MARIKO 5 - BUKUIT NE TILIL

Kisoobi chito ne mi emetab Gerasenik ne tinyei tamirmiriet ne muruon

¹ Ak kiit bitet age ne bo araraita, agoi emetab Gerasenik.

² Ak kingo kagolong’ eng’ moingetab beek, eng’ yoto anyun kotuiyo ak chito ne bunu oldab kererisiek ne tinyei tamirmiriet ne muruon,

³ ne kimenyei oldab kererisiek: ak kima komi chi ne kita komuchi korat inendet, agot eng’ sirimdo;

⁴ amu kiga kerate inendet mugurek ak sirimwek konyil che chang’, ak king’etyei sirimwek ak kotonaton mugurek: ak kima komi chi ne kiimuchi koboi inendet.

⁵ Ak kiwaagoti betusiek tugul, kemoi ak bet, eng’ kererisiek ak tulonok, ak kotilegei koik.

⁶ Ak kingogeer Jesu eng’ ye loo, kolabat ole mi ak kogutung’ji inendet;

⁷ ak kowaach eng’ kutit ne o, kole, Ating’enen nee inye, Jesu, Weritab Jehovah ne Toror Mising’? Ayosieun eng’ Jehovah, ale, amenyalila.

⁸ Amu kilenji inendet, Mong’une chichi, inye tamirmiriet ne muruon.

⁹ Ak kiteebe inendet, kolenji, Kiguurenen nee? Ak kilenji inendet, Kainennyu ko Chang’indo; amu ki chang’.

¹⁰ Ak kisom inendet mising’ kole, ama on komanda eng’ emonoto.

¹¹ Ak kimi tegeiyatab tulwet akwet ne o ne bo torok che kiagetos.

¹² Ak kisom kolenji, Chamwech kechut torok.

¹³ Kichamji anyun. Ak kimanda tamirmirik che muruonen koba kochut torok: ak kiruai akwet kochortaegei chemng’esut koba araraita; ki olo bo elfusiek aeng’ torochoto; ak kibekyi araraita.

¹⁴ Ak kimwei anyun che kiiyagi, komwaita eng’ nganaset ak eng’ emet. Ak kibwa anyun kogeer kit ne kagoyaak.

¹⁵ Kibwa ole mi Jesu, ak kogeer inendet ne kiga konam oik, kotebyei ko kagolaach ngoroik, ko kagong’omit, inendet ne kitinyei chang’indab oik: ak kiiyweis bichoto.

¹⁶ Ak kimwachi ichek che kigeerei, tuguk che kayaak eng’ inendet ne kiga konam oik, ak ole katepto torok.

¹⁷ Ak kitoi kogaigai inendet kole kwo eng’ kiwotosiekwak.

¹⁸ Ak kingota kolanyei moingetab beek, kogaigai inendet ne kiga konam oik kole, kotebi tuwai.

¹⁹ Ago kima chamji, ago kilenji, Ui gong’ung’ ole mi choronoguk, ak iborji tuguk che eechen che kagoyaun Kiptaiyat, ak ko u ye kagorirenen.

²⁰ Ak kinam bandanyi anyun, ak kotoi koamda eng’ Dekapoli tuguk che eechen che kayachi Jesu inendet: ak kikwong’io bik tugul.

King’eeti cheptab, ak kisoobi kobogoriot ne kimandae korotik

²¹ Ak ye kingo kagolanda Jesu kogeny eng’ moinget kwo bitonin, koyumjigei inendet tuiyet ne o: ak ki negite araraita.

²² Ak kinyo age eng’ bounikab sunagogit, ne kiguure Jairo; ak kingab kageer, kobutyi kelyekyik,

²³ ak kisom inendet mising’, kolenji, Negit kome cheptanyu ne ming’in: nyo igonoor inendet euneguk, si kosob ak kotebi kochamegei.

²⁴ Ak kiba koboto inendet; ak kiisub inendet tuiyet ne o, ak kiigiich inendet.

²⁵ Kimi kobogoriot age ne kimandae korotik kenyisiek taman ak aeng’,

²⁶ ak kiga konyalil eng’ tuguk che chang’ agobo chepkerichinik che chang’, ak kiga kogoito tugukyik tugul che kitinyei, ama toret kiy, ago kitesak miando koyait,

²⁷ ak kingogas agobo Jesu, kobwa ak tuiyet ne kimi let, ak kotwa ngoriennyi.

²⁸ Amu kile, Ngatwa agot ngoroikyik, kisooba.

²⁹ Yeityo anyun kosis ole kabunu korotik; ak kigas eng’ bortanyi kole, kagisoob eng’ koroitanyi.

³⁰ Ak ngunoto anyun, kingo kagonai Jesu inegei kole, kagomong’une kimnatet, kowelelgei eng’ tuiyet, ak kole, Ng’o ne katwa ngoroikyuk?

³¹ Ak kilenji alamalyuennyi inendet, Igeere ko kaigiichin tuiyet, ak ilen, Ng’o ne katwaa?

³² Ak kigusgong’ si kobiit kogeer kobogoriondonoto kayai kioto.

³³ Ago kinyo kobogoriondonoto ak kobutyi tainnyi, koiyweisiei ak kobotani, ko kagonai kit ne kageyachi, ak komwachi ng’alek tugul che bo iman.

³⁴ Ak kilenji inendet, Chebi, kagosoobin kayaneng’ung’; ui eng’ kalyet, ak isob eng’ miandang’ung’.

³⁵ Kingota kong’alali inendet, kobwa bik che bunu oldab bounindet ne bo sunagogit, ak kole, Kagome cheptang’ung’: kata iimji nee Konetindet?

³⁶ Ago ma mage kiy Jesu ng’olyot ne kagimwa, kolenji bounindetab sunagogit, Ameiywei, iyan kityo.

³⁷ Ak ma chamji chi kosub inendet kobate Petero, ak Jakobo, ak Johana ng’etab kametab Jakobo.

³⁸ Kiit anyun gotab bounindetab sunagogit; ak kigeer bik che sololendos, koboto che rirtos ak koteeitos mising’.

³⁹ Ak ye kingo kakwa go, kolenji bichoto, Kalya si owasege ak orirtosi? Ma me lakwet, ago inuuchi.

⁴⁰ Ak kirorechi inendet kochot. Ago ye kingo kagoon inendet bichoto tugul koba sang’, komut kwandab lakwet ak kamet koboto che kimi ak inendet, ak kwo go ole mi lakwet.

⁴¹ Ak ye kingo kagonam eutab lakwet, kolenji, Talita kumi; ye kiweech ko, Chebi, amwaun ale, Ng’eet.

⁴² Yeityo kong’eet cheboto, ak kowendot; amu ki bo kenyisiek taman ak aeng’. Eng’ yoto anyun kokwong’io eng’ kwong’et ne o.

⁴³ Ak king’at ichek mising’ kole, amat konai chi ng’olyondonito: ak king’at kigochi tuguk che amei.