MARIKO 4 - BUKUIT NE TILIL

Kalewenet agobo letaindet

¹ Ak kitoi kogeny konetis eng’ tabandab araraita. Ak kiiyumjigei inendet tuiyet ne o mising’, kot kolany moingetab beek, kotebe araraita; ak kotebe tuiyet tugul ngegutab araraita.

² Ak kiinet ichek tuguk che chang’ eng’ kalewenaik, ak kilenji ichek eng’ konetisiennyi,

³ Oeb it: ogeero, kiwa letaindet koletais:

⁴ ak kingoleta, kobutyi keswek alak oret taban, ak kibwa taritik koam.

⁵ Ak kiibutyi alage ole mi koik, ole kima ko tia ng’ung’unyek; ak kibityo anyun, kochok, amu ng’ering’ ng’ung’unyek:

⁶ ak kingochor asista, komel; ak kiyaamnyo, amu kima kotinyei tigitik.

⁷ Ak kiibutyi alage kole mi katok, ak kibityo katok, ak kogiich, si maiiyo logoek.

⁸ Ak kiibutyi alage ng’ung’unyek che miach, ak koiiyo logoek, ak koeegitu ak kotesak; ak kiiyo sosom, ak tamanwogik lo, ak bogol.

⁹ Ak kimwa kole, Ne tinyei itik che kastoe, kogas.

¹⁰ Ak ye kimi inegei, koteebe inendet agobo kalewenaichoto, icheget che kigaiyiem inendet koboto taman ak aeng’.

¹¹ Ak kilenji, Kagegonok okwek onai ung’otiet ne bo bounatetab Jehovah: ago ichek che mitei sang’, keyachin tuguk tugul eng’ kalewenaik:

¹² si eng’ keeret kogeerei, ama ibestos; ak eng’ kaset kogasei, ama iguitos; si maweek, ak kenyochi kaat.

¹³ Ak kilenji ichek, Tos mongen okwek kalewenoni? Onaitoi ano kalewenaik tugul?

¹⁴ Letoi letaindet ng’olyot.

¹⁵ Ak chuto che mitei tabandab oret, ole kiletae ng’olyot; ak ye kagogas, konyo ngunoto Setani, ak konem ng’olyot ne kagogolji icheget.

¹⁶ Ak chu agichek ko choto che kagilechi ole mi koik, ak ye kagogas ng’olyot, konam ngunoto eng’ boiboindo;

¹⁷ matinyei choto tigitik, ak tebyei eng’ betusiek che matia, ak, ye ng’eet nyalilda anan usisiet agobo ng’olyot, ngunoto anyun kinach.

¹⁸ Ak alak che kagilechi ole mi katok; choto ko icheget che kagogas ng’olyot,

¹⁹ ak kogiich ng’olyot kaiimutikab ng’ony, ak kaberberisiet ne bo magornatet, ak magutik che bo tuguk alak che bwanei, si mai logoek.

²⁰ Ak choto che kagilechi ng’ung’unyek che miach; ko icheget che kasei ng’olyot, ak kotaach, ak koiiyo logoek, sosom, ak tamanwogik lo, ak bogol.

Konetisiosiek agobo tait, ak agobo kaswek

²¹ Ak kolenji ichek, Tos kiibu tait si kinde kitonget orit, anan kureretab itogut, ama kindoi kit ne tonone?

²² Amu mami kiy ne keunyei, ne matun ng’ang’aksei; ng’olyo ne bo ung’ot, ne matun toogu.

²³ Ngo tinyei chi itik che kastoe, kogas.

²⁴ Ak kimwachi ichek kolenji, Oribege tuguk che ogase: kerutiet ne ogere ko tun kegerunenok noto: ak keteswok alak.

²⁵ Amu inendet ne tinyei, kigochin: ak inendet ne matinyei, keibe agot che tinyei.

²⁶ Ak kile, U noto bounatetab Jehovah, u chito ne iserjin keswek ng’ony.

²⁷ Ak koru ak kong’eet kemoi ak bet, ak kobityo keswek ak koeegitu, amaingen ole bititoi.

²⁸ Yiei ng’ony inegei; indou suswot, yeityo konyo metit, yeityo koiywa bek.

²⁹ Ago ye kagorurio bek, eng’ yoto anyun koib chepkeswet, amu kait kesisiet.

³⁰ Ak kile, Kiroge nee bounatetab Jehovah? Anan nee kalewenet ne kibortoe?

³¹ Kergei ak keswotab karadali, ne, ye kageminji ng’ung’unyek, ko agot nganda ming’in eng’ keswek tugul che mi ng’ony,

³² ko ye kagemin, kobit koeet, kosiir ketik tugul che bo ngwek, ak kosamumit kot komuch kouure uruennyi taritikab barak.

³³ Ak kimwachi ng’olyot eng’ kalewenaik che chang’ che u choto, ko u ye kiimuchi kogas:

³⁴ Ak kima mwachi bichoto kiy ama eng’ kalewenet: ago kitetyi alamalyennyi ng’alek tugul komi taban ichegei.

Kogerei kong’ Jesu usonet

³⁵ Ak kingo kagoek koskoleny eng’ betunoto, kolenji ichek, Ongelande bitonin.

³⁶ Ak kingobagakta tuiyet, komut inendet, ko u ole kiteptoi, eng’ moingetab beek. Ak kimi moingonik alak che mengech koboto ne kibunei inendet.

³⁷ King’eet anyun usonet ne korom, ak korieb moinget beek che mildogei, kot komach konyi beek moinget.

³⁸ Ak kimi inendet moinget ole bo let, korue kit ne kitiie metit: kiing’eet anyun inendet, ak kolenji, Konetindoni, meitech ago kagibegu?

³⁹ Kong’eet anyun, ak koger kong’ usonet, ak kolenji araraita, Imutyon, sis. Kisis anyun usonet, ak komung’do anyun mising’.

⁴⁰ Ak kilenji ichek, Kalya si oiyweisie? Tom onyoru kayanet?

⁴¹ Ak kiiyweis mising’, ak kolenjigei ichegei, Ng’o nito, ne kase it inendet agot usonet ak araraita?