LUKA 8 - BUKUIT NE TILIL

Kobogorisiek che kiboisiechi Jesu

¹ Ak kingobata noto, ne matianit, kowendote nganasok che eechen ak che mengechen koamdaati ak komwaitaati logoiywek che miach che bo bounatetab Jehovah, ak kimi tamanu ak aeng’ koboto inendet,

² ak kobogorisiek alak che kiga kosoob eng’ tamirmirik che yaachen ak mianwek, Maria ne kiguure Magdalene, ne kimandae oik tisabu,

³ ak Joana osotiotab Kusa kiboitiotab Herod, ak Susana, ak kobogorisiek alak che chang’, che kiboisiechin inendet eng’ tugukwak.

Kalewenet agobo kolindet

⁴ Ak kingo yomogei tuiyet ne o, ak kobwanji inendet che kibunu nganaset age tugul, kong’alal eng’ kalewenet kole:

⁵ Kiwa kolindet koleta keswekyik: ak ye kita koletoi, kobutyi alak oret taban; ak kigitiegat, ak koam taritik che bo barak.

⁶ Ak kiibutyi alak ruandet; ak ye kingobityo, koyaamnyo, amu manyor beek.

⁷ Ak kiibutyi alak kwenutab katok; ak kibityo katok koboto keswechoto, ak kogiich.

⁸ Ak kiibutyi alak ng’ung’unyek che miach, ak kobityo, ak koi age tugul bogol. Ak ye kita komwaei tuguchu, komwa eng’ kutit ne o, kole, Inendet ne tinyei itik che kastoe, kogas.

⁹ Ak kiteebe alamalyennyi ole teptoi kalewenoni.

¹⁰ Ak kile, kagigonok okwek onai ung’otik che bo bounatetab Jehovah: ago kimwachin alak eng’ kalewenaik; si ye keertoi ko mageerei kiy, si ye kasei ko manaei.

¹¹ Kalewenonoto ko ni: Keswek ko ng’olyotab Jehovah.

¹² Ak choto mi oret taban ko icheget che kigogas; yeityo konyo oindet, ak konem ng’olyot eng’ mugulelwekwak, si manyor kayanet ak kesor.

¹³ Ak icheget che mi ruandet barak, ko ye kagas ng’alek, koyan eng’ boiboiyet, ak matinyei tigitik, iyani ne matia, ak kochuchuigei eng’ betutab yomset.

¹⁴ Ak che kiibutyi katok, ko icheget che kigas, ak ye kaba kogiich kererwekab met ak magornatosiek, ak boiboiyetab tugukab soboni, ama iyo logoek che nyiitotin.

¹⁵ Ak che mi ng’ung’unyek che miach, ko icheget, che ye kagogas ng’olyot, konam komie, eng’ mugulelwek che bo telunatet ak ko miachen, ak koiiyo logoek eng’ kagiiletab ge.

¹⁶ Mami chi, ne, ye kagonaam tait, kotuge kiy, anan konde kureretab itogut; ago indoi kit ne tonone tait, si kobiit kogeer lapkeiyet bik che bwanei go.

¹⁷ Amu mami kiy ne keunyei, ne matun ng’ang’oksei; ama mi kiy ne bo ung’ot, ne matun naaksei eng’ ole lapkei.

¹⁸ Oripge anyun eng’ ole ogastoi: amu age tugul ne tinyei, ko tun kigochin; ak inendet ne matinyei, ko tun kirebe agot ne len tinyei.

Tupchonatet ne bo iman

¹⁹ Ak kibwanji inendet kamet ak che tupcho, ago kima imuch korikyi amu chang’indab bik.

²⁰ Ak kigimwachi kelenji, Tonondos komet ak che otupche eng’ sang’, machei kogeerin.

²¹ Ago kiwolji kolenji, Kamennyu ak che kitupche ko chu kasei ng’olyotab Jehovah, ak koyai.

Kogerei kong’ Jesu usonet ne o ak wasetab ge ne bo beek

²² Ak kilany moingetab beek eng’ betut age eng’ betusiechoto, koboto alamalyennyi; ak kilenji, Ongelandae araraita kebe bitonin: kotoi anyun koba.

²³ Ak kingota kobendi, koru Jesu konuuch: kochorjigei anyun usonet ne o araraita; kot komachei konyi beek moinget ak kinyonji ng’oiyondit.

²⁴ Ak kibwa ole mi inendet, ak kong’eet, kolenji, Konetindoni, konetindoni, kagibegu. Kong’eet anyun, ak koger kong’ usonet ak wasetab ge ne bo beek: kosis anyun araraita komung’do.

²⁵ Ak kilenji ichek, Mi ano kayaneng’wong’? Kiiyweis ak kokwong’io, kolenjigei ichegei, Ng’o chichi anyun, ne ng’atei agot usonet ak beek, kot kogas it inendet?

Kisoobi chito ne bo emetab Gerasenik, ne kitinyei oik

²⁶ Kiit anyun emetab Gerasenik, ne tokyingei Galili.

²⁷ Ak ye kingonyo ngegutab araraita, kotuiyo ak inendet chito age ne kibunu nganaset, ne kitinyei oik; ak kima kolaachi ngoroik koboch betusiek che chang’, ak kima komenyei go, ago kitebote kererisiek.

