LUKA 7 - BUKUIT NE TILIL

Kisoobi otwogindetab kiptaiyatab bogol

¹ Ak kingo kagogesyi ng’alekyik tugul itikab bik, kwo anyun Kapernaum.

² Kimi kiptaiyatab bogol, ne kitinyei otwogindet ne kichamei kot, ak kimiani otwogindonoto ne ki negit kome.

³ Ak ye kingogas agobo Jesu, koyokto inendet boisiekab Yahudik, koba komwachi konyo kosoob otwogennyi.

⁴ Ak ye kingoit icheget ole mi Jesu, kosaisai inendet mising’, kolenji, Nyoljin inendet iyachi ko u noto:

⁵ amu chamei bororiennyo, ak kiteekwech inendet sunagoginnyo.

⁶ Kwo anyun Jesu koboto icheget. Ak ye kima kota ko loo eng’ goyoto, koyokto kiptaiyandanato choronokyik koba ole mi inendet ak kolenji, Kiptaiyandani, amata iimge: amu ane, ko ma a chito ne nyolu inyo gonnyu:

⁷ noto anyun, agot ane, ko ma aiitge ale nyolu anyonjin: ago mwa ng’olyot kityo, ak kosob otwogindennyu.

⁸ Agot ane, nganda a chi ne kiboiywa, atinye askarik che abou, ak ngalenji ni, Ui, kwo; ak ngalenji age, Nyo, konyo; ak ngalenji otwogindennyu, Yai ni, koyai.

⁹ Ak ye kingogas Jesu ng’alechuto, kokwong’ agobo inendet, ak kiwelelgei ak kolenji tuiyet ne kiisubi inendet, Amwawok ale, tom anyoru kayanet ne o ne te ni, achicha, agot eng’ Israel.

¹⁰ Ak kingoweek anyun che kiga kiyokto, koba ga, konyor otwogindonoto ko kagosob.

King’eeti weritab mosoget eng’ Nain

¹¹ Ak ye kingo kagobata betunoto, kwo nganaset ne kiguure Nain; ak kiba alamalyennyi koboto inendet, ak tuiyet ne o.

¹² Ak ye kiga rikta ormarichetab nganaset, ogeero, kigisutei musto, ne ki werit ne kii kamet inegei, ak ki mosok chebiosonato: ak kimi koboto inendet bik che chang’ che bo nganaset.

¹³ Ak ye kingogeer Kiptaiyat inendet, korire, ak kolenji, Amat irir.

¹⁴ Ak kirikta ye negit ak kotwa kit ne kigisute inendet: ak kitononso anyun che kisutei. Ak kilenji Jesu inendet, Neranani, kamwaun ale, Ng’eet.

¹⁵ Ak king’eet anyun ne koga kome, ak kotoi kong’alal. Ak kiigochi kamet.

¹⁶ Ak kiiyweis tugul: ak kolos Jehovah, kole, Kagong’eet eng’ kwenunnyo maotiot ne o: ak, Kagorutochi Jehovah bikyik.

¹⁷ Ak kiyom ng’olyondonito agobo inendet Judea komugul, ak korotinwek tugul che kiyiem oloto.

Johana kabatisanindet

¹⁸ Ak kimwachi alamalyetab Johana inendet tuguchuto tugul.

¹⁹ Ak kiguurjigei Johana aeng’ che bo alamalyennyi ak koyokto koba ole mi Kiptaiyat, koteebe kole, Tos inyendet ni nyonei, anan kigeni age?

²⁰ Ak ye kiga it bik ole mi inendet, kolenji, Kagoyokwech Johana Kabatisanindet kebwa ole imi, kole, Tos inyendet ne nyonei, anan kigeni age?

²¹ Eng’ sainato kosoob che chang’ che kitinyei mianwek ak korotwek ak tamirmirik che yaachen; ak kiigochi kipkoratinik che chang’ kogeerto.

²² Kowolji kolenji, Oba omwachi Johana tuguk che kaogeer ak che kaogas; kigochin kipkoratinik kogeerto, ak bendoti che koing’waldos, kitilili che tinyei mogondosik, ak kastoi che ming’otin, king’eeti che kigobek, kiamjin kibananok logoiywek che miach.

²³ Ak baibai age tugul ne manyorunena kanagut.

²⁴ Kingo kagoba che kiga koyokto Johana, kotoi komwachi tuiyosiek agobo Johana, kole, Kiomande surkwen ogeer nee? Tegat ne itumdumi usonet?

²⁵ Ago kiomande ogeer nee okwek? Chito ne ilaachi ngoroik che tangusen? Ogeero, icheget che ilaachi ngoroik che bo lelesta, ak che meng’isiei eng’ talbisto, komitei gorikab laitorinik.

