUIT NE TILIL

Jesu eng’ taitab Pilato, bounindet ne bo Rom

¹ Ak ye kingo kagoeech, koruoch tisiik tugul che eechen ak boisiekab bichoto agobo Jesu, si kobar inendet:

² ak kirat inendet ak komut kwo kogochi Pilato, bounindet.

Meetab Judas

³ Ak ye kingogeer Judas anyun, ne king’wektoi inendet, kole, kagiruokyi Jesu, komwa ndara, ak koweekyi tisiik che eechen ak boisiek fedaisiek sosom,

⁴ kole, Kaayai tengekto amu kaang’wekte korotik che matinyei tengek. Ago kile ichek, Botech eng’ nee? Yaoti inyege.

⁵ Ak kiwirji fedaisiek hekalut, ole tilil, ak komanda; ak kiwa anyun kogetgei.

⁶ Ak kinam tisiik che eechen fedaisiek, ak kole, Ma chamdaat eng’ ng’atutiet kinde chu ole kiyumjin tuguk che kigoitoi, amu bo alyetab korotik.

⁷ Ak kiiruoch, ak kial mbaretab cheptereniot, si ketupchin toek.

⁸ Noto anyun, kigiguure mbaranato, Mbaretab korotik, agoi rani.

⁹ Kiisulda anyun ne kiga kimwa eng’ Jeremia maotiot, kole, Kiib ichek fedaisiek sosom, alyetab inendet ne kiga kigamanji, ne kigaman alak eng’ lagokab Israel:

¹⁰ ak kiigoito ichek koale mbaret ne bo cheptereniot ko u ye king’ata Kiptaiyat.

Komi Jesu taitab Pilato

¹¹ Ak kitonon Jesu anyun eng’ taitab bounindet: ak koteebe bounindet inendet, kolenji, I Laitoriatab Yahudik? Ak kolenji Jesu, Kaimwa.

¹² Ak ye kingotaam inendet tisiik che eechen ak boisiek, ko ma wol kiy.

¹³ Komwachi anyun Pilato inendet kolenji, Megase ole te baornatet ne baorianjinin bichu?

¹⁴ Ak kima wolji kiy, agot ng’olyot agenge: kot kokwong’ mising’ bounindet.

¹⁵ Ak kicham kotiakyin bounindet tuiyet kimonjororiot agenge, ne kacham ichek eng’ betutab igorta.

¹⁶ Ak kitinyei kimonjororiot age ne toogunot, ne kiguure Baraba.

¹⁷ Ye kingo kagoyumgei anyun, kolenji Pilato, Ng’o ne omache atiakwok? Baraba, anan Jesu ne kiguure Kristo?

¹⁸ Amu kinai kole, kagigoito inendet eng’ ng’etkonda.

¹⁹ Ak kingota kotebe ng’echeretab kiruoget, koyokyi osotiondennyi ng’olyo, kole, Ameite kiy chicho bo imanda: amu kaanyoru nyalilwogik che chang’ rani eng’ karuotitoet agobo inendet.

²⁰ Ak kibirji tisiik che eechen ak boisiek tuiyosiek, kole, kosom Baraba, ak kebar Jesu.

²¹ Ago kiwolji bounindet ichek, kolenji, Omache atiakwok ngoro eng’ chu aeng’? Ak kile, Baraba.

²² Kilenji Pilato, Ayachini nee anyun Jesu ne kiguure Kristo? Kole anyun tugul, Ingigartat inendet.

²³ Ak kile, Amu nee, kayai nee ne ya? Ago kibolyo mising’ kot kole, Ingigartat.

²⁴ Noto anyun, ye kingogeer Pilato kole, mata komuch kiy, ago kitesak bolatet, konam beek, ak koun eunekyik eng’ taitab tuiyet kole, Matinye tengek eng’ korotikab chichi bo iman: oyaoti okwege.

²⁵ Ak kiwol bik tugul kole, Ingotebenech korotikyik, ak eng’ lagokyok.

²⁶ Kiitiakyi anyun Baraba: ago kibire Pilato Jesu kipcharitit ak kogoito kigartat.

Kigartati Jesu

²⁷ Kiimut anyun askarikab bounindet Jesu kwo Praitorium, ak koyumjigei inendet askarik tugul.

²⁸ Ak kiireegune ngoroikyik, ak kolaakyi sambut ne birir.

²⁹ Ak kitaa ngatiet ne bo katok ak konde metinnyi, konde tegat eunnyi ne bo tai; ak kigutung’so eng’ tainnyi, ak kochot, kole, Kigatin, Laitoriatab Yahudik!

³⁰ Ak kising’ilji inendet, ak konam tegat ak kokwer metinnyi.

³¹ Ak ye kingo kagochot inendet, koreegune ngorionoto, ak kolaakyi inendet ngoroikyik, ak komut kwo kigartat.

³² Ak ye kingomong’, konyor chitab Kurene, ne kiguure Simon: ak kibirji inendet koib kimurtoiyondennyi.

