LUKA 5 - BUKUIT NE TILIL

Kuurset ne bo alamalyet ne bo tai

¹ Ak ye kingota kogiichi tuiyet inendet, ak kogasei ng’olyotab Jehovah, kotonon inendet eng’ ngegutab araraita ne bo Genesaret;

² ak kigeer moingonik aeng’ che bo beek kotonondos eng’ ngegutab araraita: ago kiga kochorgei ramik koba komwet regereiywekwak che kiname njirenik.

³ Ak kilany moinget age, ne ki bo Simon, kosom kole, konaktae kolooit kitigin eng’ ngegut. Ak kiteb ng’ony anyun ak konet tuiyosiek komi moinget.

⁴ Ak ye kingo kagoges ng’alalennyi, kolenji Simon, Ta ikweri moinget kwo ole chang’ beek, ak ochoorte regereiywekwok oramisie.

⁵ Ak kiwol Simon kole, Kiptaiyandani, kogiboisie kemout komugul, ama kinyoru kiy: ago achoortoi regereiywot amu ng’olyondeng’ung’.

⁶ Ak ye kingo kagoyai ko u noto, konam njirenik ng’isiat; kot kotoi kong’etyo regereiywekwak;

⁷ ak king’wech bik che kiboisiei tugul che kimi moinget age, kole kobwa kotoret. Kobwa anyun, ak konyiit moingonik tuwai, kot kotoi moingonik kosu.

⁸ Ago ye kingogeer Simon Petero, kobutyi kotung’oikab Jesu, ak kole, Istoenage, amu a chi ne bo tengek, ee Kiptaiyandani.

⁹ Amu kikwong’, ak tugul che kimi koboto inendet, agobo njirenik che kiga nam;

¹⁰ kikwong’io agichek Jakobo ak Johana, werikab Sebedi, che kiboisiei tugul koboto Simon. Ak kilenji Jesu Simon, Ameiyweisie; koboch nguno iegu ne irame bik.

¹¹ Ak ye kingo kagoget moingonikwak kobwa ngegut, kobagakta tugul, ak kosub inendet.

Kisoobi chi ne amei mogondosik

¹² Ak kingota komitei nganaset age, ogeero, chito ne ki nyiitat mogondosik: ak ye kingogeer inendet Jesu, kobut kosieb mo, ak kosaisai kole, Kiptaiyandani, ngicham, imuchi itilila.

¹³ Ak kiiyogoito Jesu anyun eunnyi, ak kotwa ak kole, Kaacham; tililitu. Ak ngunoto kobagakta mogondosik inendet.

¹⁴ Ak king’at anyun kolenji, Amat imwachi chi: ago ui ak iborjige tisiindet, ak igoite che bo katilileng’ung’, ko u ye king’at Musa, koek baornatet eng’ icheget.

¹⁵ Ak kitesak mising’ koiyesta logoiywekyik: ak kiiyumgei tuiyosiek che chang’ kobwa si kogas ng’alekyik ak kisoob eng’ mianwekwak.

¹⁶ Ago kiitabangei inegei kwo surkwen kosa.

Kisoobi chi ne meat borto

¹⁷ Ak kiinetisiei eng’ betut age eng’ betusiechoto; ak kimi Parisaik ak konetik che bo ng’atutik kotebyei eng’ oloto, che kibunu nganaset age tugul ne bo Galili ak ne bo Judea ak ne bo Jerusalem: ak kimi kamuktaetab Kiptaiyat koboto inendet kosoobe bik.

¹⁸ Ak ogeero, kilau bik chito eng’ itogut ne ki meat borto: ak kicheng’ oret ne imute kwo go, ak konde inendet tainnyi.

¹⁹ Ak ye kimata konyor ole imute kwo go amu chang’indab bik, kolany got barak, ak kochoortae inendet itogunnyi kobun ole kigisieb, agoi kwenut eng’ taitab Jesu.

²⁰ Ak kingogeer Jesu kayanenywa, kolenji, Chichi, kagenyoun kaat tengekwogiguk.

²¹ Ak kitoi sirik ak Parisaik kobwat agobo ng’olyondonoto kole, Ng’o nito mwaei ng’alechu yaachen? Ng’o ne imuchi konyochi chi kaat tengekwogik kobate Jehovah inegei?

²² Ago ye kingonai Jesu anyun kabwatutikwak, kowolji kolenji, Obwati nee eng’ mugulelwekwok?

²³ Nee ne nyamnyum, ngele, Kaginyoun kaat tengekwogiguk; anan ngele, Ng’eet ak iwendote?

²⁴ Ago si kobiit onai ole tinyei kimnatet Weritab chi eng’ ng’ony konyochi kaat bik tengekwogik (kolenji chito ne ki meat borto), Amwaun ale, Ng’eet, ib itogung’ung’ ak iwe gong’ung’.

²⁵ Ak king’eet ngunoto anyun eng’ tainywa, ak kiib kit ne karue, ak kwo gonnyi, kolosunoti Jehovah.

²⁶ Ak kokwong’io ichek tugul ak kolos Jehovah; ak kinyi ichek kaiyweisiet, ak kole, Kagegeer rani tuguk che kikwong’e.

Kuurset ne kiguurei Lawi

²⁷ Ak kingobata tuguchu kwo kogeer taagindetab aisurut, ne kiguure Lawi, kotebyei eng’ ole kitaage aisurut, ak kilenji, Isubwa.

²⁸ Ak kibagakta tugul, ak kong’eet kosub inendet.

²⁹ Ak kichopchi Lawi inendet igorta ne o eng’ gonnyi; ak kimi tuiyet ne o ne bo taagikab aisurut ak bik alak che kitebyei eng’ amisiet koboto inendet.

³⁰ Ak kiing’unyng’ung’ji Parisaik ak sirikwak alamalyennyi, kole, Kalya si oamisiei ak oeeisei koboto taagikab aisurut ak kiptengeginik?

³¹ Ak kiwolji Jesu kolenji, Mamage kiy chepkerichot bik che chamegei; kobate che miandos.

³² Kima anyo aguur che bo iman, ago kiptengeginik, si kosik.

Ng’olyotab karugutetab ge

³³ Ak kilenji inendet, Irugutegei konyil che chang’ alamalyetab Johana, ak kosaei, ak yaei ko u noto agichek che bo Parisaik; ago amisiei cheguk ak koeeisei.

³⁴ Ak kilenji Jesu ichek, Tos omuchi ogochi korugutgei che kogiguurji katunisiet, kota komi sandet koboto icheget?

³⁵ Ago bwanei betusiek che tun kiistoe ichek sandet, korugutgei anyun eng’ betusiechoto.

³⁶ Ak kimwachi ichek anyun kalewenet kogeny kolenji, Mami chi ne kerei akwot ne bo ngoriet ne leel ak konapchi ngoriet ne os; amu ngo yai ko u noto ko kereri noto leel, ak kogeny, manamegei akwot ne leel ak ne os.

³⁷ Ama mi chi ne indoi divaik che leelach lolotinwek che osen; ngo yai ko u noto ko kereri divaik lolotinwek, ak kotumdagei, ak kong’emogis lolotinwek.

³⁸ Ago kanyol kinde divaik che leelach lolotinwek che leelachen.

³⁹ Ama mi chi ne ngo kagoee divaik che bo keny ko ta komach che leelach: amu mwaei kole, Miachen che bo keny.