LUKA 6 - BUKUIT NE TILIL

Tuguk che kanyol eng’ betutab sabato

¹ Ak kibunei mbarenikab bek eng’ betutab sabato; ak kibagat alamalyennyi mesisekab bek, kobirir ak konyei.

² Ago kimwa alage che bo Parisaik kole, Amu nee si oyai eng’ betutab sabato ne ma chamdaat eng’ ng’atutik?

³ Ak kiwolji Jesu kolenji, Tom osoman agot ng’olyondoni, ne kiyai Daudi, ye kingoam rubet, koboto che kimitei ak inendet;

⁴ ak kiwa gotab Jehovah ak kocher makatinik che bo kabartaet, koam ak kobutyi che kimi koboto inendet agichek; che ma chamdaat eng’ ng’atutik koam chi kobate tisiik ichegei?

⁵ Ak kimwachi ichek kolenji, Weritab chi ko kiptaiyatab sabato.

⁶ Ak kiwa sunagogit eng’ sabato age, ak konetis: ak kimi chi oloto, ne ki resot eunnyi ne bo tai.

⁷ Ak kirib inendet sirik ak Parisaik kole, kogeer ngo tos isoob chi eng’ betutab sabato; si konyor oret ne itaame.

⁸ Ago kinai kabwatutikwak; ak kolenji chichoto ne kitinyei eut ne resot, Ng’eet, tonon eng’ kwen. Ak king’eet kotonon.

⁹ Ak kilenji Jesu ichek, Ateebenok, ale, Tos, chamdaat eng’ ng’atutik keyai ne mie eng’ sabato, anan keyai ne ya? Kesor sobon, anan kebar?

¹⁰ Ak kigeerot Jesu bik tugul, yeityo kolenji chichoto, Chuul eung’ung’. Ak kiyai ko u noto: ak kimieit eunnyi ko u ye konye.

¹¹ Ak kinerekso mising’: ak king’alaljigei ichegei agobo kit ne itoi Jesu.

¹² Kiwa Jesu anyun eng’ betusiechoto, tulwet kosa; ak kisa Jehovah kemout komugul.

Alamalyet taman ak aeng’

¹³ Ak ye kingoeech, koguur alamalyennyi: ak kilewen eng’ choto taman ak aeng’, che kiguure kainenywa che kiyoktoi;

¹⁴ Simon, ne kiguure kainennyi ne bo aeng’ Petero, ak Andrea ng’etab kamet, ak Jakobo ak Johana, ak Pilipu ak Bartolomayo,

¹⁵ ak Matayo ak Tomas, ak Jakobo weritab Alpayo ak Simon ne kigiguure Selote,

¹⁶ Judas weritab Jakobo, ak Judas Iskariot, ne ki ng’wektaindet;

¹⁷ ak kichortagei koboto icheget, ak kotonone ye ribrib, koboto tuiyet ne o ne bo alamalyennyi, ak bik che chang’ che kibunu Judea komugul ak Jerusalem, ak ngegutab nyanjet ole bo komostab Turo ak Sidon, che kibwanei kogasei inendet, ak kisoob eng’ mainwekwak;

¹⁸ ak kigisoob icheget che kiinyalili tamirmirik che muruonen.

¹⁹ Ak kicheng’ tuiyet komugul kotwa inendet: amu kibunu inendet kamuktaet, ak kosoob ichek tugul.

Bik che boiboen, ak bik che kilenjin, Bwa

²⁰ Ak kigeerot alamalyennyi, ak kole, O boiboen okwek che o bonon: amu neng’wong’ bounatetab Jehovah.

²¹ O boiboen okwek che amok rubet nguno: amu tun obiyong’dosi. O boiboen okwek che orirtosi nguno: amu tun ororitosi.

²² O boiboen okwek, ye wechok bik, ak kobesienogei, ak kochurok, ak kowirta kaineng’wong’ kole ya, agobo Weritab chi.

²³ Oboiboitu eng’ betunoto, ak otorombense eng’ boiboindo: amu, ogeero, o melektang’wong’ eng’ kipsengwet: amu kiyachi kwanisiekwak maotik ko u noto.

²⁴ Ago bwa okwek che o magore! Amu kaotaach kagaigaeng’wong’.

²⁵ Bwa okwek, che o biyong’otin nguno! Amu tatun koamok rubet. Bwa okwek, che ororitosi nguno! Amu tatun oteitosi ak orirtosi.