³³ Ak ye kingoit ole kiguure Golgota, ye kiweech kele, Oldab terta,

³⁴ kogochi ichek inendet siki koee che kigiburukto tuguk che ng’wonen: ak ye kingo kagochamjam, koesio koee.

³⁵ Ak ye kingo kagogartat inendet, kopchechigei ngoroikyik eng’ seretab barbarek:

³⁶ ak kiteb ng’ony korib inendet eng’ oloto.

³⁷ Ak kiinde metinnyi barak kataamset agobo inendet ne kigisir, kele, NI KO JESU LAITORIAT NE BO YAHUDIK.

³⁸ Kigigartat anyun eng’ yoto koboto inendet, rebik aeng’, age eng’ eut ne bo tai, ak age eng’ eut ne bo katam.

³⁹ Ak kichurachur inendet che kisiirtoi, koleglegoti metowekwak,

⁴⁰ kolen, Inye ne ing’eme hekalut, ak iteech eng’ betusiek somok, soruge: ngo i Weritab Jehovah, choruge eng’ kimurtoiyot.

⁴¹ Kichurachur ko u noto agichek tisiik che eechen koboto sirik ak boisiek, kolen,

⁴² Kisor alak; ama imuch kosorgei. Inendet Laitoriatab Israel; ingochorgei nguno eng’ kimurtoiyot, si kiyan inendet.

⁴³ Kiimang’u Jehovah; ingosor inendet nguno, ngot komachei: amu kile, A Weritab Jehovah.

⁴⁴ Ak kichurachur agichek ko u noto rebik che kiga kigartat koboto inendet.

Meetab Jesu

⁴⁵ Kiimenit anyun emonoto komugul kong’eete sait lo agoi sait sogol.

⁴⁶ Ak ye kingo olo bo sait sogol koguurso Jesu eng’ kutit ne o, kole, Eli, Eli, lama sabaktani? Noto ko, Jehovah nenyu, Jehovah nenyu, kalya si ibagakta?

⁴⁷ Ak kingogas alak eng’ ichek che kitonondos eng’ oloto, kole, Kuurei chichi Elija.

⁴⁸ Ak ngunoto kolabat age eng’ ichek, kwo konem sibonjit, ak konyiit siki, ak konde tegat, ak kogochi koee.

⁴⁹ Ak kimwa chun alak kole, Obagakte; ongegeer ngo nyonei Elija si kosor inendet.

⁵⁰ Ak kiguurso Jesu kogeny, eng’ kutit ne o, ak kogoito tamirmiriennyi.

⁵¹ Ak ogeero, kigerer anget ne kigioiye hekalut koek aeng’ koboch barak agoi ng’ony; ak kibetogis ruandosiek;

⁵² ak kiyatogis kererisiek; ak kiging’eet borwekab bik che chang’ che tililen che kiruitos;

⁵³ ak ye kingo kagong’eet Jesu, komong’ bichoto agichek eng’ kererisiekwak komong’ji nganaset ne tilil, koborjigei che chang’.

⁵⁴ Ak ye kingogeer kiptaiyatab bogol ak icheget che kimi koboto inendet koribei Jesu, botanetab ng’ony ak tuguk che kayaagis, koiywei mising’, kole, Iman Weritab Jehovah chichi.

⁵⁵ Ak kimi eng’ oloto kobogorisiek che chang’ che kigeerei eng’ ye loo, che kiga kosubot Jesu koboch Galili, koboisiechinoti inendet:

⁵⁶ ki Maria Magdalene, age eng’ kobogorisiechoto, koboto Maria kametab Jakobo ak Joses, ak kametab werik che bo Sebedi.

Tubetab Jesu

⁵⁷ Ak ye kingo kagoek lagat, konyo magoriot ne bo Arimatea, ne keguure Josep, ne ki alamalyetab Jesu agine.

⁵⁸ Kiwa chichoto ole mi Pilato, kwo kosom mustab Jesu. King’at Pilato anyun kole, kigochi.

⁵⁹ Ak kiib Josep musto, ak kotaae angetab katanit ne tilil,

⁶⁰ ak konde kererinnyi ne leel, ne kiga kobal eng’ ruandet; ak komilji koita ne o kurget ne bo kererit, ak kwo.

⁶¹ Ak kimi yoto Maria Magdalene, ak Maria age, kotebyei eng’ taitab kererit.

⁶² Eng’ betut ne bo aeng’ noto betut ne kiisubi Chobet, koyumjigei Pilato tisiik che eechen ak Parisaik,

⁶³ ak kolenji, Kiptaiyandani, kibwati kele, kimwa kenindonoto, kota kosobei, kole, Ye ibata betusiek somogu ang’eet kogeny.

⁶⁴ Ng’at anyun kerib kererit komie agoi betut ne bo somok, si mabwa alamalyennyi kochor inendet koib, ak komwachi bik kolenji, Kagong’eet inendet eng’ che kigobek: si mayait lelutiet ne bo let kosiir ne bo tai.

⁶⁵ Kolenji Pilato ichek, Otinye ribik: oba oreng’wong’, ak orib komie ko u ye omuchi.

⁶⁶ Koba anyun, ak korib kererit komie, kong’och koita, komi ribik koboto ichek.