MATAYO 2 - BUKUIT NE TILIL

Itunetab bik che ng’omen

¹ Ak ye kingo kagesich Jesu eng’ Betlehem ne bo Judea eng’ betusiek che bo laitoriat Herod, ogeero, kibwa Jerusalem bik che ng’omen kobunu kong’asis,

² koteeboti kole, Mi ano inendet laitoriatab Yahudik ne kigesich? Amu kigigeer kecheiyandennyi eng’ kong’asis, ak kagibwa kilosu inendet.

³ Ak ye kingogas noto laitoriat Herod, koarogen, koboto Jerusalem komugul.

⁴ Ak ye kingoyum inendet tisiik che eechen tugul ak sirik che bo bik, koteebe ole kigisikyi Kristo.

⁵ Ak kiwolji kolenji, Kigisikyi Betlehem ne bo Juda: amu kisir maotiot ko u noto, kole,

⁶ Ak inye, Betlehem, emetab Juda: Ma i ming’in mising’ eng’ kandoikab Juda, Amu mong’unenen bounindet, Ne tun egu mestowotab bikyuk Israel.

⁷ Kiguur anyun Herod eng’ ung’ot bik che ng’omen, si kogine kole kitoogu au kecheiyat.

⁸ Ak kiiyokto koba Betlehem, ak kilenji, Oba ocheng’ komie lakwet ne ming’in; ak ye kaonyoru inendet, obwa omwawa, si anyo agane alos inendet.

⁹ Ak kingo kagogas ng’alekab laitoriat, koba bandanywa; ak ogeero, kiindoe ichek kecheiyat, ne kiga kogeer eng’ kong’asis, kot koit ak kotonon eng’ baragutab ye kimi lakwet ne ming’in.

¹⁰ Ak ye kingogeer kecheiyat, koboiboitu eng’ boiboiyet ne o mising’.

¹¹ Ak kiba go orit ak kigeer lakwet ne ming’in koboto kamennyi Maria; ak kiibutyi ng’ony kolos inendet; ak kotiach konoraikwak che bo kamanutiet ne o, kogochi inendet kagochinoik, tahabu, tuguk che nyamdut ak tuguk che u igomoik.

¹² Ak kingo kagoteechi Jehovah eng’ karuotitoet kolenji, Amoweekyige Herod, konam anyun oret age koba emenywa.

Komwechin Misri Josep ak Maria ak lakwet

¹³ Ak kingo kagoba ichek, ogeero, komong’ji malaikaiyatab Kiptaiyat Josep eng’ karuotitoet, kolenji, Ng’eet, imut lakwet ne ming’in ak kamennyi, mwechi Misri, ak itebe oloto agoi tun amwaun: amu cheng’ei Herod kobar lakwet ne ming’in.

¹⁴ King’eet anyun kemoi komut lakwet ne ming’in ak kamet, koba Misri;

¹⁵ ak kitebe oloto agoi kome Herod: si kosulda ne kimwa Kiptaiyat eng’ maotiot, kole, Kiaguur werinnyu komong’ eng’ Misri.

Baret ne kibar Herod lagok che mi Betlehem

¹⁶ Kingogeer Herod anyun, kole, kigong’al inendet bik che ng’omen, konerech mising’, ak kiiyokto, kebar lagok tugul che ng’etik che mi Betlehem, ak eng’ tabanwekyik tugul, koboch che bo kenyisiek aeng’ ak che tomo koit choto, eng’ betut ne kigine bik che ng’omen.

¹⁷ Kiisulda anyun eng’ betunoto ne kiga mwa maotiot Jeremia, kole,

¹⁸ Kigegas kutit eng’ Rama, Rirek ak kateiyet ne o, Rirjin Rael lagokyik; Ak kima cham kigaigai, amu ma komi.

Koweechigei Josep ak Maria ak lakwet eng’ Misri

¹⁹ Ago kingo kagome Herod, ogeero, komong’ji malaikaiyatab Kiptaiyat Josep eng’ Misri eng’ karuotitoet,

²⁰ kolenji, Ng’eet, imut lakwet ne ming’in ak kamet, oba emetab Israel; amu kogobek che kicheng’ei kobar lakwanato ming’in.

²¹ Ak king’eet, komut lakwet ne ming’in ak kamet, kobwa emetab Israel.

²² Ago ye kingogas kole bou Arkelau Judea eng’ bounatet ne ki bo kwandanyi Herod, koiywei kwo oloto; ak ye kiiteechi Jehovah eng’ karuotitoet, koweekyigei komoswekab Galili,

²³ ak kinyo kotebe nganaset ne kiguure Nasaret: si kobiit kosulda ne kiga mwa maotik, kole, kiguure inendet Nasaretindet.