MATAYO 10 - BUKUIT NE TILIL

Alamalyet ne bo bik taman ak aeng’, ak boisienywa

¹ Ak kiguur alamalyennyi taman ak aeng’ kobwanji inendet, ak kogochi kimnatet si koon tamirmirik che muruonen, ak kosoob che miandos eng’ koroito age tugul ak eng’ nyalulnatet age tugul.

² Chu kainaik che bo che kiyoktoi taman ak aeng’: Ne bo tai ko Simon ne kiguure Petero, ak Andrea ng’etab kamet; Jakobo weritab Sebedi, ak Johana ng’etab kamet;

³ Pilipu, ak Bartolamayo; Tomas, ak Matayo taagindetab aisurut; Jakobo weritab Alpayo, ak Tadayo;

⁴ Simon Kananindet, ak Judas Iskariot, ne king’wektoi inendet.

⁵ Kiiyokto Jesu chuto taman ak aeng’, ak kong’at ichek, kolenji, Amobe oret age tugul ne bo Bororiosiek, amobe nganaset age tugul ne bo bikab Samaria:

⁶ ago kaigai obe ole mi kechirek che betyotin che bo gotab Israel.

⁷ Ak ye obendi, oamde ole, Kagorik bounatetab kipsengwet.

⁸ Osoob che miandos, ong’eet che kigobek, otilil che tinyei mogondosik, oon oik: kaonyoru buch, ogoite buch.

⁹ Amocheng’jige tahabu, anan feda, anan senteisiek eng’ lolotinwekwok;

¹⁰ anan lolet ne bo oret, anan sumotik aeng’, anan kweonik, anan kirokto: amu nyoljin kiboitiot amitwogikyik.

¹¹ Ak ocheng’ chito ne nyolu eng’ nganaset age tugul, ne o anan ne ming’in, ne omong’jini; si otebe oloto agoi obe.

¹² Ak ye obe go, ogat.

¹³ Ak ngo nyolu goyoto, ongotebe kalyeng’wong’: ago ngo ma nyolu, ko ingoweekyogei kalyeng’wong’.

¹⁴ Ak age tugul ne mataachok, anan kogas ng’alekwok, ko ye omande eng’ goyoto anan nganasanato, olelekte temburiek eng’ kelyekwok.

¹⁵ Amwawok, iman, ale, Kaigaitu emetab Sodom ak Gomora eng’ betutab kiruoget kosiir nganasanato.

¹⁶ Ogeero, ayoktook ko u kechirek eng’ kwenutab suik: noto anyun ong’omegitu ko u erenok, ak otaloitu ko u cheptugenik.

¹⁷ Ago oribege bik: amu imutyinok kapkiruoget, ak kobirenok kipcharitisiek eng’ sunagogisiekwak;

¹⁸ ak kimutyinok taitab bounik ak laitorinik agobo ane, si koek baornatet eng’ ichek ak eng’ Bororiosiek.

¹⁹ Ago ye igoitook, ko mogerer met agobo ole ong’alaldoi, ak kit ne omwae: amu kigonok eng’ sainato ne omwae.

²⁰ Amu ma okwek che ong’alali, ago Tamirmirietab Kwandang’wong’ ne ng’alali eng’ okwek.

²¹ Ak kong’wekta chito ng’etab kamet kong’wekyi meet, ak kong’wekta kwanda lakwennyi: ak kong’eetyi lagok sigikwak, ak kogoito kebar.

²² Ak kowechok bik tugul agobo kainennyu: ago inendet ne muitoi agoi kagesunet kesoru.

²³ Ago ye usok eng’ nganasani omwechi age: amu amwawok iman ale, Mobendi ogesu nganasok che bo Israel, ama it Weritab chi.

²⁴ Masiirei ne kineti, konetindennyi, ama siirei otwogindet kiptaiyandennyi.

²⁵ Yamei koteb ne kineti ko u konetindennyi, ak kotebi otwogindet ko u kiptaiyandennyi. Ak ngo kuure ichek Beelsebul chitab kobo got, kotam nee ichek che bo gonnyi!

²⁶ Moiywei ichek anyun amu noto: amu mami kiy ne tugot, ne matun king’anyei; ama mi kiy ne ung’at ne matun naoksei.

²⁷ Ne amwawok eng’ mesundeito, ong’alalde eng’ lapkeiyet: ak kit ne ogase eng’ itit, omwaite eng’ gorik barak.

²⁸ Amoiywei ichek che barei borto, ago maimuchi kobar sobondo: ago kaigai oiywei inendet ne imuchi kong’em sobondo koboto borto eng’ Gehenna.

²⁹ Magialdae taritik aeng’ che mengechen kebebertab taman ne bo denarit? Amaibutyin ng’ony agenge eng’ ichek ama chamji Kwandang’wong’:

³⁰ ago iitotin agot sumeek tugul che bo metowekwok.

³¹ Noto anyun amoiywei; osiire taritik che mengechen che chang’.

³² Noto anyun age tugul ne ibortoa eng’ taitab bik, abortoi agine eng’ taitab Baba ne mi kipsengwet.

³³ Ago age tugul ne esioa eng’ taitab bik, aesioi inendet agine eng’ taitab Baba ne mi kipsengwet.

³⁴ Molen kianyo aipchi ng’ony kalyet: kima anyo aipchi kalyet, ago rotwetab chok.

³⁵ Amu kianyo atoiye chi ak kwanda, ak chepto ak kamet, ak osotiotab werit ak kametab werit:

³⁶ egu bunikab chi bikyik.

³⁷ Inendet ne chamei kwanda anan kamet kosiira ko manyoljina; ak inendet ne chamei werit anan cheptanyi kosiira ko manyoljina.

³⁸ Ak inendet ne maibei kimurtoiyondennyi ak kosubwa, ko manyoljina.

³⁹ Inendet ne ribei sobondanyi kobeeti; ak inendet ne ibeeti sobondanyi agobo ane ko tun nyoru.

⁴⁰ Inendet ne taachok ko kataacha, ak inendet ne taacha ko kataach ne kiiyokwa.

⁴¹ Inendet ne taachei maotio eng’ kainetab maotio konyoru melektab maotio; ak inendet ne taachei chi ne bo iman eng’ kainetab chito ne bo iman konyoru melektab chito ne bo iman.

⁴² Ak age tugul ne igochin agenge eng’ chu mengechen kikombet ne bo beek che kaitit kityo eng’ kainetab alamalyet, amwawok, iman, ale, Mabetyin melektanyi matiny.