MATAYO 25 - BUKUIT NE TILIL

Kalewenet agobo bergeinik tamn

¹ Kiyanie anyun bounatetab kipsengwet bergeinik taman, che kiib taisiekwak, koba kotorokta sandetab katunisiet.

² Ki berberen mutu eng’ ichek, ak ki ng’omen mutu.

³ Amu ye kingoib che berber taisiekwak, ko ma ipto ichek mwanik:

⁴ ago kiib che ng’omen mwanik eng’ chuboisiekwak koboto taisiekwak.

⁵ Ak kingota kogaegei sandet, kobirto met tugul ak koruiyo.

⁶ Ago kibiit waagat kemoi kwen, Ogeero, kagoit sandet! Omong’u otoroch inendet.

⁷ King’eetyo anyun bergeinichato tugul, kochob taisiekwak.

⁸ Ak kilenji anyun che berber che ng’omen, Onagech mwanikwok; amu machei komisogis taisiekyok.

⁹ Ago kiwolji che ng’omen, kolenji, Abere mayamech achek ak okwek: kaigai obe ole mi che aldoi, ak oaljige.

¹⁰ Ak kingota kobendi koalisiei, koit sandet; ak komong’ji anyun che chobotin igortab katunisiet ak inendet: ak kigiger kurget.

¹¹ Ak eng’ let kobwa bergeinik chugai agichek, ak kole, Kiptaiyandani, Kiptaiyandani, yatwech.

¹² Ago kiwolji kolenji, Amwawok, iman, ale, Mangenok.

¹³ Noto anyun oripse, amu mongen betut anan sait.

Kalewenet agobo talentaisiek

¹⁴ Amu u ye wendi chi emet age, ak koguur otwogikyik, ak kogochi tugukyik.

¹⁵ Kiigochi age talentaisiek mut, kogochi age aeng’, kogochi age agenge: age tugul ko u kamugennyi; ak kwo bandanyi.

¹⁶ Kiwa anyun inendet ne kitaach talentaisiek mut kwo koboisie, ak kinyor talentaisiek alak mut.

¹⁷ Kiigei noto agine ne kitaach aeng’; kinyor aeng’ alak.

¹⁸ Ago kiwa ne kitaach agenge kwo kobalji ng’ony, ak kiuny feda ne bo kiptaiyandennyi.

¹⁹ Ye kingobata betusiek che chang’, konyo kiptaiyatab otwogichoto, ak koiit koboto icheget.

²⁰ Ak kinyo inendet ne kiga taach talentaisiek mut koibu talentaisiek mut alak, ak kole, Kiptaiyandani, kiigona talentaisiek mut: keero, kianyoru talentaisiek mut alak.

²¹ Kilenji kiptaiyandennyi, Kiiyai ne mie, otwogindoni mie ak ne kiyani: koiegu ne bo iman eng’ tuguk che ng’ering’, kandein ibou tuguk che chang’: mong’ji anyun boiboiyetab kiptaiyandeng’ung’.

²² Ak kinyo agine ne kiga taach talentaisiek aeng’ ak kole, Kiptaiyandani, kiigona talentaisiek aeng’: keero, kianyoru talentaisiek alak aeng’.

²³ Kilenji kiptaiyandennyi, Kiiyai ne mie, otwogindoni mie ak ne kiyani; koiegu ne bo iman eng’ tuguk che ng’ering’, kandein ibou tuguk che chang’: mong’ji anyun boiboiyetab kiptaiyandeng’ung’.

²⁴ Ak kinyo agine ne kiga taach talentait agenge ak kole, Kiptaiyandani, kiangenin ale, i chi ne kolgol, igese eng’ ole ma igolji, ak iyumi eng’ ole ma ilechi:

²⁵ ak kiaiywei, ak kiawe auny talentaing’ung’ eng’ ng’ony: keero, ee, nam king’ung’.

²⁶ Ago kiwolji kiptaiyandennyi ak kolenji, Inye otwogindet ne ya ak ko choriren, kiinai ile agese eng’ ole ma agol, ak ayumi eng’ ole kima alechi;

²⁷ kiga nyoljin anyun inde fedaisiekyuk ole tesoksei fedaisiek, ta kaataach ko kaweege chechuk koboto che kitesak.

²⁸ Noto anyun orebe inendet talentait, ak ogochi inendet ne tinyei talentaisiek taman.

²⁹ Amu kigochin age tugul ne tinyei, si kosich che chang’: ago kirebe inendet ne matinyei, agot ne tinyei.

³⁰ Ak otoorji otwogindet ne manyolu mesundeito ne bo sang’, ole egu rirek ak nyeetab kelek.

Betutab Kiruoget

³¹ Ago ye nyo Weritab chi eng’ torornatennyi, koboto malaikaisiek tugul, kotebe anyun ng’echeretab torornatennyi:

³² ak kiyumji tainnyi bororiosiek tugul: ak kokwei ichek kobesio, ko u ye ibestos mestowot kechirek ak ng’ororek:

³³ ak konde kechirek eunnyi ne bo tai, ak ng’ororek eng’ katam.

³⁴ Yeityo komwachi Laitoriat ichek che mi eunnyi ne bo tai, kolenji, Obwa, okwek che oberurotin che o bo Baba, onam bounatet ne kigechobwok koboch ko kagilumda ng’ony:

³⁵ amu kiama rubet, ak kiogona aam: kiama melel, ak kionaga aee: kia too ak kiotaacha;

³⁶ kiami ach ngor, ak kiolaaksewa: kiamiani, ak kiobwa ogeera: kiami korgoret, ak kiobwanja.

³⁷ Kowolji anyun che bo imanda, kolenji, Kiptaiyandani, kigigeerin au koamin rubet, ak kebain? Anan koamin melel, ak kinagin iee?

³⁸ Ak kigigeerin au ko i too, ak ketaachin? Anan imi ach ngor, ak kilaakseun?

³⁹ Ak kigigeerin au imiani, anan eng’ korgoret, ak kebwanjin?

⁴⁰ Ak kowolji Laitoriat kolenji, Amwawok, iman, ale, Ko u ye kioyachi agenge eng’ tupchosiechuchuk, agot che mengechen eng’ tugul, ko kioyaiywa.

⁴¹ Kolenji anyun ichek che mi eutab katam, Oba eng’ ole ami, okwek che o chubotin, oba mat ne bo koigeny ne kigechopchi oindet ak malaikaisiekyik:

⁴² amu kiama rubet, ak kima ogona aam: kiama melel, ak kima onaga aee:

⁴³ kia too, ak kima otaacha: kiami ach ngor, ak kima olaaksewa; kiamiani, ak eng’ korgoret, ak kima obwa ogeera.

⁴⁴ Kowol anyun agichek, ak kole, Kiptaiyandani, kigigeerin au koamin rubet, anan melel, anan ko i too, anan imi ach kngor, anan imiani, anan imi korgoret, ama kiboisieun?

⁴⁵ Kowolji anyun kole, Amwawok, iman, ale, Ko u ye ma oyachi agenge eng’ chu mengech eng’ tugul, ko ma oyaiywa.

⁴⁶ Ak bendi chu ole mi nyalilda ne bo koigeny: ago bendi che bo imanda ole mi sobondab koigeny.