MATAYO 12 - BUKUIT NE TILIL

Tuguk che nyolu keyai eng’ betutab sabato

¹ Eng’ betusiechoto kobun Jesu mbarenikab bek eng’ betutab sabato; ak kiamei rubet alamalyennyi, ak kitoi kobach mesisekab bek, koam.

² Ago ye kingogeer Parisaik, kolenji inendet, Keero, yaei alamalyeng’ung’ ne ma chamdaat eng’ ng’atutik keyai eng’ sabato.

³ Ago kilenji ichek, Tom osoman kit ne kiyai Daudi ye kiamei rubo, ak che kimi ak inendet:

⁴ ye kingwo gotab Jehovah, ak koam makatinikab kabartaet, che kima ko chamdaat eng’ ng’atutik koam inendet, agot che kimi koboto inendet, kobate tisiik ichegei?

⁵ Anan tom osoman eng’ Ng’atutik, kele, ing’waniti tisiik sabato eng’ betutab sabato eng’ hekalut, ama kiityin ichek tengekto?

⁶ Ago amwawok ale, mi eng’ oli ne o kosiir hekalut.

⁷ Ago ngo kionai ole teptoi ni, Amache rirenetab ge, mamache tiseiywo, ta kama ogikyini che matinyei tengek.

⁸ Amu kiptaiyat ne bo sabato Weritab chi.

Kisoobi chi ne resot eut

⁹ Ak kiwa eng’ oloto, agoi sunagoginywa orit:

¹⁰ ak ogeero, kimi chi ne resot eut. Ak kiteebe ichek inendet, kolenji, Tos chamdaat eng’ ng’atutik kisoob chi eng’ betutab sabato? Si kobiit kong’ach inendet.

¹¹ Ak kilenji ichek, Ngoro chi eng’ okwek, ne tinyei kechiriet agenge, ak ngot kororokyi keringet betutab sabato, ko tos masutu komong’?

¹² Siirtoot anyun ne tia chito eng’ kechiriet! Noto anyun, chamdaat keyai ne mie eng’ betutab sabato.

¹³ Kimwachi anyun chito kolenji, Iite eung’ung’. Ak kiito: ak kosob, koigei eut nin age.

Kocheng’ei bik ole bartoi Jesu

¹⁴ Ago kimanda anyun Parisaik, ak koruoch agobo inendet, ole bartoi.

¹⁵ Ak kingonai Jesu, kwo eng’ oloto: ak kiisub inendet che chang’; ak kiisoob ichek tugul,

¹⁶ ak king’at ichek kole, si maibarta inendet:

¹⁷ si kosulda ne kiga mwa maotiot Isaia, kole,

¹⁸ Ogeero, otwogindennyu ne kialewen; Chamanennyu ne baibai sobondanyu eng’ inendet: Andoi inendet Tamirmiriennyu, Si komwachi Bororiosiek kiruoget.

¹⁹ Matiitos, anan kobol; Ama kasei chi kutinnyi eng’ ortinwekab nganaset.

²⁰ Mairiei tegat ne chisot, Ama imisi inendet kitambit ne iyeni, Kot koyokto kiruoget ne iterterisie.

²¹ Ak imang’u Bororiosiek kainennyi.

Kowolu Jesu kataamset ne kigimwa kele boisiei koboto setani

²² Kigimutyi anyun chito ne kitinyei oindet, ne korat ak ko namat kut: ak kiisoob inendet, kot kong’alal ak kogeerto chito ne namat kut.

²³ Kokwong’io anyun tuiyosiek tugul, ak kole, Tos weritab Daudi nito?

²⁴ Ago kingogas Parisaik, kole, Maonei chichi oik, kobate eng’ Beelsebul ne o ne bo oik.

²⁵ Ak kingonai inendet kabwatutikwak kolenji, Ng’emaksei bororiet age tugul ne pchegei; ama tononi nganaset anan got age tugul ne pchegei:

²⁶ ak ngo on Setani Setani, ko kapcheigei inegei; tonondoi ano anyun bororiennyi?

²⁷ Ak ndaone oik eng’ Beelsebul, koonei eng’ ng’o werikwok? Noto anyun egu ichek che iruokwok.

²⁸ Ago ngaone oik eng’ Tamirmirietab Jehovah, ko kagoitwak anyun bounatetab Jehovah.

