LUKA 4 - BUKUIT NE TILIL

Yamstab Jesu

¹ Ak kiweek Jesu kobunu Jordan ko nyiitat Tamirmiriet ne Tilil, ak kiimut Tamirmiriet kwo surkwen

² ak kotebi betusiek artam koyomei oindet. Ak ma am kiy eng’ betusiechoto: ak ye kingogesgei betusiechoto, koam rubet.

³ Ak kilenji oindet, Ngo i Weritab Jehovah, ing’at koi koek makatiat.

⁴ Ak kiwolji Jesu inendet kolenji, Kigisir kele, Masobei chi eng’ makatiat inegei.

⁵ Ak kiimut anyun oindet kotogosta, kwo koborji bororiosiek tugul che bo ng’ony eng’ sainato.

⁶ Ak kilenji anyun oindet inendet, Agonin kimnatoni tugul, ak telunatenywa tugul; amu kigigona; ak agochini age tugul ne amakyini.

⁷ Ngot iloswa anyun, eng’ tainnyu, kobunjinin tugul.

⁸ Ak kiwolji Jesu kolenji, Kigisir kele, Ilosu Kiptaiyat Jehovah neng’ung’, ak iboisiechi inendet inegei.

⁹ Kiimut anyun inendet Jerusalem, kwo kotonone kimonjogutab hekalut, ak kolenji, Ngo i Weritab Jehovah, iwirjige ng’ony eng’ yu:

¹⁰ amu kigisir kele, Iyogu malaikaisiekyik agobo inye, si koribin:

¹¹ ak Kotaachin eng’ eunekwak, Si marus koita keldang’ung’.

¹² Ak kiwolji Jesu kolenji, Kigimwa kele, Meyom Kiptaiyat Jehovah neng’ung’.

¹³ Ak ye kingoges oindet yomset age tugul, kobagakta inendet ne matia.

Jesu eng’ Nasaret

¹⁴ Koweek anyun Jesu Galili eng’ kimnatetab Tamirmiriet: ak kiyom logoiywek korotinwek tugul agobo inendet eng’ ole negite oloto.

¹⁵ Ak kiinetisiei eng’ sunagogisiekwak, ak kiilos inendet bik tugul.

¹⁶ Kinyo anyun Nasaret, ole kinerjin: kiwa sunagogit, eng’ betutab sabato, ko u ye kicham kowendi, ak kotonon si kobiit kosoman.

¹⁷ Ak kigigochi inendet bukuit ne mamanat ne bo maotiot Isaia. Ak king’any bukuit, konyor ole kigisir kele,

¹⁸ Mi Tamirmirietab Kiptaiyat kobota, Ami kiila si kobiit aamji kibananok logoiywek che miach: Kiiyokwa si kobiit aamji luulenik katiaget, Asi kobiit kogeerto kipkoratinik, Ak atiach che kigiguoten.

¹⁹ Si kobiit aamda kenyit ne chamat eng’ Kiptaiyat.

²⁰ Ak kimaman bukuit, ak koweekyi kogeny kiboitiot, ak koteb ng’ony: ak kiichiilji kong’ inendet bik tugul che kimi sunagogit.

²¹ Ak kitoi kolenji bichoto, Kagosulda rani sirutioni eng’ itikwok.

²² Ak kibaorianji tugul inendet, ak kokwong’io eng’ ng’alek che bo mieindo che kamong’une kutinnyi: ak kile ichek, Tos ma weritab Josep nito?

²³ Ak kiwolji ichek kolenji, Iman omwawa kalewenoni, Isoopge inye, chepkerichot: tuguk tugul che kigegas kele kiyaak eng’ Kapernaum, iyai choto agichek eng’ yu eng’ emoning’ung’.

²⁴ Ak kilenji, Amwawok iman, ale, Mami maotiondo ne chamaksei eng’ emennyi.

²⁵ Ago amwawok iman ale, Kimi mosogik che chang’ Israel eng’ betusiek che bo Elija, yu kiga kiger kipsengwet kenyisiek somok ak arawek lo, yu kiga nyo rubet ne o emet tugul;

²⁶ ago ma kiyokto Elija kwo oldab age eng’ ichek, kobate kiwa Sarepta eng’ emetab Sidon agoi oldab kwondo age ne ki mosok.

²⁷ Ak kimi che chang’ che kitinyei mogondosik eng’ Israel eng’ betusiekab maotiot Elisha; ak kima kisoob chi eng’ ichek kobate Naaman inegei, Suriaindet.

²⁸ Ak kinyi neregek ichek tugul eng’ sunagogit ye kingogas ng’alechuto;

²⁹ ak king’eetyo kotoorta inendet komanda eng’ nganaset, ak kiimut kwo tulwet barak ole kigiteech nganasenywa, kolen kotoortae chemng’esut.

³⁰ Ago kisiirtoe kwenunywa kwo.

Kisoobi chi ne tinyei tamirmirietab oindet ne muruon

³¹ Ak kichorjigei anyun Kapernaum, nganaset ne bo Galili. Ak kiinet bik eng’ betutab sabato:

³² ak kikwong’io eng’ konetisiennyi; amu kitinyei kimnatet ng’olyondennyi.

³³ Ak kimi chi sunagogit, ne kitinyei tamirmirietab oindet ne muruon; ak kiwaach eng’ waagat ne o,

³⁴ kole, Bagaktech! Kiting’ege nee ak inye, Jesu ne bo Nasaret? Kenyo inye si ibarech? Kaanain inye ale i Ne Tilil ne bo Jehovah.

³⁵ Ak kiger kong’ Jesu inendet, ak kolenji, Sis, ak imong’u eng’ inendet. Ak kingo kagowirji oindet kwenunywa, komong’une inendet anyun, komata koita kiy.

³⁶ Ak kikwong’io bichoto tugul, ak kong’alaljigei ichegei kole, Nee ng’olyondoni? Amu kang’at eng’ kimnatet ak kamuktaet tamirmirik che muruonen, si komong’.

³⁷ Ak kiyom anyun logoiywek komoswek tugul che bo emonoto agobo inendet.

Kosoobi kametab osotiotab Simon, ak kisoobi bik alak

³⁸ Ak kimanda eng’ sunagogit ak kwo gab Simon. Kiamei kametab osotiotab Simon eset ne korom; ak kisaisai bik Jesu agobo inendet.

³⁹ Ak kotonon eng’ ye negit, ak koger kong’ eset; kibagakta anyun eset inendet: ak ngunoto kong’eet ak koboisiechi ichek.

⁴⁰ Ak ye ki negit kororokta asista, komutyi bik tugul bikwak che kimiandos eng’ korotwek che terotin: ak kiigonoor eunekyik age tugul eng’ ichek, ak kosoob.

⁴¹ Komong’une anyun oik bik che chang’, kowaachei kolen, Inyendet ko i Weritab Jehovah. Koger kong’ Jesu icheget, ma chamji kotwek, amu kiingen ichek kole, inendet ko Kristo.

⁴² Ak ye kingo kagoeech, komong’ eng’ oloto kwo surkwen: ak kicheng’at tuiyosiek inendet, koba ole mi, komach icheget korany inendet kole, amat kwo kobagakta ichek.

⁴³ Ago kilenji ichek, Kanyolja aamda logoiywek che miach che bo bounatetab Jehovah eng’ nganasok alak agichek: amu kigiyokwa agobo noto.

⁴⁴ Ak kiamdaat anyun eng’ sunagogisiek che bo Galili.