LUKA 23 - BUKUIT NE TILIL

Komi Jesu taitab Pilato, bounindet ne bo Rom

¹ King’eetyo anyun tuiyet komugul, ak komutyi inendet Pilato.

² Ak kitoi anyun kotaam inendet, kole, Kiginyoru chichi komaasi bororiennyo, ak koetei kigochi Kaisari kodi, ak komwaei inendet kole, A Kristo laitoriat.

³ Ak kiteebe inendet Pilato, kole, I laitoriatab Yahudik? Ak kiwolji kole, Kaimwa.

⁴ Ak kilenji Pilato tisiik che eechen ak tuiyosiek, Ma anyorji lelutiet chichi.

⁵ Ago kiisimji mising’, kole, Kiinde chaamset bik, konetoti eng’ Judea komugul, kotoune Galili agoi koit oli.

Komi Jesu taitab Herod

⁶ Ago kingogas Pilato ng’olyondonoto, koteeb kole, Tos Galilindet chichi?

⁷ Ak kingonai kole bo bounatet ne bo Herod, koyokto kimutyi Herod, ne kimi agine Jerusalem betusiechoto.

⁸ Kingogeer Herod Jesu, kobaibait mising’: amu kimachei koboch keny kogeer inendet, amu kiga kogas tuguk che chang’ agobo inendet; ak kimachei kogeer kwong’utiet age koyaak eng’ inendet.

⁹ Ak kiteepse inendet eng’ ng’alek che chang’; ago ma wolji kiy.

¹⁰ Ak kitonondos tisiik che eechen ak sirik, ak kotaam inendet eng’ kimnatet.

¹¹ Ak kiiming’in inendet Herod ak askarikyik, ak kochombil, ak kolaakyi ngoriet ne kararan mising’ ak koweekyi Pilato kogeny.

¹² Ak kiek choronoi Herod ak Pilato eng’ betunoto: amu kita kosurtos ichegei eng’ tai.

Pilato, Baraba ak Jesu

¹³ Kiguur anyun Pilato tisiik che eechen ak bounik koboto bik kobwa tugul,

¹⁴ ak kilenji ichek, Komutwa chichi, ak komwa ole imaasi bik: ak ogeero, kaatebe anendet eng’ taing’wong’, ak ma anyorji chichi lelutiet eng’ ng’alechato otaame inendet:

¹⁵ achicha, agot Herod agine; amu kaweekwech inendet; ak ogeero, ma yai kiy inendet ne nyoljin meet.

¹⁶ Noto anyun, abire inendet, si atiach.

¹⁷ Amu ki ng’atutiet kotiakyi agenge eng’ betutab igorta.

¹⁸ Ago kibolyo tugul, kole, Iste chichi, ak itiakwech Baraba:

¹⁹ ne kiga kitoorji korgoret, amu chaamset ne kiyai eng’ nganaset, ak rumisiet.

²⁰ Ak king’alalji Pilato icheget kogeny, komachei kotiach Jesu;

²¹ ago kibolyo ichek, kole, Igartat eng’ kimurtoiyot, igartat inendet eng’ kimurtoiyot.

²² Ak kimwachi ichek ne bo somok, kolenji, Kalya, nee yaitiet ne kiyai chichi? Ma anyorji ng’olyot inendet ne nyoljin kome: noto anyun abire inendet si atiach.

²³ Ago kites kobolyo mising’, komachei kole kigartat. Ak kiiterteris kutuswekwak.

²⁴ Ak kitil anyun Pilato kiruoget koyaak ko u ye kimach ichek.

²⁵ Ak kiitiach inendet ne kiga kitoorji korgoret agobo chaamset ak rumisiet, ne kaga kosom ichek; ago kiigoito inendet Jesu si kobiit koyachi ko u ye kimachei.

Kigartati Jesu

²⁶ Ak kingota komuti inendet, konam Simon, Kurenindet, ne kibunu koret age, ak kosutyi kimurtoiyot, si kobiit koib kosubi Jesu.

²⁷ Ak kiisubi tuiyet ne o ne bo bik, koboto kobogorisiek che kiiteiyoti ak korirjinoti inendet.

²⁸ Ago kiweleljigei Jesu ichek kolenji, Tibikab Jerusalem, amoririe agobo ane, ago orirjige, ak lagokwok.

