LUKA 24 - BUKUIT NE TILIL

Keririt ne kima komi kiy

¹ Ak eng’ betut ne bo tai ne bo wigit, ko kaeech emet, kobwa kererit, koibu nyamdutik che kiga kochob.

² Ak kinyor ko kagemilda koita eng’ kererit.

³ Ak kiba orit, amanyor bortab Kiptaiyat Jesu.

⁴ Ak kingab kagerer met agobo noto, ogeero, kitonondos eng’ ye negit ichek murenik aeng’u che tinyei ngoroik che lilei bich:

⁵ ak kingoiyweis, kong’uruk, kotiing’e togochikwak ng’ony, kolenji ichek, Amu nee si ocheng’e ne sobei eng’ oldab che kigobek?

⁶ Ma komi yu, ago kagong’eet: obwat kit ne kimwawok kota komi Galili,

⁷ kolen kanyol kinde eunekab bikab tengek Weritab chi, ak kigartat, ak kong’eet eng’ betutab somok.

⁸ Kobwat anyun ng’alekyik,

⁹ ak koweektagei eng’ kererit, ak komwachi taman ak agenge, ak chun tugul alak.

¹⁰ Ki Maria Magdalene, ak Joana, ak Maria kametab Jakobo, ak kobogorisiek alak che kimi koboto ichek, che kimwachi che kiyoktoi tuguchoto.

¹¹ Ak kigeer bichoto ng’alechato ko u tangoi; ak kima iyan ichek.

¹² Ago king’eet Petero, ak kolabat kererit; kiing’uruk koiit orit, kogeer ngoroik ichegei; ak kwo, kokwong’oti agobo tuguk che kagoyagis.

Koborugei Jesu eng’ oret kowendi Emau

¹³ Ak ogeero, kibendi aeng’u eng’ icheget betunoto nganaset age ne kiguure Emau, ne ki bandab maelisiek tisab ak nusu kong’eete Jerusalem.

¹⁴ Ak king’alaljinotegei agobo ng’alechuto tugul koyaagis.

¹⁵ Ak kingota kong’alaljinotegei ak koteebegei, korikyi Jesu ichek ak koba tugul.

¹⁶ Ago kigerogis konyekwak si manai inendet.

¹⁷ Ak kilenji ichek, Nee ng’alechu omwachinotige okwege obendi? Ak kitononso, kosiriny togochikwak.

¹⁸ Ak kiwolji age eng’ ichek, ne keguure Kleopa, kolenji, Tos i too inye eng’ Jerusalem si menai tuguk che koyaagis eng’ oloto eng’ betusiechu?

¹⁹ Ak kilenji ichek, Nee tuguchoto? Ak kilenji, Tuguk che kiyaak agobo Jesu ne bo Nasaret ne ki maotiot ne kim eng’ boisiet ak ng’olyot eng’ taitab Jehovah and eng’ bik tugul:

²⁰ ak ko u ole kiigoito tisiik che eechen ak bounikyok si kiruokyi kiruoget ne bo meet, ak kigartat.

²¹ Ago kogimang’u kelen inendet ne itiachi Israel. Ee, ak koboto choto tugul ko betutab somok rani koboch ngab kobata ng’alechuto.

²² Ak kagonech kobogorisiek alak che kagimi tugul kekwong’, che kaga musta kererit;

²³ ak ye kamata konyor bortanyi, kobwa, kole, kamong’ji ichek malaikaisiek, che kamwa kole, sobei inendet.

²⁴ Ak kaba alak kererit che kami kobotech, konyor ko u noto ko u ye kaga mwa kobogorisiek: ago ma keer inendet.

²⁵ Ak kilenji anyun bichoto, Ee, che berberen, ak ko tamusen mugulelwek kot ko mata koyan tuguk tugul che kimwa maotik!

²⁶ Kima nyolji Kristo konyalil eng’ tuguchu, si komong’ji torornatennyi?

²⁷ Ak kitoi koboch Musa ak maotik tugul, ak kiiarorji ichek eng’ sirutik tugul ng’alek agobo inendet.

²⁸ Ak kingorikta nganaset ole kibendi koigei inendet ne machei kosiirto.

²⁹ Ak kiisimji, kole, Tebi kobotech: amu karikta koimen, ak machei koratarat. Ak kiwa go kotebi tugul.

³⁰ Ak ye kingo kagotebi ng’ony tugul koamisiei, konam makatiat, koberur, kobutul, ak kogochi ichek.

³¹ Ak kiyatogis konyekwak, ak konai inendet; kobetito eng’ tainywa.

³² Ak kilenjigei ichegei, Tos kama lal mat eng’ mugulelwekyok, yu kang’alalwech eng’ oret, kong’ang’wech sirutik?

³³ Ak king’eetyo eng’ sainato, koweektagei Jerusalem, ak kinyor taman ak agenge ko katuiyo, ak che kimi koboto ichek,

³⁴ kole, Kang’eet Kiptaiyat iman, ak kang’ang’jigei Simon.

³⁵ Ak kimwachi ng’alek che kayaak eng’ oret, ak ko u ye kagonyit inendet kobutuli makatiat.

Koborjingei Jesu che kiyoktoi

³⁶ Ak kingota komwaei tuguchu, kotonon inendet eng’ kwenunywa, ak kolenji ichek, Ingoteb kalyet eng’ okwek.

³⁷ Ago kiarogenso ak koiyweis, ak kilen kageer tamirmir.

³⁸ Ak kilenji ichek, Koarogenji nee? Ak amu nee si kong’eetyo kererwekab met eng’ mugulelwekwok?

³⁹ Ogeer eunekyuk ak kelyekyuk, ole a inendet: osapsaba, ak ogeer; amu matinyei tamirmiriet borto ak kowek, ko u yu ogeere atinye.

⁴⁰ Ak ye kiga komwa ni, koborji eunekyik ak kelyekyik.

⁴¹ Ak kingo tom koyan ichek amu boiboiyet, ak kwong’et, kolenji, Otinye eng’ yu kiy ne kiamei?

⁴² Ak kiigochi kebebertab njiriot ne kagiwatan.

⁴³ Ak kinam ak koam eng’ tainywa.

⁴⁴ Ak kilenji ichek, Chu ko ng’alekyuk che kigamwawok, ye kingota ami kobotok, ko u ye kanyol kosulda tuguk tugul, che kigisir eng’ Ng’atutik che bo Musa, ak eng’ maotik, ak eng’ tienwogikab kalosunet, agobo ane.

⁴⁵ Koyat anyun ng’omnatosiekwak, si kobiit konai sirutik;

⁴⁶ ak kilenji ichek, Kigisir ko u noto, kele, nyoljin Kristo konyalil, ak kong’eet kogeny eng’ che kigobek eng’ betutab somok;

⁴⁷ ak keamdaat eng’ bororiosiek tugul sigunet ak nyoetab kaat ne bo tengekwogik eng’ kainennyi, kitaune Jerusalem.

⁴⁸ O baorinikab tuguchuto.

⁴⁹ Ak ogeero, ayogu kayomisetab Baba kotebi eng’ okwek: ago otebi okwek eng’ nganaset, agoi kilaakwok kimnatet ne bunu barak.

Kotogostoi Jesu

⁵⁰ Ak kiindochi ichek agoi koit Betania: ak kinamji barak eunekyik, ak koberur ichek.

⁵¹ Ak kingota koberuri ichek, kobesiegei anyun, ak kigimut kwo kipsengwet.

⁵² Ak kiilos inendet, ak koweektagei Jerusalem eng’ boiboindo ne o:

⁵³ ak kimi kotugul hekalut, kolosu Jehovah.