MARIKO 2 - BUKUIT NE TILIL

Kisoobi chi ne tinyei miando ne meat borto

¹ Kingobata betusiek alage, komong’ji kogeny Kapernaum, ak kogas bik kole, mitei go.

² Ak kiiyumgei bik che chang’, kot ko ma ng’et boroindo, agot eng’ kurgat: ak komwachi ng’olyot.

³ Ak kibwa, komutu chito ne tinyei miando ne meat borto, konyo ole mi inendet, kolau bik ang’wanu.

⁴ Ago kingab mata komuch korikyi inendet amu tuiyet, kong’any got barak, kotokyi ole mi inendet: ak kingo kagobut, kochoortae itogut ne kirue chito ne tinyei miando ne meat borto.

⁵ Ak kingogeer Jesu kayanenywa, kolenji chito ne tinyei miando ne meat borto, Weri, kagenyoun kaat tengekwogiguk.

⁶ Ago kimitei oloto sirik alak che kitebyei, che kiibwati eng’ mugulelwekwak kolen,

⁷ Amu nee si komwaei chichi ko u ni? Mwaei ne ya: ng’o ne imuchi konyochi chi kaat tengekwogik kobate agenge, inendet Jehovah?

⁸ Ak eng’ yoto, konai Jesu eng’ tamirmiriennyi, kole, ibwati ko u noto ichegei, kolenji, Kalya si obwat tuguchu eng’ mugulelwekwok?

⁹ Nee ne nyamnyum, ngemwachi chito ne tinyei miando ne meat borto kele, Kaginyoun kaat tengekwogiguk; anan ngele, Ng’eet, ib itogung’ung’, ak iwendote?

¹⁰ Ago si onai ole, tinyei Weritab chi kimnatet eng’ ng’ony ne nyochin kaat amu tengekwogik (kolenji chito ne tinyei miando ne meat borto),

¹¹ Amwaun ale, Ng’eet, ib itogung’ung’, ak iwe gong’ung’.

¹² King’eet anyun, ak ngunoto koib itogunnyi, ak komanda eng’ taitab bik tugul; kot kokwong’io tugul, ak kolos Jehovah, kole, Tom kegeere ne u nito.

Kuurset ne kiguurei Lawi

¹³ Ak kiwa kogeny tabandab araraita; ak kibwa tuiyet komugul ye mi inendet, ak konet ichek.

¹⁴ Ak ye kisiirtoi, kogeer Lawi weritab Alpayo kotebyei eng’ ole kitaage aisurut, ak kolenji inendet, Isubwa. Ak king’eet ak kosub inendet.

¹⁵ Ak kingotebyei eng’ amisiet eng’ gonnyi, kotebi taagikab aisurut che chang’ ak kiptengeginik koboto Jesu ak alamalyennyi: amu kimi che chang’, ak kiisub inendet.

¹⁶ Ak kingogeer sirik che bo Parisaik koamisiei inendet koboto kiptengeginik ak taagikab aisurut, kolenji alamalyennyi, Lyon si koamisiei ak koeeisei inendet koboto taagikab aisurut ak kiptengeginik?

¹⁷ Ak ye kingogas Jesu, kolenji ichek, Mamachei che chamegei chepkerichot, kobate che miandos: kima anyo aguur che bo imanda, ago kiptengeginik.

Ng’olyotab karugutetab ge

¹⁸ Ak kiirugutegei alamalyetab Johana ak ne bo Parisaik: ak kibwa anyun kolenji inendet, Lyon si korugutegei alamalyetab Johana ak alamalyetab Parisaik ago mairugutegei alamalyeng’ung’?

¹⁹ Ak kilenji Jesu ichek, Imuktoi ano korugutgei che kogiguurjin katunisiet, ye ta komi sandet koboto icheget? Ko ta komi sandet koboto ichek, ko maimuchi korugutgei.

²⁰ Ago bwanei betusiek che keistoe sandet ichek, korugutgei anyun eng’ betunoto.

²¹ Mami chi ne napchin akwot ne leel ngoriet ne os, si magerer ne leel ne os, ak kotesak ole kagerer.

²² Ama mi chi ne indoi divaik che leelach lolotinwek che osen: amu ngo yai ko u noto, kogereri divaik lolotinwek, ak kobetyo koboto lolotinwek: ago kindoi divaik che leelach lolotinwek che leelach.

Ng’olyotab tuguk che nyolu keyai eng’ betutab sabato

²³ Ak ye kibunei mbarenikab bek eng’ betutab sabato, kotoi alamalyennyi kobagat mesisiekab bek.

²⁴ Ak kilenji Parisaik inendet, Keero, kalya si koyai eng’ betutab sabato kit ne etat eng’ ng’atutik?

²⁵ Ak kilenji icheget, Tos, kitom osoman kit ne kiyai Daudi, ye kima kotinyei kiy, ak kiamei rubo, inendet, ak che kimi koboto inendet?

²⁶ Ko u ye kiwa gotab Jehovah eng’ betusiek che bo tisiindet ne o Abiatar, ak koam makatinikab kabartaet, che etat eng’ ng’atutik kele, magiamei, kobate tisiik ichegei, ak kogochi che kimi koboto inendet agichek?

²⁷ Ak kilenji ichek, Kigiyai sabato agobo chi, kima kiyai chi agobo sabato:

²⁸ Kiek anyun Weritab chi kiptaiyat agot ne bo sabato.