MARIKO 11 - BUKUIT NE TILIL

Kowendi Jesu Jerusalem kilosunoti

¹ Ak ye kingorikta Jerusalem, ak Betpage ak Betania, eng’ tulwetab Emitik, koyokto aeng’ eng’ alamalyennyi,

² ak kolenji, Oba nganaset ne mi taing’wong’: ak onyoru eng’ sainato oite, moitab sigiriet ko ratat, ne tom kolany chi; otiach, ak ogetu.

³ Ak ngo teebenak chi kole, Kalya si oyai ko u ni? Olenji, Makyingei Kiptaiyat; ak kogonok ogetu anyun ngunoto.

⁴ Kiba anyun, ak konyor moitab sigiriet ko ratat, eng’ sang’utab ormarich, eng’ ole besiechin ortinwek; kotiach.

⁵ Ak kiteebe alak che kitonondos eng’ oloto kolenji, Olyon, ngotiachi moitab sigiriet?

⁶ Komwachi ichek ko u ye kiga mwachi Jesu: ak kiunda bichoto icheget koba.

⁷ Ak kiget moitab sigiriet konyo ole mi Jesu, ak kiito ngoroikwak eng’ sigiriet; ak kitebe Jesu sigirionoto.

⁸ Ak kiito bik che chang’ ngoroikwak eng’ oret; ak kiindooti alage temenikab ketik, che kiebei eng’ mbarenik.

⁹ Ak kimwaoti eng’ kutit ne o che kiindoi, ak che kiisubi, kolen Hosanna: Iberurot inendet ne nyonei eng’ kainetab Kiptaiyat:

¹⁰ Iberurot laitornatet ne nyonei, ne bo kwandanyo Daudi: Hosanna eng’ ole toror mising’.

¹¹ Ak kimong’ji Jerusalem, ak kwo hekalut orit; ak ye kingo kagogeerot tuguk tugul, ak kiga koek koskoleny, kwo anyun Betania koboto taman ak aeng’.

Mogoiywet ne ma yiel logoek

¹² Ak kingomong’ icheget karon eng’ Betania, koam rubet inendet.

¹³ Ak kingogeer eng’ ole loo mogoiywet ne tinyei sogek, konyo, kolen tamangab konyorji kiy: ak kingoit ye mi ketoto, ko ma konyorji kiy kobate sogek kityo; amu kitom koit ye rure logoekab mogoonik.

¹⁴ Ak kilenji ketoto, Koboch nguno ko ma koamenen chi logoek agoi koigeny. Ak kigasei alamalyennyi.

Kotilili Jesu hekalut

¹⁵ Ak kiit Jerusalem: ak kiwa hekalut orit, ak kotoi koon che kialdaisiei ak che kialisie hekalut, ak kogabui mesosiek che bo walikab siling’isiek, ak ng’echerok che bo che kialdoi cheptugenik;

¹⁶ ak kima chamji chi age tugul kobun hekalut koibei kiy.

¹⁷ Ak kiinet, kolenji ichek, Tos ma sirat kele, Kiguure gonnyu gotab saet ne bo bororiosiek tugul? Ago kaoyai okwek koek kebenetab rebik.

¹⁸ Ak kigas tisiik che eechen ak sirik, ak kocheng’ ole bartoi inendet: amu kiiywei inendet, amu kiga kwong’ tuiyet komugul agobo konetisiennyi.

¹⁹ Ak kingoek lagat komanda eng’ nganaset.

Kimnatet ne bo kayanet

²⁰ Ak ye kisiirtoi ichek karon, kogeer mogoiywonoto ko kogores kot koit tigitik.

²¹ Kobwat anyun Petero, kolenji, Konetindoni, keero, kogores mogoiywondoni koichube.

²² Kowolji Jesu kolenji, Oyan Jehovah.

²³ Amwawok iman ale, Chi age tugul ne lenjin tulwoni, Kitutin ak kewirjin araraita; ko mabistoe eng’ muguleldanyi, ago koyan kole, isuldoi tuguk che kamwa; konyoru tuguchoto.

²⁴ Noto anyun amwawok ale, Tuguk alak tugul che osome eng’ saet, oyan ole kaotaach, ak onyoru.

²⁵ Ak ngoting’e chi ng’olyo, ko ye otonon osae, onyochi kaat, si konyoiywok kaat lelutikwok Kwandang’wong’ agine ne mi kipsengwet.

²⁶ Ago ngo monyochi kaat okwek, ko manyoiywok kaat lelutikwok Kwandang’wong’ agine ne mi kipsengwet.

Koesioi bik kimnatetab Jesu

²⁷ Ak kibwa kogeny Jerusalem: ak kingota kowendoti eng’ hekalut, kobwanji inendet tisiik che eechen, ak sirik, ak boisiek;

²⁸ ak kiteebe kole, Nee kimnatet ne iyae tuguchu? Anan ng’o ne kigonin kimnatoni iyae tuguchuto?

²⁹ Ak kilenji Jesu ichek, Ateebenok ak ane ng’olyot agenge, ak owolwa, si amwawok kimnatet ne ayae tuguchuto.

³⁰ Tos kibunu kabatisanetab Johana kipsengwet, anan kibunu bik? Owolwa.

³¹ Ak kiteebegei ichegei kole, Ngele, Kibunu kipsengwet; kole inendet, Kilya anyun si moyan?

³² Ago ngot kele, Kibunu bik- amu kiiywei ichek bik: amu kiga koyan bik tugul kole maotiot Johana iman.

³³ Ak kiwolji Jesu kole, Magingen. Ak kilenji Jesu anyun, Mamwawok agane kimnatet ne ayae tuguchuto.