MARIKO 16 - BUKUIT NE TILIL

Ng’eetyetab Jesu

¹ Ak kingo kagosiirto sabato koal Maria Magdalene, ak Maria kametab Jakobo, ak Salome, nyamdutik, si kobwa koiil inendet.

² Ak eng’ karon inne, eng’ betutab tai ne bo wigit, koit kererit ko kachor asista.

³ Ak kong’alaljigei ichegei kole, Mildaiywech ng’o koita eng’ kurgetab kererit?

⁴ Ak kingoyot met, kogeer ko kagemilda koita: amu ki o mising’.

⁵ Ak kingochut kererit, kogeer muren kotebyei eng’ komostab tai, ne ilaachi ngoriet ne leel; ak kikwong’io.

⁶ Ak kilenji ichek, Amokwong’ie: ocheng’e Jesu, Nasaretindet, ne kiga kigartat: kagong’eet; ma komi yu: ogeer ole kiga kinde inendet!

⁷ Ago, oba, omwachi alamalyennyi ak Petero, olenji, Kagondoenak kwo Galili: ogeere inendet eng’ oloto, ko u ye kiga komwawok.

⁸ Ak kimanda sang’ eng’ kererit, ak komwei; amu kiga botanso ak kokwong’io: ak ma mwachi chi kiy; amu kiiyweis. [

⁹ Ak kingong’eet Jesu anyun karon mising’ eng’ betutab tai ne bo wigit, kochunji korok Maria Magdalene, inendet ne kiga kocherune Jesu oik tisab.

¹⁰ Kiwa komwachi icheget che kimi koboto inendet, ye kita koarongendos ak korirtos.

¹¹ Ak kingogas ichek kole sobei, ak kole, kagogeer inendet chebiosonato, ko ma iyan.

¹² Ak kingobata tuguchu, kong’ang’jigei eng’ itondo age aeng’ eng’ ichek kobendi eng’ oret koret age.

¹³ Kiba anyun ak komwachi chun alak: ak kima iyan choto agichek.

¹⁴ Ak kingobata noto, kong’ang’jigei icheget taman ak aeng’ kotebyei eng’ amisiet; ak koger kong’ amu bistoenywa ak uuindab mugulelwekwak, amu kima iyan icheget che kigeer inendet ko kagong’eet.

¹⁵ Ak kilenji, Oba ng’ony komugul, oamjinote logoiywek che miach bik tugul.

¹⁶ Inendet ne iyani ak kibatisan kesoru; ago inendet ne maiyani ko tun kiruokyin.

¹⁷ Ak isubi kaborunoichu ichek che iyani: onei oik eng’ kainennyu; ak kong’alali ng’alalet ne leel;

¹⁸ namei erenok, ak ngo ee tuguk che barei bich, ko manyoru ng’wanindo matiny; igonoori eunekwak bik che miandos ak kosopcho.

¹⁹ Ye kingo kagong’alal ak icheget Kiptaiyat Jesu, kimut anyun inendet kwo kipsengwet, ak kotebe eutab tai ne bo Jehovah.

²⁰ Ak kiba anyun, koamdaat eng’ oldo tugul, kobois Kiptaiyat koboto ichek, ak kogimit ng’olyot eng’ kaborunoik che kiisuboti. Amen.]