MATAYO 11 - BUKUIT NE TILIL

¹ Ak ye kingo kagong’at Jesu alamalyennyi taman ak aeng’ koges, kwo eng’ oloto konetisiot ak koamdoi eng’ nganasokwak.

Johana kabatisanindet

² Ak kingogas Johana eng’ korgoret boisiosiek che bo Kristo, koyoktae alamalyennyi aeng’ ng’olyo,

³ ak koteebe inendet kole, Tos i inendet ne nyonei, anan kiganye age?

⁴ Ak kiwolji Jesu kolenji, Oba bandang’wong’, ak omwachi Johana tuguk che ogase ak che ogeere:

⁵ keertoi che koriotin, ak kobendoti che solomonik, kitilili che amei mogondosik, ak kastoi che ming’otin, ak king’eeti che kigobek, ak keamjin kibananok logoiywek che miach.

⁶ Ak baibai age tugul ne manyorunena kanagut eng’ ui tugul.

⁷ Ak ye kita kobendi chu bandanywa, kotoi Jesu komwachi tuiyosiek agobo Johana kolenji, Kiomande surkwen ogeer nee? Tegat ne itumdumi usonet?

⁸ Kiomande ogeer nee? Chito ne ilaachi ngoroik che tangusen? Ogeero, ichek che ilaachi ngoroik che tangusen komi gorikab laitorinik.

⁹ Ago kilya si omande? Si kobiit ogeer maotiot? Ee, amwawok ale, siirei inendet maotiot.

¹⁰ Nito ko inendet, ne kigisir kele, Keero, ayoktoi kiboitiondennyu kondoenen, Ne chobei oreng’ung’ eng’ taing’ung’.

¹¹ Amwawok, iman, ale, Tom kobiit ne siirei Johana Kabatisanindet eng’ che kisich kobogorisiek: ago inendet ne ming’in mising’ eng’ bounatetab kipsengwet ko o kosiir inendet.

¹² Ak koboch betusiek che bo Johana Kabatisanindet agoi nguno koruachin bik bounatetab kipsengwet, ak namei bik che koromen eng’ kimnatet.

¹³ Amu kimaotenso maotik tugul ak Ng’atutik agoi koit betusiekab Johana.

¹⁴ Ak ngochame otaach ko u noto, ko Elija nito, ne nyonei.

¹⁵ Inendet ne tinyei itik che kastoe, kogas.

¹⁶ Ago aroge nee ibini? Kergei ak lagok che tebyei eng’ oldinwekab aldaisiet, che kuurei siritoikwak,

¹⁷ ak kole, Kigeguutwak ndurerusiek, ak kima oureren; kigiteeye ak kima oririe.

¹⁸ Amu kinyo Johana ak kima amis anan koeeiso, ak kole bik, Tinyei oindet.

¹⁹ Kinyo Weritab chi koamis ak koeeiso, ak kole bik, Ogeero, chito ne kipkeiya, ak eeindetab divaik, choruetab taagikab aisurut ak kiptengeginik. Ak naat ng’omnatet kele bo iman eng’ boisionikyik.

Bwa eng’ nganasok che maiyan

²⁰ Kitoi anyun koger kong’ nganasok che kigiyae boisionikyik che bo kamuktaet, che chang’ kosiir, amu kima sik.

²¹ Bwa we, Korasin! Bwa we, Betsaida! Amu nda kiga kiyai eng’ Turo ak Sidon boisionik che bo kamuktaet che kigiyai eng’ okwek, ta kiga kosik keny, kolaach kuniok ak koiilegei orek.

²² Ago amwawok ale, kaigaitu tun Turo ak Sidon eng’ betutab kiruoget, kosiirok.

²³ Ak inye, Kapernaum, ko tos kitororin agoi kipsengwet? Ichortoige agoi oldab che kigobek: amu nda kiga kiyai eng’ Sodom boisionik che bo kamuktaet che kigiyai eng’ inye, ko ta mi agoi rani.

²⁴ Ago amwawok ale, tun kaigaitu emetab Sodom eng’ betutab kiruoget, kosiirin.

Kaguiyet ne u bo manyurunik

²⁵ Eng’ betusiechoto kowol Jesu kole, Amwaun kongoi, we Baba, Kiptaiyatab kipsengwet ak ng’ony, amu kiiung’e tuguchu che ng’omen ak che iguitos, ak kiing’ang’ji manyurunik:

²⁶ ee, Baba, amu kiicham inye ko u noto.

Boisiet ne kigiyogune Jesu

²⁷ Kigogona tuguk tugul Baba: ama mi ne ingen Werit, kobate Kwanda; ama mi ne ingen Kwanda kobate Werit, ak chi age tugul ne chamei Werit kong’ang’jin.

²⁸ Obwanja, okwek tugul che oiimige, ak che olae tuguk che nyigisen, si amuung’wok.

²⁹ Otiiny kaat choginnyu ak onetenage; amu a tala ak aming’inige eng’ muguleldo: si osich kamuung’et eng’ sobonwekwok.

³⁰ Amu nyamnyum choginnyu, ak wisis milennyu.