MALAKI 2 - BUKUIT NE TILIL

¹ Ee okwek tisiik, neng’wong’ ng’atutioni.

² Ngot ko momache ogas, ak ngot ko momache ogonore mugulelwekwok, si kobiit otoror kainennyu, mwaei Jehovah ne bo lugosiek, ayokwok anyun chubisiet, ak achub berurwogikwok: ee, kaachub amu mogonore ng’atutionoto mugulelwek.

³ Ogeero, ang’eme keswek amu okwek, ak alage ng’atatek togochikwok, ng’atatekab kagochinoikwok; ak keistok koboto tuguchoto.

⁴ Ak onai ole kiayokwok ng’atutionito, si kotebi kayomisennyu koboto Lawik, mwaei Jehovah ne bo lugosiek.

⁵ Kimi kayomisennyu ne bo sobondo ak kalyet koboto inendet; ak kiagochi tuguchoto inendet si kobiit koiyweis, ak koiywea, ak kogonyit kainennyu.

⁶ Kimi kutinnyi ng’atutietab imanit, ama kinyorji kutinnyi kit ne ma bo iman: kigibendate tuwai eng’ kalyet ak eng’ lititindo, ak koweech che chang’ kometo tengekto.

⁷ Amu kanyo korib kutitab tisiindet naet, ak kocheng’ bik ng’atutiet eng’ ng’alekyik: amu inendet ko chito ne iyoktoi Jehovah ne bo lugosiek.

⁸ Ago kiomaste eng’ oret; kionach che chang’ eng’ ng’atutiet; kiong’em kayomisetab Lawi, mwaei Jehovah ne bo lugosiek.

⁹ Kiayaak anyun ak okwek oegu che kisasei ak ko nyerotin eng’ taitab bik tugul, ko u ye kima orib ortinwekyuk, ago kiotiytii bik eng’ ng’atutik.

Simwekab Israel

¹⁰ Tos magitinye achek tugul kwanda agenge? Tos ma yaech Kamuktaindet agenge? Amu nee si koberberi age tugul eng’ achek tupchennyi, king’waniti kayomisetab kwanisiekyok?

¹¹ Kigoyai Juda kaberberisiet, ak kigeyai kit ne kiwechei eng’ Israel ak eng’ Jerusalem; amu kigong’wanit Juda tililindab Jehovah ne chamei, ak kotun cheptab cheptalelit ne ter.

¹² Igesu Jehovah chito ne yachin inendet kiito, inendet ne kosu ak inendet ne wolu, kiistoe ichek emaisiekab Jakobo, koboto inendet ne igoitoi kagochinet, kogochin Jehovah ne bo lugosiek.

¹³ Ak ni kit age ne oyae kogeny, otumjini beekab kong’ kaptisisietab Jehovah, eng’ rirek, ak eng’ kateeiyet, kot ko ma koiiti kogeny kagochinet, ama kotaachei eng’ chamnyet che ogochini eng’ eunekwok.

¹⁴ Ago, omwae ole, Kalya? Amu kogoek Jehovah baoriat eng’ kwenung’wong’, inye ak osotiotab ming’inateng’ung’, ne kiiberber, nganda, inendet ko chamaneng’ung’, ak ko osotiotab kayomisutieng’ung’.

¹⁵ Ak tos kima yai inendet koek agenge, nganda kitinyei tamirmiriet ne king’et? Amu nee si koek agenge? Kicheng’ iyotet ne iywei Kamuktaindet. Orib anyun tamirmirikwok, amat koberber chi osotiotab ming’inatennyi.

¹⁶ Amu aweche besiet, mwaei Jehovah, Kamuktaindetab Israel, ak inendet ne tuge ngoriennyi sastaet, mwaei Jehovah ne bo lugosiek: orib anyun tamirmirikwok, si moberberisie.

¹⁷ Kooiim Jehovah eng’ ng’alekwok. Ago omwae ole, Kigiime nee? Amu omwae ole, Mie age tugul eng’ taitab Jehovah ne yaei yaitiet ak koboiboitune bichoto: anan mi ano Kamuktaindet ne bo kiruoget?