²⁹ Amu, ogeero, bwanei betusiek, che tun len ichek, Kiberuri sonotinwek, ak mootinwek che ma iiyo, ak kinaik che ma kireri.

³⁰ Yeityo kotoi ichek kolenji tulonok, Oluuljech; ak kolenji tulonok che mengech, Otuchech.

³¹ Amu ngot koyai tuguchu eng’ ketit ne tuon, koteptoi ano anyun eng’ ne yaamat?

³² Ak kimitei kiptengeginik aeng’u, che kigimuti koboto inendet, koba kebar.

³³ Ak kingoit ye kiguure Terta, ko yoto ole kigigartate inendet ak kiptengeginichoto, age eng’ komostab tai ak age eng’ komostab katam.

³⁴ Ak kile Jesu, Baba, nyochi kaat ichek; amu ma nai kit ne yaei. Ak kipchechigei ngoroikyik, eng’ seretab barbarek.

³⁵ Ak kitonondos bik kogeerei. Ak kororechi inendet bounik kole, Kisoru alak; ingosorgei ibak, ngo Kristo nito, ne lewenot ne bo Jehovah.

³⁶ Ak kichurachur agichek askarik inendet, kobwanei ye mi inendet, kogochin siki,

³⁷ kolen, Ngo i Laitoriatab Yahudik, isoruge.

³⁸ Ak kimi sirutik metinnyi barak, che mwaei kolen, NI KO LAITORIAT NE BO YAHUDIK.

³⁹ Ak kichurachur inendet age eng’ kiptengeginichoto kiga kigartat, kole, Tos ma i Kristo inye? Soruge ak isoruech ak achek.

⁴⁰ Ago kiwol age, ak koger kong’ kole, Meiywei Jehovah, agot inye, ak imi kagikyinonoto?

⁴¹ Ago bo iman nenyo; amu kagigonech ko u boisionikyok: ago ma yai chichi kiy ne ma nyolu.

⁴² Ak kile, Jesu, ibwata ye tun inyone eng’ bounateng’ung’.

⁴³ Ak kilenji Jesu inendet, Amwaun iman, ale, Kitebye tuwai rani eng’ Paradis.

Meetab Jesu

⁴⁴ Ak ki olo bo sait lo, koimenit emet komugul agoi sait sogol,

⁴⁵ ak kima kota koluu asista: ak kigerer kwenutab anget ne kiga kioiye ole tilil.

⁴⁶ Ak kitwek Jesu eng’ kutit ne o, kole, Baba, kande tamirmiriennyu euneguk: ak kingo kagomwa ni, kogoito tamirmiriet.

⁴⁷ Ak kingogeer kiptaiyatab bogol tuguk che kayaagis, kolos Jehovah, kole, Koga bo iman chichi.

⁴⁸ Ak kingogeer tuguk che kayaagis tuiyosiek tugul che kiga koyumgei si korat setio, koweeigei kolugotegei tegetik.

⁴⁹ Ak kitonondos eng’ ye loo tugul che kiingengei, ak kobogorisiek che kiisubu inendet kobunu Galili, kole si kogeer tuguchuto.

Tubetab Jesu

⁵⁰ Ak ogeero, chito ne kigiguure Josep, chitab kapkiruok, chito ne mie, ak ko bo imanda

⁵¹ (ak kima kochamei chichoto kiruogenywa ak boisienywa), ki bo Arimatea inendet, nganaset ne bo Yahudik, ne kiigeni agine bounatetab Jehovah:

⁵² kiwa chichito ole mi Pilato, kwo kosom bortab Jesu.

⁵³ Kochoor konyo ng’ony, ak kotaae anget ne bo katanit, ak konde kererit ne kigibal ruandet, ne kitom ketupchi chi.

⁵⁴ Ak ki betutab Chobet, ak kiga rik sabato.

⁵⁵ Ak kiisubu kobogorisiek, che kigabwa koboto inendet kobunu Galili, ak kogeer kererit, ak ole kigindoitoi bortanyi.

⁵⁶ Ak kiweeigei, koba kochob nyamdutik ak mwanik. Ak kiimuuny eng’ betutab sabato ko u ng’atutiet.