²⁶ Bwa okwek, ye mwaei bik tugul che miach agobo okwek! Amu kigoyachi ko u noto kwanisiekwak maotik che bo lembech.

Chamnyet ne kichamei bunik

²⁷ Ago amwawok okwek che ogase, ale, Ocham bunikwok, oyachi che miach ichek che wechok,

²⁸ oberur ichek che chubok, ak osachi ichek che usok.

²⁹ Ak inendet ne irabachin matanda age igochi matanda age; ak inendet ne rebenen ngorieng’ung’ ko meete agot sumeng’ung’.

³⁰ Igochi chi age tugul ne somin; ak inendet ne rebenen tuguguk ko matata isom kogeny.

³¹ Ak ko u ye omache koyaiywok bik, oyachi ak okwek ko u noto.

³² Ngocham anyun icheget che chamok, otinye kongoi nee? Amu agot kiptengeginik kochamei agichek icheget che chamei.

³³ Ak ngoyachi che miach icheget che yaiywok che miach, otinye kongoi nee? Amu agot kiptengeginik koyaei ko u noto.

³⁴ Ak ngobesendochi bik che omang’u ole tun onyorune, otinye kongoi nee? Amu agot kiptengeginik ko besendochin kiptengeginik alak, si konyor che te chugicheta.

³⁵ Ago ocham bunikwok, ak oyai ne mie, ak obesende, amongen onyoru kogeny; si koeet melektang’wong’, ak oegu werikab Inendet ne Toror Mising’: amu tala inendet eng’ icheget che matinyei kongoi ak che yaachen.

³⁶ Oegu che tinyei rirenetab ge, ko u Kwandang’wong’ ne tinyei rirenetab ge.

Agobo kiruoget ne kiruokyin bik

³⁷ Amoruokyi, si tun koma kiruokwok: amogikyi, si tun koma kigikyok: otiach, si tun kitiachak:

³⁸ ogoite, si tun kegonok; kerutiet ne mie, ne kigigony, ne kigisaisach, kot korara, choto che tun indoi bik tegetikwok. Amu kerutiet ne ogere ko noto ne tun kigerunenok ak okwek.

³⁹ Ak kimwachi kalewenet kolenji, Imuchi kipkoratiat kondochi kipkoratiat? Tos marorokyin tuwai keringet?

⁴⁰ Masiirei alamalyet konetindennyi: ago inendet ne kigonetak kogergeitu ak konetindennyi.

⁴¹ Ak amu nee si igeere betbetiat ne mitei kondab ng’etab komet, ago mebwati bambaniat ne mi kondang’ung’ inyendet?

⁴² Anan imuktoi ano ilenji ng’etab komet, Tupchennyu, inganemun betbetiat ne mitei kondang’ung’, ago mebwati inye bambaniat ne mi kondang’ung’ inyendet? Ee, chombilindoni, inemu korok bambaniat ne mi kondang’ung’ inyendet, si ye kaigeerte komie imuch anyun inemu betbetiat ne mi kondab ng’etab komet.

⁴³ Amu mami ketit ne mie ne yiei logoek che yaach; ama mi ketit ne ya ne yiei logoek che miach.

⁴⁴ Amu kinae ketit age tugul logoekyik. Amu mabutei bik logoekab mogoonik eng’ katok, ak mabutei bik logoekab sabibuk eng’ ketitab katok.

⁴⁵ Inemu chito ne mie kit ne mie kobunu konoruet ne mie ne mi muguleldanyi; ak inemu chito ne ya kit ne ya kobunu konoruet ne ya ne mi muguleldanyi: amu che mwaei kutinnyi ko che nyiitat muguleldo.

Tuguk che kigasei ak key ae

⁴⁶ Amu nee si oguurena Kiptaiyat, Kiptaiyat, amoyae tuguk che amwae?

⁴⁷ Chi age tugul ne nyonjina, ak kogas ng’alekyuk, ak koyai, aboruok chito ne kergei:

⁴⁸ kergei inendet ak chito ne teechei got, ne kibal kororokto mising’, ak konde lumeiywot ruandet: ak ye kingo chang’a beek, korieb beekab mogoch goyoto, ama imuch kotumdum: amu kiga kiteech komie.

⁴⁹ Ago inendet ne kasei, ama yaei, ko kergei ak chito ne kiteech got ng’ung’unyek ama lumji ng’ony lumeiywot; ak kirieb beekab mogoch, ak kilul ngunoto; ak kieet luletab goyoto.