MATAYO 20 - BUKUIT NE TILIL

Kalewenet agobo bik che kiboisiei eng’ mbaretab sabibuk

¹ Amu kergei bounatetab kipsengwet ak chitab kobo got, ne kimusta karon koguur meek kobwa mbarennyi ne bo sabibuk.

² Ak ye kingo kagochamnyechi ak meechoto kogochi denarit agenge eng’ betut agenge, koyokto koba mbarennyi.

³ Ak kimanda ko negit sait somok, ak kogeer alak kotonondos eng’ oldab aldaisiet ama tinyei boisiet;

⁴ ak kilenji, Oba ak okwek mbaretab sabibuk si agonok ne nyolu. Ak kiba anyun.

⁵ Kimanda kogeny ko negit sait lo ak eng’ sait sogol, ak kiyai ko u noto.

⁶ Ak kimanda kogeny olo bo sait taman ak agenge, ak konyor alak kotonondos; ak kilenji ichek, Kalya si otonone oli betut komugul amotinye boisio?

⁷ Kolenji anyun bichoto inendet, Amu ma kuurech chi. Kolenji, Oba ak okwek mbaretab sabibuk.

⁸ Ak ye kingoek koskoleny, komwachi chitab kobo mbaretab sabibuk kiboitiondennyi ne o kolenji, Kuur meek, si igochi melekwekwak, itaune ne bo let agoi ne bo tai.

⁹ Ak ye kingobwa ichek che kiga kiguur ko negit sait taman ak agenge, konyor chi tugul denarit agenge.

¹⁰ Ak ye kingobwa che bo tai, kolen nyoru che siirei; ak kinyor agichek denarit agenge chi tugul.

¹¹ Ak ye kingotaach, kong’unyng’ung’ji chitab kobo got,

¹² kole, Kabois chu bo let sait agenge kityo, ak kairogenech bichoto achek che kagibirtege betut komugul eng’ asista ne ng’wan.

¹³ Ago kiwolji kolenji age eng’ ichek, Choruani, ma ayaun kiy ne ya: kama kichamnyechi tuwai denarit agenge?

¹⁴ Nam neng’ung’, ak iwe oreng’ung’; magennyu agochi chichito bo let ko u ye kagonin inye.

¹⁵ Tos manyoljina ayai ne amache eng’ tugukyuk? Anan ya kondang’ung’, amu a mie?

¹⁶ Egu anyun che bo let che bo tai, ak egu che bo tai che bo let.

Sib komwaei Jesu ne bo somok agobo meennyi

¹⁷ Ak ye kitogostoi Jesu kowendi Jerusalem, komut alamalyet taman ak aeng’ koba taban ichegei, ak kolenji ichek eng’ oret,

¹⁸ Ogeero, kitogosyini Jerusalem; si kinde Weritab chi eunekab tisiik che eechen ak sirik; ak kiruokyi kome,

¹⁹ ak kogoito kochurachur Bororiosiek, ak kobire kipcharitit, ak kogartat eng’ kimurtoiyot: ak king’eet inendet eng’ betutab somok.

Somset agobo teegisto ne bo ng’ony

²⁰ Kinyonji anyun inendet kametab werikab Sebedi koboto werikyik, ak kogutung’ji, ak kosom inendet kiy.

²¹ Ak kilenji, Imache nee? Kolenji, Ng’at ile kotebe werichuchuk aeng’u, age eung’ung’ ne bo tai, ak age eung’ung’ ne bo katam, eng’ bounateng’ung’.

²² Ago kiwol Jesu kole, Mongen ne osome. Omuchi okwek oee kikombet ne negit aee? Kolenji inendet, Kimuchi.

²³ Kolenji ichek, Oee iman kikombennyu: ago ma nenyu agochi kotebe eunnyu ne bo tai, ak eunnyu ne bo katam, ago bo ichek che kachopchi Baba.

²⁴ Ak ye kingogas chun tamanu, konyit agobo choto aeng’ che tupcho.

Etunatet ne bo iman

²⁵ Ago kiguur Jesu kobwanji inendet, ak kole, Ongen ole bou eng’ kimnatet bounikab Bororiosiek, ak bou ichek bikwak che eechen.

²⁶ Ma u noto eng’ okwek: ago age tugul ne machei koek ne o eng’ kwenung’wong’ koek kiboitiondeng’wong’;

²⁷ ak age tugul ne machei koek ne bo tai eng’ kwenung’wong’ koek otwogindeng’wong’:

²⁸ agot ko u noto, kima nyo Weritab chi keboisiechi, ago si kobois inendet, ak kogoito sobondanyi koek kit ne kitiage che chang’.

Keyatyin konyek kipkoratinik aeng’

²⁹ Ak kingomandoi ichek eng’ Jeriko, kosubi inendet tuiyet ne o.

³⁰ Ogeero, kipkoratinik aeng’ che kitebyei eng’ oret taban, ye kingogas kole siirtoi Jesu, kowaach, kole, Kiptaiyandani, rireneige, ee weritab Daudi.

³¹ Kiger kong’ tuiyet bichoto kole, kosisyo: ago kites kowaach, kole, Kiptaiyandani, rireneige, ee weritab Daudi.

³² Kotonon Jesu, ak koguur ichek, ak kolenji, Omache ayaiywok nee?

³³ Kolenji inendet, Kiptaiyandani, kimache keyatwech konyekyok.

³⁴ Ak kirirge Jesu, ak kitwa konyekwak: ak kogeerto eng’ yoto ak kosub inendet.