²⁸ Ak kingogeer Jesu, kowaach ak kobutyi tainnyi, ak kimwa eng’ kutit ne o, kole, Ating’enen nee, Jesu Weritab Jehovah ne toror Mising? Kasomin ale, amenyalila.

²⁹ Amu king’at tamirmiriet ne muruon komong’ eng’ chichoto. Amu kiga nam eng’ betusiek che chang’: ak kigiribei mising’, ak kiga kirate sirimwek ak mugurek; ak king’etyei tuguk che kirate, ak kionei oindet inendet kwo surkwen.

³⁰ Ak kiteebe Jesu, kolenji, Kiguurenen nee? Ak kile, Chang’indo; amu kiga chut oik che chang’ inendet.

³¹ Ak kisom kole, si mang’at koba keringet ne matinyei ole bochin.

³² Ak kimi oloto akwet ne o ne bo torok che kiagetos eng’ tulwet: ak kisom ichek mising’ kole, kochamji kochut torochoto. Kochamji anyun.

³³ Ak kimong’ anyun oik eng’ chichoto, ak kochut torok: ak kiruai akwet kochortaegei chemng’esut koba araraita, ak kobek.

³⁴ Ak kingogeer che kiiyagisiei tuguk che kabiit, komwaei, ak koba komwaita eng’ nganaset ak eng’ emet agobo noto.

³⁵ Ak kiba kogeer kit ne kagoyaak; ak kibwa ole mi Jesu, konyor chichoto ne kamandae oik, kotebyei eng’ kelyekab Jesu, kolaagat, ak kotinyei ng’omnatennyi: ak kiiywei.

³⁶ Ak kimwachi ichek che kageerei tuguk che kabiit, ole kagisoopto chito ne katinyei oik.

³⁷ Ak kisom anyun bik tugul che bo ole negite emetab Gerasenik kole, kwo kobagakta ichek: amu kiga nam ichek kaiyweisiet ne o: ak kilany moingetab beek, ak koweektagei.

³⁸ Ago kisom inendet chito ne kamandae oik kole, kotebi tuwai: ago kimwachi kwo, kolenji,

³⁹ Iweekyigei gong’ung’, ak imwaite tuguk che eechen che kagoyaun Jehovah. Ak kiwa anyun, komwaitaat eng’ nganaset komugul tuguk che eechen che kagoyachi Jesu.

King’eeti cheptab Jairu, ak kisoobi kobogoriot ne kimandae korotik

⁴⁰ Ak ye kiweeksei Jesu, kotaach tuiyet; amu kiigeni bik tugul inendet.

⁴¹ Ak ogeero, kinyo chito age ne keguure Jairo; ki bounindetab sunagogit: ak kiibutyi kelyekab Jesu, ak kosom inendet kole, konyo gonnyi:

⁴² amu kitinyei chepto ne kigii inegei, ne ki bo olo bo kenyisiek taman ak aeng’, ak ki negit kome. Ago kiigiigoti tuiyosiek inendet kowendi.

⁴³ Ak kimi kobogoriot age ne kimandae korotik kenyisiek taman ak aeng’, ne kiga koboisie tugukyik tugul eng’ chepkerichinik, ama imuch kosoob inendet age tugul eng’ ichek.

⁴⁴ Kinyo anyun kobun let eng’ inendet, ak kotwa tabandab ngoriennyi: ak ngunoto kosisyo korotik.

⁴⁵ Ak kile Jesu, Ng’o ne katwaa? Ak kingotiiyo tugul, kolenji Petero ak che kimi koboto inendet, Konetindoni, kariichin tuiyosiek ak kagogiichin.

⁴⁶ Ago kile Jesu, Kagotwaa chi: amu kaanai ale, kagomandaena kimnatet.

⁴⁷ Ak ye kingogeer kobogoriot kole, ma imuch koung’ak, konyo kobotanonu, ak kobutyi ng’ony eng’ tainnyi ak komwaita eng’ taitab bik tugul kit ne kaigochi kotwa inendet, ak ole kagisoopto ngunoto.

⁴⁸ Ak kilenji, Chebi, kagosoobin kayaneng’ung’; ui eng’ kalyet.

⁴⁹ Ak ye kita kong’alali, konyo chi ne kibunu oldab bounindetab sunagogit, kole, Kagome cheptang’ung’ amatata iim Konetindet.

⁵⁰ Ago kingogas Jesu, kowolji kolenji, Ameiywei: iyan kityo, si kisoob.

⁵¹ Ak ye kingo kagoit got, koma kochamji chi age tugul kwo go koboto inendet, kobate Petero, ak Johana, ak Jakobo, ak kwandab cheboto ak kamet.

⁵² Ak kirirtos bik tugul, ak koteeitos agobo inendet: ago kile, Morirtosi; amu ma me inendet, ago inuuchi.

⁵³ Ak kirorechi inendet anyun kochot, amu kiingen kole kagome.

⁵⁴ Ago kinam inendet eutab cheboto, ak koguur, kole, Chebi, ng’eet.

⁵⁵ Koweek anyun tamirmiriennyi, ak kong’eet ngunoto: ak king’at kole, kigochi kiy ne amei.

⁵⁶ Ak kikwong’io mising’ sigikyik: ak king’at inendet ichek kolenji, amomwachi chi age tugul kit ne kagoyaak.