MALAKI 3 - BUKUIT NE TILIL

Ne kiyoktoi ne nyonei ne bo Jehovah

¹ Ogeero, ayogu chito nenyu, ne kiyoktoi, ak kochob oret eng’ tainnyu: ak sib konyonei hekalunnyi Kiptaiyat ne ocheng’e; ne chito ne kiyoktoi ne bo arorutiet, ne oboiboitune, ogeero, nyonei, mwaei Jehovah ne bo lugosiek.

² Ago ng’o ne imuchi komuita eng’ betutab nyonunennyi? Ak ng’o ne tononi ye katook? Amu u inendet mat ne kitililisie, ak ko u sabunitab mwetik:

³ ak koteb ng’ony ko u kaunindetab feda ak ko katililindet, ak kitilil werikab Lawik, ak kotilil ichek ko u ye kitilili tahabu ak feda; ak kogochi Jehovah kagochinoik eng’ imanda.

⁴ Si kochamak anyun kagochinetab Juda ak ne bo Jerusalem eng’ Jehovah ko u eng’ betusiek che bo keny, ak eng’ kenyisiek che bo keny.

⁵ Ak arikyok eng’ kiruoget, ak aegu baoriat ne chepcheb agobo bonik, ak agobo che ibegei, ak agobo bik che iyostos eng’ lembechek; ak agobo ichek che sastoe otwogindet ne kisirei eng’ melektanyi, che sastoe mosok, ak ne matinyei kwanda, ak ne imaasi toondet, amaiywea, mwaei Jehovah ne bo lugosiek.

⁶ Amu mawalaksei ane Jehovah, magigeswok anyun, ee okwek werikab Jakobo.

Kebaberwekab taman ak kaberuroikab Jehovah

⁷ Kiomaste koboch betusiekab kwanisiekwok omete kayomisutikyuk, ama orib. Oweekyage anyun, si aweekyoge, mwaei Jehovah ne bo lugosiek. Ago omwae ole, Kiweegundoige ano?

⁸ Tos chorei chi Kamuktaindet? Ago ochora. Ago omwae ole, Kigichorten ano? Kiochor kebeberwekab taman ak kagochinoik.

⁹ Kichubok eng’ chubet; amu ochora, agot bororioni komugul.

¹⁰ Oibu kebeberwek tugul che bo taman kobwa choge, si kobiit amitwogik eng’ gonnyu, ak otiema anyun eng’ noto, mwaei Jehovah ne bo lugosiek, si ogeer ngo mayatwok tirisiokab kipsengwet, ak arong’wok berurto, kot ko ma komi ole ondoi.

¹¹ Ak ager kong’ ne amisioti amu okwek, si mang’em ruratetab emeng’wong’; ama oosu ketikwok che bo sabibuk kotomo koit betusiek, mwaei Jehovah ne bo lugosiek.

¹² Ak koguurenok bororiosiek tugul bik che boiboi: amu oegu emet ne kichamei kot, mwaei Jehovah ne bo lugosiek.

Katerteret ne bo let ne bo bik che bo iman

¹³ Kigouuegitu ng’alekwok che kiomwa agobo ane, mwaei Jehovah. Ago omwae ole, Nee ne kigemwa agobo inye?

¹⁴ Kiomwa ole, Matilei kiy ngeot Kamuktaindet: ak tos kelwech nee amu kigerib kayomisutikyik, kigebendate taitab Jehovah ne bo lugosiek keririoti?

¹⁵ Ak nguno keguure menotik bik che boiboi, ee, kigimiti ichek che yaei yaitiet; ee, tiemei Kamuktaindet ak kochilildos.

¹⁶ King’alaljigei anyun che iywei Jehovah: ak kieb it Jehovah kogas ak kigisir eng’ tainnyi bukuitab kabwatet agobo ichek che iywei Jehovah, ak kobwati kainennyi.

¹⁷ Ak mwaei Jehovah ne bo lugosiek kole, Bunjina ichek, eng’ betut ne ayae ichek koek kinnyu ne nenyu anege; ak arire ichek ko u ye rire chi werinnyi ne boisiechin.

¹⁸ Yeityo oweege ak obesie chito ne bo iman ak kiptengekyot, ak obesie inendet ne otei Kamuktaindet ak ne maotei.