MATAYO 18 - BUKUIT NE TILIL

Kinetigei kaming’inetab ge

¹ Kibwanji alamalyet Jesu eng’ sainato, kolenji, Ng’o anyun ne o eng’ tugul eng’ bounatetab kipsengwet?

² Ak kiguur lakwet ne ming’in konyo ole mi inendet, ak kotonone kwenunywa,

³ ak kole, Amwawok, iman, ale, Ngot ko mowalage, oige lagok che mengechen, ko moite bounatetab kipsengwet.

⁴ Noto anyun age tugul ne iming’inegei ko u lakwani ming’in, ko o noto eng’ tugul eng’ bounatetab kipsengwet.

⁵ Ak age tugul ne taachei lakwet agenge ne ming’in ne u ni eng’ kainennyu ko kataacha:

⁶ ago age tugul ne inachi age eng’ chu mengech che iyana, ko kaigai eng’ inendet kirooch kaatinnyi koitab bai ne o, ak kechoorji riretab nyanjet.

⁷ Bwa ng’ony amu kanagutik! Amu bwanei kanagutik iman; ago bwa eng’ chichoto bunu kanagutiet!

⁸ Ak ngonachin eung’ung’ anan keldang’ung’, itil ak iwirte: mie eng’ inye imong’ji sobondo i bo mugung’ anan i bo kelok kosiir itinye eunek aeng’ anan kelyek aeng’ ak kewirjin mat ne bo koigeny.

⁹ Ak ngonachin kondang’ung’, ibalu ak iwirte: mie eng’ inye imong’ji sobondo i bo kong’ak, kosiir itinye konyek aeng’ ak kewirjin Gehenna, oldab mat.

¹⁰ Orib si mosas age eng’ chu mengech; amu amwawok ale, keerei eng’ kipsengwet malaikaisiek kotugul togetab Baba ne mi kipsengwet.

¹¹ Amu kinyo Weritab chi kosor ne kiga kobet.

Kalewenet agobo kechiriet ne kigobet

¹² Olen nee okwek? Ngo tinyei chi kechirek bogol, ak kwo age kobetot, ko tos mabagaktoi chun tamanwogik sogol ak sogol, ak kwo tulonok, ak kocheng’at ne kaga betot?

¹³ Ak ngonyor, amwawok, iman, ale, Boiboitu agobo noto kosiir chun tamanwogik sogol ak sogol che ma betyo.

¹⁴ Agot ko u noto ma magetab Kwandang’wong’ ne mi kipsengwet, kolus age eng’ chu mengech.

Tuguk che kanyol keyachi bik che chalwogenjinech

¹⁵ Ak ngo chalwogenjin ne otupche, iwe, iborji lelutiennyi omi tuwai okwege: ngo kasin, ko kagogelun ne otupche.

¹⁶ Ago ngo magasin, imut agenge anan aeng’ alak, si kogimit ng’olyot age tugul eng’ kutuswekab baorinik aeng’ anan somok.

¹⁷ Ak ngo esio kogas ichek, imwachi kaniset: ak ngo esio kogas kaniset agine, ingoigei kipsagarin eng’ inye anan taagindetab aisurut.

¹⁸ Amwawok, iman, ale, Tuguk alak tugul che orate eng’ ng’ony keratei eng’ kipsengwet: ak tuguk alak tugul che otiachi eng’ ng’ony kitiachi eng’ kipsengwet.

Saet ne kisae koboto bik alak

¹⁹ Amwawok kogeny, ale, ngo chamnyechi aeng’u eng’ okwek eng’ ng’ony agobo kiy age tugul ne somei, koyachin Baba anyun ne mi kipsengwet.

²⁰ Amu ole katuiyechi aeng’u anan somok eng’ kainennyu, ami kwenunywa eng’ oloto.

Kit ne u nyoetab kaat eng’ bik, ak kalewenet agobo atwogindet ne matinyei kongoi

²¹ Kinyo anyun Petero, ak kolenji, Kiptaiyandani, chalwogenjina ne kitupche konyil ata, ak anyochini kaat? Agoi konyil tisab?

²² Kilenji Jesu, Mamwaun ale, konyil tisab; ago, agoi tamanwogik tisab konyil tisab.

²³ Noto anyun kiyanie bounatetab kipsengwet laitoriat anum, ne machei koiit tuguk koboto otwogikyik.

²⁴ Ak ye kingotoi koiit, kimutyi agenge, ne kibesen talentaisiek elfusiek taman.

²⁵ Ak amu kima kotinyei kiy ne yaaktae, kong’at kiptaiyandennyi kealda inendet, ak osotiondennyi, ak lagokyik, ak tugul che kitinyei, si koyaakta.

²⁶ Kiibutyi ng’ony anyun otwogindonoto kosa inendet, kole, Kiptaiyandani, kang’wa korok, si ayaagun tugul.

²⁷ Ak, kirirge kiptaiyatab otwogindonoto, kotiach inendet, ak konyochi kaat eng’ besendo.

²⁸ Ago kimanda otwogindonoto, ak konyor age ne kiboisiei tuwai, ne kibesen inendet denarisiek bogol: ak kinam inendet kaatit, ak kole, Yaakwa che kiibesena.

²⁹ Kiibutyi ng’ony anyun ne kiboisiei tuwai, kosom inendet, kole, Kang’wa korok, si ayaagun.

³⁰ Ak kima cham: ago kiwa kotoorji korgoret, agoi koyaak tugul che kiga besen.

³¹ Ak ye kingogeer anyun che kiboisiei tugul, tuguk che kagoyaagis, koarogenso mising’, ak kobwa komwachi kiptaiyandenywa tuguk tugul che kagoyaagis.

³² Yeityo koguur anyun kiptaiyandennyi inendet konyo, ak kolenji, Ee otwogindet ne kimegeiya, kianyoun kaat eng’ besenoto tugul, amu kiisoma:

³³ tos kima nyoljin aginye irire ne kiboisiei tuwai, ko u ye kiarirenen?

³⁴ Ak kinerech kiptaiyandennyi, ak konde inendet eunekab bik che birei, agoi koyaak tugul che kiga besen.

³⁵ U noto yaiywok agine Baba ne bo kipsengwet, ngo monyochi kaat age tugul eng’ mugulelwekwok ne otupche.