MATAYO 21 - BUKUIT NE TILIL

Kowendi Jesu Jerusalem kilosunoti

¹ Ak ye kingorikta ichek Jerusalem, koit Betpage, agoi tulwetab Emitik, koyokto Jesu aeng’ che bo alamalyet,

² kolenji, Oba agoi nganaset ne mi taing’wong’, ak onyoru ngunoto sigiriet ne ratat, komi ak moitanyi: otiach tuwai ak ogetwa.

³ Ak ngo mwawok chi kiy, olenji, Makyingei Kiptaiyat choto; ak kogonok ngunoto.

⁴ Kayaak ni, si kobiit kosulda ne kimwa maotiot, kole,

⁵ Omwachi cheptab Sion, Keero, nyonjinin Laitoriandeng’ung’, Ne tala, ak kolong’onu sigiriet, Ak moitab sigiriet, barnotiot.

⁶ Ak kiba alamalyet, koyai ko u ye kiiarorji Jesu ichek,

⁷ ak kiget sigiriet ak moitanyi, ak koiitochi ngoroikwak; ak kotebe inendet barak.

⁸ Ak kiito che chang’ che bo tuiyet ngoroikwak eng’ oret; ak kieb alak temenikab ketik, ak koiito eng’ oret.

⁹ Ak kimwaoti eng’ kutit ne o tuiyosiek che kiindoe inendet, ak che kiisubi, kolen, Hosanna weritab Daudi: iberurot inendet ne nyonei eng’ kainetab Kiptaiyat; Hosanna eng’ ole toror mising’.

¹⁰ Ak ye kingoit Jerusalem, kochirjiren nganaset komugul, kole, Ng’o ni?

¹¹ Ak kimwa tuiyosiek kole, Ni ko maotiot Jesu, ne bunu Nasaret ne bo Galili.

Kotilili Jesu hekalut

¹² Ak kiwa Jesu hekalutab Jehovah, ak koon tugul che kialdoisiei ak che kialisiei eng’ goyoto, ak kogabui mesosiek che bo walikab siling’isiek, ak ng’echerokab che kialdoi cheptugenik;

¹³ ak kolenji ichek, Sirat kele, Kiguure gonnyu gotab saet: ago kaowal koek kebenetab rebik.

¹⁴ Ak kibwanji inendet eng’ hekalut ichek che ki koriotin ak che ing’waldos: ak kiisoob ichek.

¹⁵ Ago ye kingogeer tisiik che eechen ak sirik tuguk che kiyai che bo kwong’et, ak lagok che kimwaei eng’ kutit ne o eng’ hekalut, kole, Hosanna weritab Daudi; konerekso mising’,

¹⁶ ak kolenji, Igase ne mwaei chu? Kolenji Jesu ichek, Ee: kima osoman kele, Kiiyai inye kalosunet kosulda eng’ kutuswekab lagok ak che reritos?

¹⁷ Ak kibagakta ichek, ak kwo komanda eng’ nganaset kwo Betania, ak kiru oloto.

Mogoiywet ne ma iyiei logoek

¹⁸ Ak karon, ye kiweeksei kowendi nganaset, koam rubet.

¹⁹ Ak kingogeer eng’ tabandab oret mogoiywet, kwo ole mi, amanyorji kiy, kobate sogek kityo; ak kilenji ketoto, Koboch ra, ko ma iyie logoek agoi koigeny. Ak kires ngunoto mogoiywondonoto.

²⁰ Ak ye kingogeer alamalyet, kokwong’io, kole, Katepto ano si kores mogoiywet ngunoto?

²¹ Ak kiwolji Jesu kolenji, Amwawok, iman, ale, Ngotinye kayanet, amosage, ko moyae ne kageyachi mogoiywondoni kityo, ago agot ngomwachi tulwoni, olenji Ngesutin ak kewirjin nyanjet, koyaaksei.

²² Ak tuguk alak tugul che osome eng’ saet, oyani, otaache.

Koesioi bik kimnatetab Jesu

²³ Ak ye kingwo hekalut orit, ye kita konetisiei, kobwanji inendet tisiik che eechen ak boisiekab bichoto, ak kolenji, Nee kimnatet ne iyae tuguchu? Ak kigonin ng’o kimnatoni?