²⁹ Anan imuktoi ano kwo chi gotab chito ne kim, si korebe tugukyik ngot ko ma rat korok chito ne kim? Si kouur anyun gonnyi.

³⁰ Inendet ne magimi tuwai kogirindaa; ak inendet ne magiyumi tuwai koiyestooti.

³¹ Noto anyun amwawok ale, Kinyochin kaat bik tengekto age tugul ak ng’olyot age tugul ne ya, ago che mwaei ng’olyo ne ya agobo Tamirmiriet, ko maginyochin kaat.

³² Ak age tugul ne mwaitoe yaitio Weritab chi, kenyochin kaat; ago age tugul ne mwaitoe yaitio Tamirmiriet, ko maginyochin kaat, agot eng’ ng’onyuni anan eng’ noto nyonei.

³³ Anan oyai ketit komieit, ak logoekyik; anan oyai ketit koyait, ak logoekyik; amu kinae ketit logoekyik.

³⁴ Okwek lagokab erenok che ng’wonen, omuktoi ano okwek, che o yaach, omwa tuguk che miach? Amu ng’alali kutit che nyiitat muguleldo.

³⁵ Ibune chi ne mie tuguk che miach konoruennyi ne mie: ak ibune chi ne ya tuguk che yaach konoruennyi ne ya.

³⁶ Ak amwawok ale, ng’olyot age tugul ne bo buch ne mwaei bik, ko tun tetu tuguchoto eng’ betutab kiruoget.

³⁷ Amu kiityinin imanda eng’ ng’aleguk, ak kigikyinin eng’ ng’aleguk.

Koesioi Jesu kobor kaborunet

³⁸ Kiwolji anyun alak che bo sirik ak Parisaik, kolenji, Konetindoni, kimache kegeer kaborunet ne iboruech.

³⁹ Ago kiwolji kolenji, Ibinda ne ya ne bo ibetab ge ne cheng’ei kaborunet; ak magigochin kaborunet kobate kaborunetab maotiot Jona:

⁴⁰ amu ko u ye kimi Jona betusiek somok ak kemousiek somok moetab njiriot ne o mising’: ko u noto tun tebe Weritab chi betusiek somok ak kemousiek somok eng’ muguleldo ne bo ng’ony.

⁴¹ Tun tonondos murenik che bo Ninebe koboto ibini eng’ kiruoget, ak kogikyi: amu kisik eng’ mwaitaet ne bo Jona; ak ogeero, mi yu ne o kosiir Jona.

⁴² Ng’eetei tun laitoriat kobogoriot ne bo murot komostab tai koboto ibini eng’ kiruoget, ak kogikyi: amu kibun tabanwekab ng’ony si kogas ng’omnatetab Solomon; ak ogeero, mi yu ne o kosiir Solomon.

Kanyol keripge agobo tililindo ne ma nyiitat

⁴³ Ago ye kagomong’une chi tamirmiriet ne muruon, kwo kobunot oldinwek che yaamnyotin, kocheng’oti ole imuung’e, amanyor.

⁴⁴ Yeityo komwa kole, Kaweekyigei gonnyu ole kiamong’une: ak ye kingonyo, konyor ko mami kiy, ak kobugot, ak ko chobot.

⁴⁵ Kwo anyun komut tamirmirik alak tisab che yaach kosiir inendet, ak kochut ak komeny oloto: ak eng’ let koyaitu atebetab chichoto kosiir ne ki bo tai. Egu ko u noto agine eng’ ibini ya.

Tupchonatet ne bo iman

⁴⁶ Kingota kong’alaljin tuiyosiek, ogeero, kitonondos eng’ sang’ kamet ak che tupcho, kocheng’ei kong’alalji inendet.

⁴⁷ Ak kimwachi anyun chito age kolenji, Keero, tononi eng’ sang’ komet ak che otupche, cheng’ei kong’alalun.

⁴⁸ Ago kiwolji chito ne kimwachin inendet, kolenji, Ng’o kamennyu ak che kitupche?

⁴⁹ Ak koiito eunnyi kotokyi alamalyennyi, ak kole, Ogeero, chu kamennyu ak che kitupche!

⁵⁰ Amu age tugul ne yaei magetab Baba ne mi kipsengwet, noto werit ne kitupche ak chepto ne kitupche, ak kamennyu.