MARIKO 15 - BUKUIT NE TILIL

Komi Jesu taitan Pilato, bounindet ne bo Rom

¹ Ak yeityo ko kaech kotet ng’alek tisiik che eechen koboto boisiek ak sirik, ak kapkiruoget komugul, ak korat Jesu, ak komut kwo, ak kogochi Pilato.

² Ak kiteebe Pilato kole, Tos i Laitoriatab Yahudik? Ak kiwolji kolenji, Kaimwa.

³ Ak kiitaam inendet tisiik che eechen eng’ tuguk che chang’.

⁴ Ak kiteebe Pilato kogeny, kole, Mewolu kiy? Keero tuguk che chang’ che kagotaamjin bichu.

⁵ Ago mata kowol ng’olyo Jesu, kot kokwong’ Pilato.

⁶ Kicham kotiakyin Pilato bik kimonjororiot agenge eng’ betutab igorta, ne kagosom ichek inendet.

⁷ Ak kimi chito age ne kigiguure Baraba, ne ki ratat koboto ichek che kichaamsei, icheget che kiga rumis eng’ chaamsonoto.

⁸ Kitogosta tuiyet ak kotoi kosom inendet koyachi ko u ye cham koyaei kotugul.

⁹ Ak kiwolji Pilato ichek, kolenji, Tos omache atiakwok Laitoriatab Yahudik?

¹⁰ Amu kiga nai kole, kiigoito tisiik che eechen inendet amu ng’etkong’.

¹¹ Ak kicheer tisiik che eechen tuiyet kole, kitiakyi Baraba.

¹² Ak kiwol Pilato kogeny kole, Aite nee anyun chichi oguure Laitoriatab Yahudik?

¹³ Ak kibolyo ichek kogeny, kole, Igartat inendet eng’ kimurtoiyot.

¹⁴ Ak kilenji Pilato ichek, Kalya, koyai yaitiet nee? Ago kibolyo ichek mising’ kole, Igartat inendet eng’ kimurtoiyot.

¹⁵ Ak kimach Pilato kobaibai tuiyet, kotiakyi anyun Baraba, ak kogoito Jesu, ko kagobire kipcharitit, si kobiit kigartat.

Kochotachoti askarik Jesu

¹⁶ Ak kiimut askarik inendet kwo kapkiruok orit, ne kiguure Praitorium; ak kiguur askarik tugul kobwa.

¹⁷ Ak kiilaakyi ngoriet ne arus ne birir, ak kila ngatietab katok, ak konde metinnyi;

¹⁸ ak kitoi kogat inendet kole, Kigatin, Laitoriatab Yahudik!

¹⁹ Ak kikwer metinnyi eng’ tegat, ak kosing’ilji, ak kogutuny kolos inendet.

²⁰ Ak kingo kagochotachot inendet, koreegune ngoriet ne arus ne birir, ak kolaakyi ngoroikyik. Ak kiimut kwo sang’ kogartat eng’ kimurtoiyot.

Kigartati Jesu

²¹ Ak kibirji chito ne kisiirtoi, Simon ne bo Kurene, kwandab Aleksandro ak Rupo, kobunu koret age, koib kimurtoiyotab Jesu.

²² Ak kimut inendet kwo oldo ne kiguure Golgota, ye kiweech kelen, Oldab terta.

²³ Ak kiigochi divaik che burugot ak tuguk che u igomoik: ago ma taach.

²⁴ Ak kogartat, ak kopchechigei ngoroikyik, ak koser barbarek, konai ne te ne ibei chi tugul.

²⁵ Ak kiigartat inendet, ko kaek sait somok.

²⁶ Ak kigisirji ng’alekab kataamset agobo inendet metinnyi barak kele, LAITORIAT NE BO YAHUDIK.

²⁷ Ak kiigartat rebik aeng’ koboto inendet; age eng’ eunnyi ne bo tai, ak age eng’ eunnyi ne bo katam.

²⁸ [Ak kiisulda anyun siret ne mwaei kole, Ak kigiit inendet koboto kiptengeginik.]

²⁹ Ak kichurochur che kisiirtoi, kolelegoti metowekwak, ak kolen, Haa! Inye ne ing’eme hekalut, ak iteech eng’ betusiek somok,

³⁰ soruge, ak ichoruge eng’ kimurtoiyot.

³¹ Ak kichurochur inendet ko u noto tisiik che eechen agichek, koboto sirik kole, Kigosor alak; maimuchi kosorgei.

³² Ingochorgei nguno Kristo, Laitoriatab Israel, eng’ kimurtoiyot, si kobiit kegeer ak kiyan. Ak kigengenie inendet agichek che kiga kigartat koboto inendet.

Meetab Jesu

³³ Ak kingoit sait lo, koimenit emet komugul agoi sait sogol.

³⁴ Ak eng’ sait sogol kotwek Jesu eng’ kutit ne o kole, Eloi, Eloi, lama sabaktani? Ye kiweech kelen, Jehovah nenyu, Jehovah nenyu, kebagakta amu nee?

³⁵ Ak kingogas alak eng’ che kitonondos eng’ ye negit, kole, Ogeero, kuurei Elija.

³⁶ Ak kilabat chito age, konyiit siki sibonjit ak konde tegat, ak kogochi koee, ak kole, Ingotebi ko u noto; ongegeer ngo nyonei Elija kochoor konyo ng’ony.

³⁷ Kotwek anyun Jesu eng’ kutit ne o, ak kochamji tamirmiriet kwo.

³⁸ Kigerer anget ne kiga kioiye hekalut kwen koboch barak agoi ng’ony.

³⁹ Ak kingogeer kiptaiyatab bogol, ne kitononi eng’ ye negit inendet, kogoitoi tamirmiriet kwo ko u noto, kole, Iman ko Weritab Jehovah chichi.

⁴⁰ Ak kimi agichek kobogorisiek che kigeerei eng’ ye loo: kimi eng’ icheget Maria Magdalene, ak Maria kametab Jakobo ne ming’in ak ne bo Joses, ak Salome;

⁴¹ che kiisubi ak koboisiechin inendet ye kimi Galili; koboto kobogorisiek alak che chang’ che kitogosu Jerusalem koboto inendet.

Tubetab Jesu

⁴² Ak kingoek koskoleny, amu ki Chobet, ki noto betut ne indoune sabato,

⁴³ konyo Josep ne bo Arimatea, chito ne konyitot ne bo kapkiruok, ne kiigeni agine bounatetab Jehovah; ak kwo gab Pilato eng’ nyiganatet kosom mustab Jesu.

⁴⁴ Ak kikwong’ Pilato amu kaga kome: ak koguur kiptaiyatab bogol, koteebe ngo kagome keny.

⁴⁵ Ak kingo kagonai eng’ kiptaiyandanato, kogochi anyun Josep musto.

⁴⁶ Ak kial anget ne bo katanit, ak kochoor inendet, ak kotaae anganato bo katanit, ak konde kererit, ne kiga kebal eng’ koita ne o; ak kimilji koita kogere kurgetab kererit.

⁴⁷ Ak kigeerei Maria Magdalene ak Maria kametab Joses ole kaginde inendet.