MARIKO 10 - BUKUIT NE TILIL

Ng’olyot ne kigitee b agobo siret ne bo besiet

¹ King’eet anyun eng’ oloto, konyo tabanwekab Judea ak bitetab Jordan: ak kiiyumjigei inendet tuiyosiek kogeny; ak kiinet ichek kogeny, ko u ye kicham koyaei.

² Ak kibwanji inendet Parisaik, koteebe inendet koyomei, kole, Tos chamdaat eng’ ng’atutik koon chi osotiondennyi?

³ Ak kiwolji Jesu kolenji, Nee ne king’atak Musa?

⁴ Ak kile ichek, Kicham Musa kesir siret ne bo besiet, si koon kwo.

⁵ Ago kilenji Jesu ichek, Kisirwak ng’atutionoto Musa amu uuindab mugulelwekwok.

⁶ Ago koboch taunetab yaetab ng’ony, ko kiyai Jehovah ichek muren ak tie.

⁷ Amu ng’olyondoni kobagaktoi chi kwanda ak kamet, ak konamgei ak osotiondennyi;

⁸ ak koek choto aeng’ borto agenge: si ma ko aeng’, ago egu borto agenge.

⁹ Choto anyun che kagotuiyo Jehovah, ko mat kobesio chi.

¹⁰ Ak kiteebe alamalyennyi inendet kogeny eng’ go, agobo ng’olyondonoto.

¹¹ Ak kilenji ichek, Chi age tugul ne onei osotiondennyi, ak kotun age, ko kabaigei.

¹² Agot kobogoriot agine ngo bagakta manong’otiondennyi, ak kotun chito age, ko kabaigei.

Koberuri Jesu lagok che mengechen

¹³ Ak kigimutyi inendet lagok che mengechen, si kobiit kotwa ichek: ago kiger kong’ alamalyennyi ichek.

¹⁴ Ago ye kingogeer Jesu, konyit, ak kolenji ichek, Ochamji lagok che mengech kobwanja; amoete ichek: amu bo bounatetab Jehovah che u chu.

¹⁵ Amwawok iman ale, Chi age tugul ne mataachei bounatetab Jehovah ko u lakwet ne ming’in, ko maitei oloto matiny.

¹⁶ Ak kiganab icheget eng’ eunekyik, ak koberur, kogonoor eunekyik ichek.

Kocheng’ei chito ne kitinyei tuguk che chang’, sobondab koigeny

¹⁷ Ak ye kiwendi eng’ oret, kolabatyi chito age inendet, ak kogutung’ji, ak koteebe kole, Konetindoni mie, ayai nee si anyor sobondo ne bo koigeny?

¹⁸ Ak kilenji Jesu inendet, Kalya si iguurena ne mie? Mami chi ne mie, kobate agenge, inendet Jehovah.

¹⁹ Ingen inye ng’atutik, Amerumisie, Amoipge, Amechorse, Amebaorianji lembech, Ameng’alse, Teech kwandang’ung’ ak komet.

²⁰ Ago kilenji, Konetindoni, kiarib tuguchuto tugul koboch ko a ming’in.

²¹ Kigeer anyun Jesu inendet, ak kocham, ak kolenji, Ta ko rartaat kit agenge eng’ inye: ui, ialde tuguk tugul che itinye, ak igochi kibananok, si inyoru magornatet eng’ kipsengwet: ak inyo isubwa.

²² Ago kigerer met agobo ng’olyondonoto, ak kwo eng’ arogenet: amu kitinyei inendet tuguk che chang’.

Tuguk che uuen agobo magornatosiek

²³ Ak kigeer Jesu komoswek tugul, ak kolenji alamalyennyi, Bichii ne tia koit bounatetab Jehovah che tinyei magornatosiek!

²⁴ Ak kikwong’io alamalyennyi eng’ ng’alekyik. Ago kiwol Jesu kogeny, kolenji, Lagochu, bichii ne tia eng’ ichek che tiiegei magornatosiek koit bounatetab Jehovah!

²⁵ Nyamnyum eng’ tambesiet kochut kondab katet, kosiir komong’ji magoriot bounatetab Jehovah.

²⁶ Ak kikwong’io ichek mising’, ak kolenji, Ara ng’o anyun ne imuchi konyor sorunet?

²⁷ Ak kingogeer Jesu ichek, kole, Maimugaksei eng’ bik, ago ma u noto eng’ Jehovah: amu imugaksei tuguk tugul eng’ Jehovah.

²⁸ Kitoi anyun Petero kolenji, Keero, kigebagakte tuguk tugul ak kigisubun.

