MARIKO 3 - BUKUIT NE TILIL

Kisoobi chi ne resot eut

¹ Ak kiwa sunagogit kogeny; ak kimi chito ne resot eut.

² Ak kirib ichek inendet, kole kogeer, ngo tos isoob chichoto eng’ betutab sabato; si kobiit komwaita.

³ Ak kilenji chito ne resot eut, Tonon eng’ kwen.

⁴ Ak kilenji ichek, Tos, chamdoi ng’atutik keyai ne mie eng’ betutab sabato, anan keyai ne ya? Kisoob chi, anan kebar? Ago kisisyo.

⁵ Ak ye kiga kogeerot komoswek tugul eng’ neregek, koarogen amu uuindab mugulelwekwak, kolenji chichoto, Chuul eung’ung’. Kichuul anyun: ak kisob eunnyi.

⁶ Ak kimanda sang’ Parisaik, ak ngunoto anyun kochob ng’alek ak Herodik agobo inendet, si konai ole bartoi.

Kisoobi bik alak

⁷ Kiitabangei Jesu ak alamalyennyi ak koba araraita; ak kiisub inendet tuiyet ne o ne kibunu Galili: ak ne kibunu Judea,

⁸ ak Jerusalem, ak Idumea, ak bitetab Jordan, ak komoswekab Turo ak Sidon, kibwanji inendet tuiyet ne o ye kingogas agobo tuguk che eechen che kiyai.

⁹ Ak kimwachi alamalyennyi kochob moinget ne ming’in ne bo beek, amu chang’indab bik, si machiil inendet:

¹⁰ amu kiga kosoob che chang’; kot koriich inendet tugul che kitinyei korotwek che yaachen, si kobiit kotwa inendet.

¹¹ Ak eng’ ui tugul ye kageer inendet tamirmirik che muruonen, kobutyi ng’ony eng’ tainnyi, ak koteiyo kole, Inye ko i Weritab Jehovah.

¹² Ak king’at ichek mising’ si mang’anda inendet.

Koleweni Jesu alamalyennyi taman ak aeng’

¹³ Ak kitogosta tulwet anyun, ak kiguurjigei che kimach: ak kiba ole mi inendet.

¹⁴ Ak kilewen taman ak aeng’, si kotebi ak inendet, si kobiit koyoktoi ichek koba amdaet,

¹⁵ ak konyor kimnatet ne one oik:

¹⁶ ak Simon ne kiigochi kainet age koguure Petero;

¹⁷ ak Jakobo weritab Sebedi, ak Johana ng’etab kametab Jakobo; kiigochi ichek kainet koguure Boanerges, ye kiweech kele, Weritab tulet:

¹⁸ ak Andrea, Pilipu, Bartolomayo, Matayo, Tomas, Jakobo ne bo gab Alpayo, ak Tadayo, ak Simon Kananindet,

¹⁹ ak Judas Iskariot, ne king’wektoi inendet.

Kowolu Jesu kataamset ne kigimwa kele boisiei koboto setani

²⁰ Ak kiiyumgei tuiyet kogeny kot ko mata komuch agot koamis.

²¹ Ak ye kingogas choronokyik, koba konam inendet: amu kimwa kole, Kagobet met.

²² Ak kimwa sirik che kichorunegei Jerusalem, kole, Tinyei inendet Beelsebul, ak, Onei oik eng’ kimnatetab ne o ne bo oik.

²³ Ak kiguur ichek kobwa ye mi, ak kolenji eng’ kalewenaik, Imuktoi ano Setani koon Setani?

²⁴ Ak ngo pcheak bororiet inegei, ko maimuchi bororionoto kotonon.

²⁵ Ak ngo pcheak got inegei, ko maimuchi goyoto kotonon.

²⁶ Ak ngo ng’eet Setani koboriegei inegei ak ngo pcheak inegei, ko maimuchi kotonon, ago tinyei ole igesyingei.

²⁷ Ago maimuchi chi kwo got orit ne bo chito ne kim, ak korebe tugukyik, ngot ko ma rat korok chichoto kim; si kouur gonnyi anyun.

²⁸ Amwawok iman ale, Kinyochin kaat werikab bik tengekwogikwak tugul, ak ng’alek alak tugul che yaachen che mwaei:

²⁹ Ago age tugul ne chubei Tamirmiriet ne Tilil ko magoi kinyochi kaat koigeny, ago tinyei ng’ogisto ne bo koigeny:

³⁰ amu kimwa kole, Tinyei inendet tamirmiriet ne muruon.

Tupchonatet ne bo iman

³¹ Kibwa anyun kamet ak che tupcho; ak kotononso eng’ sang’, ak kigiyokto keguur inendet.

³² Ak kitebyei tuiyet ko kayiem inendet; ak kilenji, Keero, mi sang’ komet ak che otupche kocheng’in.

³³ Ak kiwolji ichek, kolenji, Ng’o kamennyu ak che kitupche?

³⁴ Ak kigeerot che kayiem inendet, ak kolenji, Ogeero, kamennyu ak che kitupche!

³⁵ Amu chi age tugul ne yaei magetab Jehovah, noto werit ne kitupche, ak chepto ne kitupche, ak kamennyu.