MALAKI 1 - BUKUIT NE TILIL

Chamnyet ne chamei Jehovah Israel

¹ Lautietab ng’olyotab Jehovah ne kiigochi Israel eng’ Malaki.

² Kiachamak, mwaei Jehovah. Ago omwae ole, Kiichamenech nee? Tos kima ko ng’etab kametab Jakobo Esau? Mwaei Jehovah: ago kiacham Jakobo;

³ ago kiawech Esau, ak ayai tulonokyik koguber, ak agochi borotennyi lelwek che bo ong’atet.

⁴ Amu mwaei Edom kole, Kigiterterech, ago kiweeksei ak keteech komoswek che kigoek karatwek; mwaei Jehovah ne bo lugosiek ko u ni kole, Tun teechei ichek ago abute: ak koguure bik ichek, Kiwotetab yaitiet, ak koguure, Bik che ting’e Jehovah neregek koigeny.

⁵ Ogeere ak ole, Ingotororit Jehovah kosiir kiwotetab Israel.

Tisiik che sasei Jehovah

⁶ Teechei werit kwandanyi, ak koteech otwogindet kiptaiyandennyi: ngot ko a kwanda anyun, ko mi ano teegistanyu? Ak ngot ko a kiptaiyat, komi ano kaiyweisiet ne kiywea? Mwawok Jehovah ne bo lugosiek, ee tisiik, che osase kainennyu. Ak omwae ole, Kigisas eng’ nee kaineng’ung’?

⁷ Ogoitoi makatinik che muruonen eng’ kaptisisiennyu. Ak omwae ole, Kigimuruonenen nee? Amu omwae ole, Sasat mesetab Jehovah.

⁸ Ak ye ogoitoi che koriotin koek tiseiywek, ko tos ma yaitiet noto? Ak ye ogoitoi che ing’waldos ak che miandos, ko tos ma yaitiet noto? Igochi anyun noto bounindeng’ung’; tos baibaitunenen? Anan tos taachin ye keerin? Mwaei Jehovah ne bo lugosiek.

⁹ Asomok anyun ale, osom chametab Kamuktaindet, si kobiit korirenech: bunwok nito: tos taach age eng’ okwek ye keer? Mwaei Jehovah ne bo lugosiek.

¹⁰ Kata kaigai nda kami chi eng’ okwek ne kerei kurgotik, si molaal mat eng’ kaptisisiennyu buch! Maabaibai eng’ okwek, agot kitigin, mwaei Jehovah ne bo lugosiek, amataache kagochinet ne bunu eunekwok.

¹¹ Amu o kainennyu eng’ Bororiosiek koboch ole chorune asis agoi ole roroktoe; ak kigoitoi eng’ komosta age tugul nyamdutik che kibeelei agobo kainennyu, koboto kagochinet ne tilil: amu o kainennyu, eng’ Bororiosiek, mwaei Jehovah ne bo lugosiek.

¹² Ago ong’waniti amu omwae ole, Muruon mesetab Jehovah, ak ko sasotin logoekyik, agot amitwogikyik.

¹³ Omwae kogeny ole, Ogeero, kaiimetab ge ne tia! Ak ogututae serunek, mwaei Jehovah ne bo lugosiek; ak kioibu che kigoam tiondo ak che ing’waldos, ak che miandos; oibu kagochinet ko u noto: tos ataach nito ne bunu eunekwok? Mwaei Jehovah.

¹⁴ Ago chubot kaberberindet, ne tinyei mengit eng’ akwennyi, ak koarorto, yeityo koeng’ji Kiptaiyat kit ne tinyei berutiet: amu a laitoriat ne o, mwaei Jehovah ne bo lugosiek, ak kiywei kainennyu eng’ Bororiosiek.