²⁶ Ago kiomande ogeer nee? Maotiot? Ee, amwawok ale, siirei maotiot.

²⁷ Nito ne kigisir agobo inendet, kele, Ogeero, ayoktoi kiboitiondennyu kondoenen, Ne chobei oreng’ung’ eng’ taing’ung’.

²⁸ Amwawok ale, Eng’ che kisich kobogorisiek ko mami ne o ne siirei Johana: kobate inendet ne ming’in eng’ bounatetab Jehovah ko o kosiir inendet.

²⁹ Ak ye kingogas bik tugul, koboto taagikab aisurut, koiityi imanda Jehovah, amu kiga kibatisan eng’ kabatisanetab Johana.

³⁰ Ago kiesio Parisaik ak ng’omotikab Ng’atutik, kiruogutikab Jehovah, ma makyigei, amu kima ibatisan inendet icheget.

³¹ Ak kile Kiptaiyat, Aroge nee bikab ibini, ak kergei ak nee?

³² Kergei ak lagok che tebyei eng’ oldab aldaisiet, ak koguuregei; kolen, Kigegutwak ndurerusiek, ak ma oureren; kigirirjok, ak ma oririe.

³³ Amu kinyo Johana Kabatisanindet ama am makatia anan divaik; ak omwae anyun ole, Tinyei oindet.

³⁴ Kinyo Weritab chi koamis ak koeeiso; ak omwae ole, Ogeero, kipkeiya chichi, ak eeindetab divaik, choruetab taagikab aisurut ak kiptengeginik!

³⁵ Ak naat ng’omnatet kele bo iman, eng’ lagokyik tugul.

Kiile mwaita kelyekab Jesu; kalewenet agobo besenik aeng’

³⁶ Ak kimach age eng’ Parisaik kole koamis ak inendet. Ak kiwa gotab Parisaindonoto, ak koteb ng’ony koamis.

³⁷ Ak ogeero, kobogoriot age ne kimi nganaset, ne ki kiptengekyo; ye kingonai kole, tebyei ng’ony Jesu koamisiei eng’ gotab Parisaindonoto, koib chubait ne mi mwaita ne nyamdut,

³⁸ ak kitonon eng’ let ole negite kelyekyik, korirei, ak kitoi kosachi beekab kong’ kelyekyik, ak kouuse sumeekyik, ak kong’utut kelyekyik ak koiile mwaata.

³⁹ Ak ye kingogeer noto Parisaindonoto ne kiguurei inendet, komwa eng’ orinnyi, kole, Nda ka maotio chichi, ta kagonai kole ng’o kobogoriondoni katwa inendet, ak chi ne u nee, kole kiptengekyot.

⁴⁰ Ak kiwolji Jesu inendet kolenji, Simon, atinye ng’olyot ne amache amwaun. Ak kile, Konetindoni, mwa anyun.

⁴¹ Kole, Kimi besendoindet anum ne kitinyei besenikyik aeng’: kibesen age denarisiek bogol mut, ak kibesen age konom.

⁴² Ak ye kima kotinyei kiy ne yaakyin, konyochi kaat ichek tuwai. Ng’o anyun eng’ ichek tuwai ne chamei inendet kosiir?

⁴³ Kowol Simon kole, Alen inendet ne kiginyochi kaat che chang’. Ak kilenji, Kairuoch komie.

⁴⁴ Ak kingoweleljigei kobogoriot, kolenji Simon, Igeere kobogoriondoni? Kaanyo gong’ung’ ama inaga beek aune kelyekyuk: ago kagosachi kelyekyuk beekyik bo kong’ kobogoriondoni, ak kouuse sumeekyik.

⁴⁵ Ma ing’ututa; ago inendet, koboch ngab anyo, kotomo kobagakta kong’utut kelyekyuk.

⁴⁶ Ma iile metinnyu mwaita: ago kagoiile ine kelyekyuk mwaita ne nyamdut.

⁴⁷ Noto anyun ne kamwaun ale, kagenyochi kaat tengekwogikyik, che ka chang’; amu chamei mising’: ago inendet ne kinyochin kaat kitigin, kochamei agine kitigin.

⁴⁸ Kolenji kobogoriondonoto, Kagenyoun kaat tengekwogiguk.

⁴⁹ Ak kitoi icheget che kimitei amisiet koboto inendet, komwa eng’ orinywa, kole, Ng’o ni kot konyochi kaat bik tengekwogik?

⁵⁰ Ak kilenji kobogoriot, Kagosorun kayaneng’ung’; ui eng’ kalyet.