MATAYO 22 - BUKUIT NE TILIL

Kalewenet agobo igortab katunisiet

¹ Ak king’alalji Jesu ichek kogeny eng’ kalewenaik, kolenji,

² Kiyanie bounatetab kipsengwet laitoriat anum, ne kiyachi werinnyi igortab katunisiet,

³ ak kiiyokto otwogikyik koguur ichek che kiga kemwachi agobo igortab katunisiet: ak kima cham kobwa.

⁴ Kiiyokto kogeny otwogik alak, kole, Omwachi ichek che kiga kemwachi, olenji, Kaachob amitwogikyuk: kageeny eikyuk ak alak che akwaen, ak chobotin tuguk tugul: obwa igortab katunisiet.

⁵ Ago ma iit ng’alekyik, ak koba ortinwekwak, kwo age mbarennyi, kwo age boisiennyi ne bo mung’aret;

⁶ ko che king’et, konam otwogikyik, ak konyalil, ak kobar.

⁷ Ago kinerech laitoriat; ak kiiyokto lugosiekyik, kobar rumichoto, ak kobeel nganasenywa.

⁸ Kimwachi anyun otwogikyik kolenji, Chobot katunisiet, ago ma nyolji che kiga kemwachi.

⁹ Noto anyun, oba ole besiechin ortinwek, ak oguurji igorta ne bo katunisiet tugul che konyoru.

¹⁰ Kiba anyun otwogichoto ortinwek, ak koyum tugul che kinyor, che yaach koboto che miach: ak kinyi toek gotab katunisiet.

¹¹ Ago ye kingomong’ laitoriat kogeer toek, kogeer chito eng’ oloto ne kima ilaach ngorietab katunisiet:

¹² ak kilenji, Choruani, kenyonunde ano oli ametinye ngorietab katunisiet? Ak kinam kut, ma twek.

¹³ Kilenji anyun laitoriat kiboitinik, Orat inendet eunek ak kelyek, ak owirji mesundeito eng’ oli bo sang’; egu eng’ oloto rirek ak nyeetab kelek.

¹⁴ Amu kiguurei che chang’, ago kileweni che ng’ering’.

Ng’olyot ne kigiteeb agobo kodi

¹⁵ Kiba anyun Parisaik, koruoch ole namdoi inendet eng’ ng’alekyik.

¹⁶ Ak kiiyokto alamalyenywa koba ole mi inendet, koboto Herodik, kolenji, Konetindoni, kingen kele i bo iman, ak ineti oretab Jehovah eng’ iman, ameiti chi tugul: amu megeere togochikab bik.

¹⁷ Mwawech anyun, Ibwati nee inye? Tos chamdaat eng’ ng’atutik kigochi kodi Kaisari, anan achicha?

¹⁸ Ago kinai Jesu yaitienywa, ak kole, Amu nee si otiema, okwek chombilichu?

¹⁹ Oborua feda ne bo kodi. Ak kiipchi denarit.

²⁰ Ak kilenji, Itondab ng’o ni, ak siret?

²¹ Kolenji, Bo Kaisari. Kolenji anyun, Ogochi Kaisari tuguk che bo Kaisari; ak ogochi Jehovah tuguk che bo Jehovah.

²² Ak ye kingogas, kokwong’io, ak kobagach inendet, koba orenywa.

Ng’olyot ne kigiteeb agobo ng’eetyet

²³ Kibwanji inendet betunoto Sadukaik, che mwaei kole, mami ng’eetyetab che kigobek: ak koteebe,

²⁴ kole, Konetindoni, kimwa Musa kole, Ngo me chi, ama tinyei lagok, kondi ng’etab kam osotiondonoto, si kolalji mat ng’etab kam.

²⁵ Kimi kobotech murenik tisabu che tupcho: ak kiitunis ne bo tai, ak kime, ama sich lakwa. Kondi osotiondennyi ng’etab kamet;

²⁶ kiyai ko u noto ne bo aeng’ agine, ak ne bo somok, agoi ne bo tisab.

²⁷ Ak kingogesgei tugul, kome kobogoriot agine.

²⁸ Noto anyun eng’ ng’eetyet kobunji ng’o osotiondonoto eng’ choto tisab? Amu kiga kotun tugul.

²⁹ Ago kiwolji Jesu kolenji, Olele, amu mongen sirutik, anan kimnatetab Jehovah.

³⁰ Amu eng’ ng’eetyet ko maitunisiei, ama kigoitoi kitun, ago kergeitu ak malaikaisiek che mi kipsengwet.

³¹ Noto anyun, agobo ng’eetyetab bik che kigobek, ko kima osoman ne kimwawok Jehovah kole,

³² A Jehovah ne bo Abraham, a Jehovah ne bo Isak, a Jehovah ne bo Jakobo? Jehovah ko ma Jehovah ne bo che kigobek, ago bo che soptos.

³³ Ak ye kingogas tuiyosiek, kokwong’io agobo konetisiennyi.

Ng’olyot ne kigiteeb agobo ng’atutiet ne o eng’ tugul

³⁴ Ago ye kingogas Parisaik kole kagonam kut ng’alekyik Sadukaik, koyumgei.

³⁵ Ak kiteebe inendet age eng’ ichek, ng’omotiotab ng’atutik, kotiemei inendet,

³⁶ kole, Konetindoni, ngoro ng’atutiet ne o eng’ Ng’atutik?

³⁷ Ak kilenji, Cham Kiptaiyat Jehovah neng’ung’ eng’ muguleldang’ung’ komugul, ak eng’ sobondang’ung’ komugul, ak eng’ ng’omnateng’ung’ komugul.

³⁸ Nito ng’atutiet ne o ak ko ne bo tai.

³⁹ Ak ne bo aeng’ ne kergei ak nito ko ni, Cham chitab kokweng’ung’ ko u ole ichamdoige.

⁴⁰ Tononie Ng’atutik tugul ak maotik, ng’atutichu aeng’.

Ng’olyot ne kigiteeb agobo mesia

⁴¹ Ak kingota koyumigei Parisaik, koteebe Jesu ichek ng’olyo,

⁴² kole, Obwati nee okwek agobo Kristo? Weritab ng’o inendet? Kolenji, Weritab Daudi.

⁴³ Kolenji ichek, Amu nee anyun si koguure Daudi inendet eng’ Tamirmiriet, Kiptaiyat, kole,

⁴⁴ Kilenji Kiptaiyat Kiptaiyandennyu, Tebe eunnyu ne bo tai, Agoi ande buniguk keldebesaikab kelyeguk?

⁴⁵ Ngo kuure anyun Daudi inendet Kiptaiyat, ko werinnyi eng’ nee?

⁴⁶ Ak kima imuch age tugul kowolji inendet ng’olyo, ak koboch betunoto agoi, ko mata kogany chi koteebe inendet ng’olyo kogeny.