MATAYO 13 - BUKUIT NE TILIL

Kalewenet agobo kolindet

¹ Kiwa Jesu betunoto komanda eng’ got, kwo kotebe ngegutab araraita.

² Ak kiiyumjigei inendet tuiyosiek che eechen, kolany moingetab beek anyun, ak koteb ng’ony: ak kitonone tuiyet komugul ngegut.

³ Ak kimwachi ichek tuguk che chang’ eng’ kalewenaik, kolenji, Ogeero, kiwa kolindet koleta;

⁴ ak kingota koletoi, kobutyi keswek alak tabandab oret, ak kibwa taritik koam:

⁵ ak kiibutyi alak ole mi koik, ole kima kotinyei ng’ung’unyek che chang’: ak kobityo ngunoto amu kima ko tia ng’ung’unyek.

⁶ Ak kingochor asista, komel; ak kiresyo amu kima kotinyei tigitik.

⁷ Ak kiibutyi alak katok; ak kobityo katok, ak kogiich:

⁸ ak kiibutyi alak ng’ung’unyek che miach, ak koiyo, alak bogol, alak tamanwogik lo, ak alak sosom.

⁹ Inendet ne tinyei itik che kastoi, kogas.

Kinetisie kalewenaik

¹⁰ Ak kibwa alamalyet, ak kolenji, Kalya si ing’alalji ichek eng’ kalewenaik?

¹¹ Ak kiwolji ichek kolenji, Kagegonok onai ung’otik che bo bounatetab kipsengwet, ago ma kigochi ichek.

¹² Amu age tugul ne tinyei, ko tun kigochin, si konyor che chang’ kosiir: ago age tugul ne matinyei, kerebe agot che katinyei.

¹³ Noto anyun ang’alaljini eng’ kalewanaik; amu nganda keertoi, ko mageerei kiy, ak kastoi, ama kasei kiy, anan koguiyo.

¹⁴ Ak isuldaat eng’ ichek maoinatetab Isaia, ne len, Eng’ kaset ogase, ago moguitosi agot kitigin; Ak eng’ keeret ogeere, ago mobestosi agot kitigin:

¹⁵ Amu kwalilenotin mugulelwekab bichu, Ak magastoi komie itikwak, Ak kiger ichek konyekwak; Si mageer eng’ konyekwak, Anan kogas eng’ itikwak, Anan koguiyo eng’ mugulelwekwak, Si koweek kogeny, Ak asoob ichek.

¹⁶ Ago boiboen konyekwok, amu keertoi; ak itikwok, amu kastoi.

¹⁷ Amu amwawok iman, ale, kimach maotik che chang’ ak bik che chang’ che bo imanda kogeer tuguk che ogeere, ago kima keer; ak kimach kogas ng’alek che ogase, ago kima kas.

Kit ne iboru kalewenet agobo kolindet

¹⁸ Ogas anyun okwek kalewenet ne bo kolindet.

¹⁹ Ye kasei chi age tugul ng’olyotab bounatet, ama iguiyo, konyo anyun inendet ne ya, ak korebe ne kaga kelechi muguleldanyi. Nito ne kigilechi tabandab oret.

²⁰ Ak inendet ne kigilechi ole mi koik, nito inendet ne kasei ng’olyot ak kotaach ngunoto eng’ boiboiyet;

²¹ ago matinyei tigitik inendet, ago tebyei ne matia; ak ye kanyo nyalilda anan usisiet agobo ng’olyot, kinach anyun ngunoto.

²² Ak inendet ne kigilechi ole mi katok, ko inendet ne kasei ng’olyot; ak kogiich ng’olyot kererwekab met che bo ng’ony, ak kaberberisiet ne bo magornatet, si mai.

²³ Ak inendet ne kigilechi ng’ung’unyek che miach, ko inendet ne kasei ng’olyot, ak koguiyo; ne yiei logoek iman, alak bogol, alak tamanwogik lo, alak sosom.

Kalewenet agobo chemulbainik

²⁴ Kiiborji kalewenet age kolenji, Kergei bounatetab kipsengwet ak chito ne kigolji keswek che miach mbarennyi:

²⁵ ago, ye kita koruitos bik, konyo bunyondennyi ak kogolji chemulbainik ole mi bek, ak kwo.

²⁶ Ago kingobit suswot, ak koi bek, kotook agichek chemulbainik.

²⁷ Ak kibwa otwogik che bo chitab got ak kolenji, Kiptaiyandani, kima igolji keswek che miach mbareng’ung’? Kibun ano anyun chemulbainik?

²⁸ Ak kilenji ichek, Kiyaei noto bunyot. Ak kilenji otwogik, Tos imache kebe kitutote?

²⁹ Ago kile, Achicha; si ma ye otuti chemulbainik, otutunde bek.

³⁰ Ingobityo tugul agoi kesisiet; ak eng’ betutab kesisiet amwachi kesik, alenji, Oyum korok chemulbainik, ak orat ratutik si obeel: ak oyumji chogennyu bek.

