MARIKO 8 - BUKUIT NE TILIL

Kobae, Jesu bik elfusiek ang’wan

¹ Eng’ betusiechoto, ye kimi kogeny tuiyet ne o, ak kima kotinyei kiy ne amei, koguur Jesu alamalyennyi kobwa ole mi inendet, ak kolenji,

² Arire tuiyet, amu kagotebi kobota nguno betusiek somok, ama tinyei kiy ne amei:

³ ak ngot aunde koba oldanywa ama am kiy, kotanuitos eng’ oret; ak kibunu alak ole loo.

⁴ Ak kiwolji alamalyennyi kole, Imuchi konyorune ano chi makatinik eng’ emoni surkwen kobae bichu kot kobiyong’so?

⁵ Ak kiteebe ichek kolenji, Otinye makatinik ata? Ak kole, Tisab.

⁶ Ak king’at tuiyet kobuur: ak kinam makatinichoto tisab, ak kingo kagomwa kongoi, kobutul, ak kogochi alamalyennyi, si konde tainywa, ak kogochinot tuiyet.

⁷ Ak kitinyei njirenik che mengechen che ng’ering’: ak kingo kagoberur, kong’at konde choto agichek tainywa.

⁸ Kiamis anyun, kobiyong’so: ak kiiyum katuganik, ak kiyam mesendoik tisab.

⁹ Ak icheget ko ki olo bo elfusiek ang’wan: ak kiunda koba.

¹⁰ Ak yeityo anyun kolany moingetab beek koboto alamalyennyi, koba komoswekab Dalmanuta.

Kogerei kong’ Jesu alamalyet amu ma iguiyo komie

¹¹ Ak kibwa Parisaik, ak kotoi koteepse inendet, komage kaborunet ne bunu kipsengwet, kotiemei inendet,

¹² ak kiibus ne nyigis eng’ tamirmiriennyi, ak kole, Amu nee si kocheng’ei ibini kaborunet? Amwawok iman ale, Magoi kigochi ibini kaborunet.

¹³ Ak kibagakta ichek, ak kolany moingetab beek kogeny kolanda bitet age.

¹⁴ Ak kiutie ichek koib makatinik: kima kotinye kiy eng’ moinget kobate makatiat agenge kityo.

¹⁵ Ak kiitigon ichek, kolenji, Oripge, ak oribege mermerekab Parisaik ak mermerek che bo Herod.

¹⁶ Ak king’alaljingei ichegei, kolen, Magitinye makatinik.

¹⁷ Ak kingonai Jesu, kolenji, Kalya si oteebege, amu motinye makatinik? Tom onai, anan tom oguiye? Ta ko uuen mugulelwekwok?

¹⁸ Otinye konyek, amogeere kiy? Ak otinye itik, amogastoi? Amobwati?

¹⁹ Yu kingabutulji makatinik mut bik elfusiek mut, ko kitinye kerebonik ata katuganik che kigoyum? Kolenji inendet, Taman ak aeng’.

²⁰ Ak tisab eng’ bik elfusiek ang’wan, ko kinyi mesendoik ata katuganik che kigoyum? Ak kolenji, Tisab.

²¹ Ak kolenji ichek, Tom oguiye?

Kosoobi Jesu kipkoratiat eng’ Betsaida

²² Ak kiit anyun Betsaida. Ak kimutyi inendet chi ne korat, ak kosom kotwa inendet.

²³ Ak kinam eutab kipkoratiandanato, ak komut komandae nganaset; ak ye kingo kagong’utyi konyekyik, ak kogonoor eunekyik inendet, koteebe kole, Igeere kiy?

²⁴ Ak kiinyal barak, ak kole, Ageere bik; amu ageere ichek ko u ketik, kobendi.

²⁵ Yeityo kotwa eunekyik kogeny konyekyik; ak kiichiil konyek, ak kisob, ak kogeer tuguk tugul komie.

²⁶ Ak kiunda kwo ga, ak kolenji, Amewe nganaset agot kitigin.

Komwaei Petro kole Jesu ko Kristo

²⁷ Ak kiba anyun Jesu ak alamalyennyi agoi nganasok che bo Kaisaria Pilipi: ak kiteebe alamalyennyi eng’ oret, kolenji, Mwaei bik kole a ng’o?

²⁸ Ak kimwachi inendet kolenji, Len, i Johana Kabatisanindet: kolen alak, i Elija; ak len alak, i agenge ne bo maotik.

²⁹ Ak kiteebe icheget kole, Ago olen okwek a ng’o? Kowolji Petero kolenji, I Kristo.

³⁰ Ak king’at ichek kole, amat komwachi chi agobo inendet.

Sib komwaei Jesu agobo meenyi ak ng’eetyennyi

³¹ Ak kitoi konet ichek, kole, kanyol konyalil Weritab chi eng’ tuguk che chang’, ak koesio boisiek, ak tisiik che eechen, ak sirik ak kebar, ak ye igesgei betusiek somogu, kong’eet kogeny.

³² Ak kimwa ng’olyondonoto kotook. Ak kinam Petero inendet ak kotoi koger kong’.

³³ Ago kiwelelgei, ak kogeer alamalyennyi, ak koger kong’ Petero, ak kolenji, Ui let eng’ ane, Setani: amu mebwati tugukab Jehovah, ago tugukab bik.

Kanyol keesiege

³⁴ Kiguur anyun tuiyet koboto alamalyennyi kobwa ole mi inendet, ak kolenji ichek, Ngo machei chi age tugul kosubwa, koesiogei, ak kosut kimurtoiyondennyi, ak kosubwa.

³⁵ Amu age tugul ne machei kosor sobondanyi kobeeti; ak age tugul ne ibeeti sobondanyi agobo ane ak logoiywek che miach kosoru.

³⁶ Amu nyoru borot nee chi, ngonyor ng’ony komugul, ak kobeet sobondanyi?

³⁷ Amu igoitoi nee chi kowale sobondanyi?

³⁸ Amu age tugul ne ililani agobo ane koboto ng’alekyuk eng’ ibinita bo sokset ak tengek, ko tun ililanjin agine Weritab chi inendet, ye tun nyonei eng’ lilindab Kwandanyi koboto malaikaisiek che tililen.