MATAYO 19 - BUKUIT NE TILIL

Ng’olyot ne kigiteeb agobo siret ne bo besiet

¹ Ak ye kingo kagoges Jesu ng’alechu, kwo eng’ Galili agoi koit tabanwekab Judea, Jordan komosin;

² ak kiisub inendet tuiyosiek che eechen; ak kiisoob ichek eng’ oloto.

³ Ak kibwanji inendet Parisaik, ak kotiem, kole, Tos chamdaat eng’ ng’atutik koon chi osotiondennyi agobo kiy age tugul?

⁴ Ak kiwol kole, Tom osoman, ole, inendet ne kiyai ichek eng’ taunet ko kiyai muren ak tie,

⁵ ak kile, Agobo nito anyun bagaktoi mureno kwanda ak kamet, ak konamgei ak osotiondennyi; ak koek tuwai borto agenge?

⁶ Si ma ko aeng’ ago borto agenge. Noto anyun, che kigotuiyo Jehovah, komat kobesio chi.

⁷ Kilenji anyun bichoto inendet, Kilya anyun si kong’at Musa kole, Kigochin siret ne bo besiet ak koon kwo?

⁸ Kimwachi ichek kolenji, Kichamwok Musa oon osotikwok, amu uuindab mugulelwekwok: ago kima ko u noto koboch taunet.

⁹ Ak amwawok ale, Chi age tugul ne onei osotiondennyi, ama eng’ ng’olyotab sokset, ak kotun age, ko kabaigei: ak inendet ne ituni ne kigeon ko kabaigei.

¹⁰ Kolenji alamalyennyi inendet, Ngot ko u noto ateptab muren ak osotiondennyi, ko manyolu kitunis.

¹¹ Ago kilenji ichek, Temene bik tugul kotaach mwaoni, kobate ichek che kigochin.

¹² Amu mitei sirorinik che kigisich ko u noto koboch mootinwekab kametwagikwak: ak mitei bik che kigimoch: ak mitei bik che kiimoigei agobo bounatetab kipsengwet. Inendet ne imuchi kotaach ni, kotaach.

Kaberuri Jesu lagok che mengech

¹³ Kigimutyi anyun lagok che mengech, si kobiit kogonoor eunekyik ichek ak kosa: ak kiger kong’ alamalyet ichek.

¹⁴ Ago kile Jesu, Ochamji lagok che mengech, kobwanja, amoete: amu bo che u chuto bounatetab kipsengwet.

¹⁵ Ak kiigonoor eunekyik ichek, ak kwo eng’ oloto.

Kocheng’ei ne kitinyei tuguk che chang’, sobondab koigeny

¹⁶ Ak ogeero, kinyonji chi ak kole, Konetindoni, nee kiy ne mie ne kanyol ayai si anyor sobondab koigeny?

¹⁷ Ak kolenji, Kalya si iteebena agobo noto mie? Mi agenge ne mie: ago ngimache imong’ji sobondo, inam ng’atutik.

¹⁸ Kilenji inendet, Che u nee? Ak kile Jesu, Merumisie, Moipge, Mechorse, Mebaorianji lembech.

¹⁹ Teech kwandang’ung’ ak komet: ak, Cham chitab kokwet ko u ye ichamdoige.

²⁰ Kolenji murenonoto, Kiarib tuguchu tugul: ta ko ng’etunot nee eng’ ane?

²¹ Kolenji Jesu inendet, Ngimache iegu ne igesunotgei, iwe, ialde che itinye, ak igochi kibananok, si inyoru magornatet eng’ kipsengwet: ak inyo, isubwa.

²² Ago ye kingogas murenonoto mwaonato, kwo eng’ arogenet: amu kitinyei tuguk che chang’.

Tuguk che uuen agobo magornatosiek

²³ Ak kilenji Jesu alamalyennyi, Amwawok, iman, ale, Uui eng’ magoriot komong’ji bounatetab kipsengwet.

²⁴ Ak kogeny amwawok ale, Nyamnyum eng’ tambesiet kochut kondab katet, kosiir komong’ji magoriot bounatetab Jehovah.

²⁵ Ak ye kingogas alamalyet ng’olyondonoto, kokwong’io mising’, kole, Ng’o anyun ne imuchi konyor sorunet?

²⁶ Ak kogeer Jesu ichek ak kolenji, Maimugaksei ni eng’ bik; ago imugaksei tuguk tugul eng’ Jehovah.

²⁷ Kiwolji Petero anyun kolenji, Keero, kigebagakte tuguk tugul, ak kigisubun; kinyoru nee anyun achek?

²⁸ Ak kilenji Jesu ichek, Amwawok, iman, ale, Okwek che koosubwa, eng’ yaet ne leel ye tun tebe Weritab chi ng’echeretab torornatennyi, otebe ak okwek ng’echerok taman ak aeng’ che bo laitornatet, oruokyini ortinwek taman ak aeng’ che bo Israel.

²⁹ Ak age tugul ne kigobagakta gorik, anan ng’etab kametwagik, anan chepkametwagik, anan kwanda, anan kamet, anan lagok, anan mbarenik, agobo kainennyu, kotaachei konyil bogol, ak kobor eng’ sobondab koigeny.

³⁰ Ago tun egu che chang’ che bo tai che bo let; ak koegu che bo let che bo tai.