Kalewenaik agobo keswotab karadali ak mermerek

³¹ Kiiborji kalewenet age kolenji, Kergei bounatetab kipsengwet ak keswotab karadali, ne kiib chito ak kominji mbarennyi:

³² ne ming’in iman eng’ keswek tugul; ago ye kagoeet, ko o eng’ ngwek tugul, ak egu ketit, ne tebe taritik temenikyik.

³³ Kimwachi kalewenet age kolenji, Kergei bounatetab kipsengwet ak mermerek, che kinam kobogoriot, ak koburukto busiek che bo kitongok somok, agoi kogut tugul.

³⁴ Kimwachi Jesu tuiyosiek tuguchuto tugul eng’ kalewenaik; ak kima ng’alalji ichek ama eng’ kalewenet:

³⁵ si kosulda ne kiga mwa maotiot, kole, Ayate kutinnyu eng’ kalewenaik; Amwae tuguk che kigiuny koboch koga kelumda ng’ony.

Kiboru kalewenet agobo chemulbainik

³⁶ Kibagakta anyun tuiyosiek, ak kwo go: ak kibwanji alamalyennyi kolenji, Iboruech kalewenetab chemulbainikab mbaret.

³⁷ Ak kiwol kole, Inendet ne kileta keswek che miach ko Weritab chi;

³⁸ ak mbaret ko ng’ony; ak keswek che miach ko werik che bo bounatet; ak chemulbainik ko werikab inendet ne ya;

³⁹ ak bunyot ne kigolei choto ko oindet; ak kesisiet ko kagesunetab ng’ony; ak kesik ko malaikaisiek.

⁴⁰ Ko u ye kiyumi chemulbainik ak kebeel eng’ mat; egu ko u noto eng’ kagesunetab ng’ony.

⁴¹ Iyoktoi Weritab chi malaikaisiekyik, koba koyum komong’une bounatennyi tuguk tugul che inachi bich, ak ichek che yaei tengekto,

⁴² ak kowirji mat ne o: egu eng’ oloto kateeiyet ak nyeetab kelek.

⁴³ Iluu anyun che bo imanda ko u asista eng’ bounatetab Kwandanywa. Inendet ne tinyei itik, kogas.

Kalewenaik agobo kit ne bo magornatet, sonoiyat ne kararan, ak regereiywot ne kiname njirenik

⁴⁴ Kergei bounatetab kipsengwet ak kit ne bo magornatet ne ung’at eng’ mbar: ne kinyor chi, ak kouny; ak kwo kogasotegei koalda tugul che kitinyei, ak koale mbaranato.

⁴⁵ Kogeny, kergei bounatetab kipsengwet ak chemung’araiyat, ne cheng’ei sonoek che kororon:

⁴⁶ ak ye kingo kagonyor sonoiyat agenge ne bo alyet ne o, kwo koalda tugul che kitinyei; ak koale sonoiyandanato.

⁴⁷ Kogeny, kergei bounatetab kipsengwet ak regereiywot ne kiname njirenik, ne kigiwirji nyanjet, ak koyum alak tugul che terotin.

⁴⁸ Ak ye kingo kagonyi kochuut konyo ngegut; ak koteb ng’ony, koyumji che miach kitongok, ago kolakta che yaach.

⁴⁹ Egu ko u noto eng’ kagesunetab ng’ony: tun bwanei malaikaisiek, ak kobesio che yaachen eng’ kwenutab che bo imanda,

⁵⁰ ak kowirji mat ne o: egu eng’ oloto kateeiyet ak nyeetab kelek.

⁵¹ Kaoguiye tuguchuto tugul? Kolenji, Ee.

⁵² Ak kilenji ichek, Amu noto anyun, sirindet age tugul ne kiginet komie ng’alekab bounatetab kipsengwet, ko kergei ak chito ne bo got, ne inemu tuguk che leelach ak che bo keny, eng’ ole konore tugukyik che bo magornatet.

Keesioi Jesu eng’ Nasaret

⁵³ Ak ye kingo kagoges Jesu kalewenaichu, kwo eng’ oloto.

⁵⁴ Ak kiit emennyi ak konet ichek eng’ sunagoginywa, kot kokwong’io, kole, Kanyorune ano chichi ng’omnatoni, ak boisionichu kimen?

⁵⁵ Tos ma weritab musogindet nito? Magiguure kamet Maria? Ak werik che tupcho ko Jakobo, Josep, Simon, ak Judas?

⁵⁶ Ak chepkametwagik, ko magimi tugul ak ichek? Kinyorune ano anyun chichi tuguchuto tugul?

⁵⁷ Ak kiinach ichek ng’alekyik. Ago kilenji Jesu ichek, Mabetyin maotio teegisto, kobate eng’ emennyi, ak eng’ gonnyi.

⁵⁸ Ak kima yai boisionik che chang’ che bo kimnatet eng’ oloto amu bistoenywa.