²⁹ Kile Jesu, Amwawok iman ale, mami chi ne kibagach got, anan ng’etab kametwagik, anan chepkametwagik, anan kamet, anan kwanda, anan lagok, anan mbarenik, agobo ane, ak logoiywek che miach,

³⁰ ne manyoru konyil bogol nguno eng’ betusiechu, gorik, ak ng’etab kametwagik, ak chepkametwagik, ak kametwagik, ak lagok, ak mbarenik, koboto usisiosiek; ak eng’ betusiek che tun bwanei, sobondab koigeny.

³¹ Ago tun egu che chang’ che bo tai che bo let; ak koek che bo let che bo tai.

Sib kemwaei ne bo somok meetab Jesu

³² Ak kimi ichek eng’ oret kotogostoi Jerusalem; ak kiindoi Jesu: ak kikwong’io, ak koiyweis che kiisubi. Ak kiitaban kogeny choto taman ak aeng’, kotoi komwachi ichek tuguk che tun ityin inendet,

³³ kole, Ogeero, kitogostoi Jerusalem; ak kindoi Weritab chi eunekab tisiik che eechen ak sirik; ak koruokyi kiruoget ne bo meet, ak konde inendet eunekab bororiosiek:

³⁴ ak kochurochur inendet, ak kong’utyi, ak kobire kipcharitit, ak kobar; ak ye ibata betusiek somogu kong’eet kogeny.

Sometab Jakobo ak Johana

³⁵ Ak kirikyi inendet Jakobo ak Johana, werikab Sebedi, ak kolenji, Konetindoni, kimache iyaiywech kiy age tugul ne kisomin.

³⁶ Ak kilenji ichek, Omache ayaiywok nee?

³⁷ Ak kilenji, Konech ketebe, age eung’ung’ ne bo tai, ak age eung’ung’ ne bo katam, eng’ telunateng’ung’.

³⁸ Ago kilenji Jesu ichek, Mongen kit ne osome. Tos omuchi oee kikombet ne aee? Anan kibatisanenak kabatisanet ne kibatisanena?

³⁹ Ak kilenji, Kimuchi. Kolenji anyun Jesu ichek, Kikombet ne aee ko tun oee ak okwek; ak kabatisanet ne kibatisanena ko tun kibatisanenok ak okwek noto:

⁴⁰ ago ma ane ne igoitoi kotebe chi eunnyu ne bo tai anan eunnyu ne bo katam: ago bo icheget che kigechopchi.

Etunatet ne bo iman

⁴¹ Ak ye kingogas chun tamanu, kotoi bichoto konerekyi mising’ Jakobo ak Johana.

⁴² Ak kiguur Jesu icheget kobwa ole mi, ak kolenji ichek, Ongen ole icheget che kiiti kele bou Bororiosiek, koyaegei koek kiptainik eng’ ichek; ak chechuak che eechen kobou ichek.

⁴³ Ago ma u noto eng’ okwek: ago chi age tugul ne machei koek ne o eng’ okwek, koek ne boisiewok:

⁴⁴ ak chi age tugul ne machei koek ne bo tai eng’ okwek, koek otwogindetab tugul.

⁴⁵ Amu kima nyo agot Weritab chi si keboisiechi, ago si kobois inendet, ak kogoito sobondanyi koek kit ne kitiage che chang’.

Kisoobi Bartamayo kipkoratiat

⁴⁶ Ak kiit anyun Jeriko: ak kingomandae Jeriko, koboto alamalyennyi ak tuiyet ne o, ko kitebyei eng’ oret taban, Bartimayo, weritab Timayo, inendet kipkoratiat ne somsei.

⁴⁷ Ak ye kingogas kole, nito ko Jesu ne bo Nasaret, kotoi kowaach ak kole, Jesu, Weritab Daudi, rirena.

⁴⁸ Ak kiger kong’ che chang’ kole, kosis: ago kites kowaach mising’ kole, Weritab Daudi, rirena.

⁴⁹ Ak kitonon Jesu, ak kole, Oguur inendet. Ak keguur kipkoratiandanato, kelenji, Baibaitu: ng’eet, kuurin inendet.

⁵⁰ Ak kiwirta ngoriennyi, ak koriakta, kwo ole mi Jesu.

⁵¹ Ak kiwolji Jesu inendet kolenji, Imache ayaun nee? Ak kole chito ne korat, Rabboni, amache ageerto.

⁵² Ak kilenji Jesu inendet, Ui bandang’ung’; kagosoobin kayaneng’ung’. Ak kigeerto ngunoto anyun, ak kosub inendet eng’ oret.