LUKA 3 - BUKUIT NE TILIL

Johana Kabatisanindet ak ng’alekyik

¹ Ak eng’ kenyit ne bo taman ak mut ne bo laitornatetab Tiberio Kaisari, ye ki bounindet ne bo Judea Pontio Pilato, ak Herod ko ki kiruogindet ne bo Galili, ak ki kiruogindetab Iturea ak Trakoniti Pilipu ng’etab kametab Herod, ak ki Lusania kiruogindet ne bo Abilene,

² eng’ betusiek che bo tiseinatet ne o ne bo Anas ak Kaiapa, koityi anyun ng’olyotab Jehovah Johana weritab Sakaria eng’ surkwen.

³ Ak kinyo komoswek tugul che bo tabanwekab Jordan, koamdooti kabatisanetab sigunet agobo nyoetab kaat ne bo tengekwogik;

⁴ ko u ye kigisir eng’ bukuitab ng’alekab maotiot Isaia, kele, Kutitab chi ne ititeni eng’ surkwen kolen, Ochob oretab Kiptaiyat, Olititoti ole bunoti.

⁵ Tun kilong’u atebwet age tugul, Ak tun kiribribi tulwet age tugul ne o ak ne ming’in: Ak tun kilititi che kunuren, Ak kichaboi ortinwek che sing’ortot:

⁶ Ak tun keerei bik tugul yetunetab Jehovah.

⁷ Kimwachi anyun tuiyosiek che kibendi ole mi inendet, si kobatisan, kolenji, Ee okwek lagokab erenokab ng’wonet, ng’o ne kagoteeiywok omweune nereknatet ne tun nyonei?

⁸ Oii anyun logoek che nyoljin sigunet, amotau omwa eng’ mugulelwekwok ole, Kitinye kwandanyo Abraham: amu amwawok ale, eng’ koichu komuchi Jehovah kong’eetyi Abraham lagok.

⁹ Agot nguno ko kaginde aiywet tigitikab ketik: noto anyun, ketit age tugul ne maiyei logoek che miach, keebei, ak kewirji ma.

¹⁰ Ak kiteebe inendet tuiyosiek kole, Kiyai nee anyun?

¹¹ Ak kiwolji ichek kolenji, Inendet ne tinyei sumotik aeng’, kogochi ne matinyei; ak ingoyai ko u noto agine ne tinyei amitwogik.

¹² Ak kibwa agichek taagikab aisurut si kibatisan, ak kolenji inendet, Konetindoni, kiyai nee?

¹³ Ak kimwachi ichek kolenji, Amomage bik tuguk che siirei che kiging’at.

¹⁴ Ak kiteebe askarik agichek kolenji, Kiyai nee anyun achek? Ak kilenji, Amomu chi age tugul, anan orebe chi kiy; ago ingoyamak melekwekwok.

¹⁵ Ak kingota kogeni bik kit ne biitu, ak kogereri met eng’ mugulelwekwak bik tugul agobo Johana, kolen ngo tos Kristo inendet;

¹⁶ kowolji Johana ichek tugul kolenji, Abatisanok eng’ beek iman; ago nyonei inendet ne kim kosiira, ne manyoljina atiach anokab kweonikyik: ibatisanok inendet eng’ Tamirmiriet ne Tilil ak mat:

¹⁷ tinyei keibet eng’ eunnyi, ak kotilili komie ruanyut, ak koyumji nganok chogennyi; ago beelei metetek eng’ mat ne ma misoksei.

¹⁸ Kiamji anyun bik logoiywek che miach koboto kotigonutik alak che chang’.

¹⁹ Ago ye kingo kagoger kong’ Johana kiruogindet Herod agobo Herodia, osotiotab ng’etab kam, ak agobo tuguk tugul che yaachen che kiga koyai Herod,

²⁰ kotesyi nito anyun chun tugul, noto ko kiger Johana eng’ korgoret.

Kabatisanet ne bo Jesu

²¹ Ak ye kingo kagibatisan bik tugul, ak ko kagibatisan Jesu agine, ak ye kisaei, koyatak kipsengwet,

²² ak kochorjigei inendet Tamirmiriet ne Tilil, eng’ kergeindab cheptuget, ak komong’une kutit kipsengwet kole, Inyendet ko i Werinnyu, chamanennyu; abaibai mising’ eng’ inye.

Tetutikab ibinwek che kigosiirto agobo Jesu

²³ Ak kingotau Jesu konetisiei, ko ki negit kenyisiek sosom, (kolen ichek abere) weritab Josep, weritab Heli,

²⁴ weritab Matat, weritab Lawi, weritab Melki, weritab Janai, weritab Josep,

²⁵ weritab Matatia, weritab Amos, weritab Nahum, weritab Esli, weritab Nagai,

²⁶ weritab Maat, weritab Matatia, weritab Semein, weritab Josek, weritab Joda,

²⁷ weritab Joanan, weritab Resa, weritab Serubabel, weritab Sealtiel, weritab Neri,

²⁸ weritab Melki, weritab Adi, weritab Kosam, weritab Elmadam, weritab Er,

²⁹ weritab Jose, weritab Elieser, weritab Jorim, weritab Matat, weritab Lawi,

³⁰ weritab Simeon, weritab Juda, weritab Josep, weritab Jonam, weritab Eliakim,

³¹ weritab Melea, weritab Mena, weritab Matata, weritab Natan, weritab Daudi,

³² weritab Jesii, weritab Obed, weritab Boas, weritab Salmon, weritab Nason,

³³ weritab Aminadab, weritab Armi, weritab Hesron, weritab Peres, weritab Juda,

³⁴ weritab Jakobo, weritab Isak, weritab Abraham, weritab Tera, weritab Nahor,

³⁵ weritab Serug, weritab Reu, weritab Peleg, weritab Eber, weritab Sela,

³⁶ weritab Kainan, weritab Arpaksad, weritab Sem, weritab Noa, weritab Lamek,

³⁷ weritab Metusela, weritab Enok, weritab Jared, weritab Maalaleel, weritab Kainan,

³⁸ weritab Enos, weritab Set, weritab Adam, weritab Jehovah.