MATAYO 17 - BUKUIT NE TILIL

Waletab ge ne bo Jesu

¹ Ak kingobata betusiek lo komut Jesu Petero, ak Jakobo, ak Johana ng’etab kam, kolany tulwet ne koi koba uwak ichegei:

² ak kiwalak eng’ tainywa: ak kiiluu togennyi ko u asista, ak kileelagitu ngoroikyik ko u lapkeiyet.

³ Ak ogeero, kitook eng’ tainywa Musa ak Elija kong’alaljindos koboto inendet.

⁴ Ak kiwolji Petero Jesu, kolenji, Kiptaiyandani, mie eng’ achek amu kimi yu: ngichame, amuchi ateech eng’ oli keriosiek somok, neng’ung’ age, bo Musa age ak bo Elija age.

⁵ Kingota kong’alali, ogeero, kouur ichek boldet ne iluu: ak ogeero, kimong’une kutit boldet, kole, Ni ko Werinnyu, chamanennyu, abaibai mising’ eng’ inendet; ogas okwek inendet.

⁶ Ak ye kingogas alamalyet, kobutyo kot koit togochikwak ng’ony, koiyweis mising’.

⁷ Ak kinyo Jesu ak kotwa ichek kolenji, Ong’eetye, amoiyweisie.

⁸ Ak kingoyot met, ko ma keer chi, kobate Jesu inegei.

⁹ Ak kingota kochorugei eng’ tulwet, kong’at Jesu ichek, kolenji, Amomwachi chi kaborunonito, agoi tun kong’eet Weritab chi eng’ che kibek.

¹⁰ Ak kiteebe alamaluyennyi inendet, kole, Amu nee anyun si komwaei sirik kole, Nyonei Elija korok kondou?

¹¹ Ak kiwol Jesu kole, Iman indou Elija, ak koweech tuguk tugul:

¹² ago amwawok ale, kigonyo Elija, ak kima nai ichek inendet, ago kiyachi inendet kiy age tugul ne kimach. Agot ko u noto tun nyalili Weritab chi agine eng’ ichek.

¹³ Konai anyun alamalyet kole king’alaljin ichek agobo Johana Kabatisanindet.

Kisoobi werit ne amei iywek

¹⁴ Ak ye kingo kagobwa ole mi tuiyet, konyonji inendet chito, ak kogutung’ji, ak kole,

¹⁵ Kiptaiyandani, rirege werinnyu: amu amei iywek, ak nyalili mising’: amu ibutyin ma konyil che chang’, ak kobutyin beek konyil che chang’.

¹⁶ Ak koamutyi alamalyeng’ung’, ak ma imuch kosoob inendet.

¹⁷ Ak kiwol Jesu kole, Ee ibinda ne matinyei kayanet ak komaasat, atebye ak okwek kot kotianit? Amuitoi kot kotianit agobo okwek? Imutwa inendet.

¹⁸ Ak kiger kong’ Jesu oindet; ak komanda oindet eng’ inendet: ak kosob weroto koboch sainato.

¹⁹ Kibwanji anyun alamalyet Jesu eng’ taban, ak kole, Kalya si ma kimuch achek keon komanda?

²⁰ Ak kilenji, Amu kayaneng’wong’ ne ming’in: amu amwawok iman ale, Ndotinye kayanet ne te keswotab karadali, ta ngomwachi tulwoni olenji, Inakte ui olin; konaktoi; ta mami kiy ne maimugaksei eng’ okwek.

²¹ Ago mamandoi ne u ni kobate eng’ saet ak karugutetab ge.

Sib komwaei Jesu ne bo aeng’ kole meei

²² Ak ye kingota kobeniei ichek eng’ Galili, kolenji Jesu ichek, Kindoi Weritab chi eunekab bik;

²³ ak kobar ichek inendet, ak king’eet kogeny eng’ betutab somok. Kiarogenso anyun mising’.

Kogoitoi Jesu sekel agobo hekalut

²⁴ Ak ye kingo kagoit Kapernaum kobwanji Petero ichek che kitaachei kebebertab sekel, ak kole, Magonu konetindeng’wong’ kebebertab sekel?

²⁵ Ak kole, Ee. Ak ye kingowo go, kosib kong’alalji Jesu inendet kolenji, Ibwati nee, inye, Simon? Laitorinik che bo ng’ony, konyorune ng’o aisurut anan kodi? Eng’ werikwak anan eng’ toek?

²⁶ Ak ye kingomwa kole, Eng’ toek, kolenji Jesu inendet, Noto anyun itiogotin werik.

²⁷ Ago, si ma kinach ichek, iwe araraita, ak iwirji katet, ak njiriot ne kamong’ eng’ tai, inam; ak ye kaiyat kutinnyi, inyoru sekel: nam noto, ak igoite agobo ane ak inye.