²⁴ Ak kiwolji Jesu kolenji, Amache agane ateebenak ng’olyot agenge, ne ngomwawa, amwawok agane kimnatonoto ayae tuguchu.

²⁵ Kibunu ano kabatisanetab Johana? Bunu kipsengwet anan kibunu bik? Ak kichaamjigei, kole, Ngot kemwa kele, Kibunu kipsengwet; komwawech inendet kole, Kilya anyun si moyan inendet?

²⁶ Ago ngemwa, kele, Kibunu bik; kiiywei tuiyet, amu iyani bik tugul kole, Maotiot Johana.

²⁷ Ak kiwolji bik Jesu, kolenji, Magingen. Komwachi ichek agine kolenji, Mamwawok agane kimnatet ne ayae tuguchu.

Kalewenet agobo werik aeng’

²⁸ Ago olen nee? Kitinye chi werik aeng’; ak kiwa ole mi werit ne bo tai, ak kolenji, Weri, ui boisie rani eng’ mbaretab sabibuk.

²⁹ Ak kiwol kole, Mawendi: ago eng’ let kosik, ak kwo.

³⁰ Yeityo kwo ole mi ne bo aeng’, ak komwachi ko u noto. Ak kiwol kole, Baba, awendi: ago mawo.

³¹ Ng’o eng’ choto aeng’ ne kiyai magetab kwandanywa? Kole, Ne bo tai. Kimwachi Jesu ichek kolenji, Amwawok, iman, ale, Sib kondoenak koitei bounatetab Jehovah taagikab aisurut ak chepkugonik.

³² Amu kinyonjok Johana eng’ oretab imanda, ago ma oyan inendet: ago kiiyan inendet taagikab aisurut ak chepkugonik: ago okwek, ye kingogeer, ko ma osigu si kobiit oyan inendet.

Kalewenet agobo mbaret ne bo sabibuk

³³ Ogas kalewenet age: Kimi chito age ne kitinyei got, ne kiminji sabibuk mbaret, ak kong’ot, ak kobal keringet ole kirurung’e logoek, ak koteech got ne koi, ak komanakyi meek ak kwo emet age.

³⁴ Ak ye kingo kagorik ruratetab logoek, koyokto otwogikyik koba ole mi meek, si koib logoekyik.

³⁵ Ak kinam meek otwogikyik, ak kibir age, ak kibar age, ak kilach age eng’ koik.

³⁶ Kiiyokto kogeny otwogik alak che siirei che bo tai: ak kiyachi ichek ko u noto.

³⁷ Ak eng’ let koyokyi werinnyi, kole, Teechei werinnyu.

³⁸ Ago ye kingogeer meek werit, komwachigei, kole, Ni ne bo tuguk; obwa, kebar inendet, ak kenyaban tuguk che kata tun bunjin inendet.

³⁹ Ak kinam inendet, ak kotoorta komanda eng’ mbar, ak kobar.

⁴⁰ Noto anyun ye nyo chitab kobo mbaretab sabibuk, koyachin nee meechoto?

⁴¹ Kilenji, Barei chichoto bo mbaret bichoto yaachen eng’ baret ne ya, ak komanakyi mbaretab sabibuk meek alak, che igochin inendet logoek eng’ ruratenywa.

⁴² Kilenji Jesu ichek, Tom osoman sirutik kele, Koita ne kiesio teegik, Kigeyai noto koek metit ne bo luita: Kibunu ni Kiptaiyat Ak kiek kwong’utiet eng’ konyekyok?

⁴³ Noto anyun amwawok ale, kirebenok bounatetab Jehovah, ak kigochi bororiet age ne yiei logoekyik.

⁴⁴ Ak inendet ne ibutyin koi barak koilei konyaknyaksei: ago age tugul ne tururjingei koiito, konyinyirsei.

⁴⁵ Ak ye kingogas tisiik che eechen ak Parisaik kalewenaikyik, konai kole kang’alali agobo ichek.

⁴⁶ Ak ye kingocheng’ konam inendet, koiywei tuiyosiek, amu kiiyani kole maotiot inendet.