LUKA 22 - BUKUIT NE TILIL

Chaamset ne kichaame Judas Jesu

¹ Kirik anyun igorta ne bo makatinik che ma kinde mermerek, ne kiguure Paska.

² Ak kicheng’ tisiik che eechen ak sirik ole bartoi inendet; amu kiiywei ichek bik.

³ Ak kichut Setani Judas ne kiguure Iskariot, ne ki age eng’ taman ak aeng’.

⁴ Ak kiwa kong’alal ak tisiik che eechen ak kiptainik, ole ng’wektochindoi inendet ichek.

⁵ Kiboiboitu anyun bichoto, ak kochamnyechi kogochi inendet fedaisiek.

⁶ Kocham anyun inendet, ak kocheng’ boroindo kong’wekyi inendet ichek eng’ ole mami bik che chang’.

Chobet agobo Paska

⁷ Ak kiit anyun betut ne bo makatinik che ma kinde mermerek, betut ne ki kanyol koeny aruetab paska.

⁸ Ak kiiyokto Petero ak Johana, kole, Oba ochobwech paska, si kobiit keam.

⁹ Ak kilenji, Imache kebe kechob eng’ ano?

¹⁰ Ak kilenji ichek, Ogeero, ye omong’ji nganaset, kotuiyenok chito ne ibei teretab beek; osub inendet agoi got orit ole wendi.

¹¹ Ak omwachji chitab kobo got, olenji, Kateebenen Konetindet, kole, Mi ano gotab toek, ole anyone aame paska koboto alamalyennyu?

¹² Koboruok anyun got ne o ne mi barak ne tetotin tuguk: ochob eng’ oloto.

¹³ Ak kiba anyun, ak konyor ko u ye kaga kemwachi: ak kichob paska.

Paska ne bo let

¹⁴ Ak ye kingoit sait, koteb ng’ony, koboto che kiyoktoi.

¹⁵ Ak kilenji ichek, Eng’ maget ko koamach aam paskaini kobotok kotom anyalil:

¹⁶ amu amwawok ale, Koboch nguno ko ma aame, agoi kosulda eng’ bounatetab Jehovah.

¹⁷ Ak kitaach kikombet, ak kingo kagogoito kongoi, kole, Onam ni, ak opchechige okwege:

¹⁸ amu amwawok ale, Koboch nguno, ko ma aee che bo logoekab sabibuk, agoi koit bounatetab Jehovah.

¹⁹ Ak kinam makatiat, ak kingo kagomwa kongoi, kobutul, ak kogochi ichek, ak kole, Ni bortanyu ne kigoitoi agobo okwek: oyae ko u ni eng’ kabwatet ne obwatena.

²⁰ Ko u noto kikombet agine, kingo kagobata amitwogik che bo lagat, kole, Arorutiet ne leel kikombani eng’ korotikyuk, che kitumdoi agobo okwek.

²¹ Ago, ogeero, mi eutab inendet ne ng’wektaa kobota eng’ mesani.

²² Amu wendi Weritab chi iman, ko u ye kiging’at: ago bwa eng’ chichoto ng’wektoi inendet!

²³ Ak kitoi anyun koteebegei ichegei, kole ng’o eng’ ichek ne yaei kii.

Etunatet ne bo iman

²⁴ King’eet anyun tiiyet eng’ kwenunywa, kole ng’o ne kiiti kele ne o eng’ ichek.

²⁵ Ak kilenji ichek, Laitorani laitorinik eng’ Bororiosiek: ak icheget che tinyei bounatet eng’ ichek keguure Toretik.

²⁶ Ago, ma u noto eng’ okwek: ago ingoigei ne o eng’ okwek ne ming’in; ak inendet ne o koigei ne otisiei.

²⁷ Ng’o ne o anyun, inendet ne tebyei eng’ amisiet, anan inendet ne otisiei? Tos ma inendet ne tebyei eng’ amisiet? Ago ami kwenung’wong’ ko u chito ne otisiei.

²⁸ Ago okwek ko o che kiotebi kobota eng’ yomsosiekyuk;

²⁹ ak kaagonok bounatet, ko u ye kigogona Baba,

³⁰ si kobiit oamisie ak koeeise mesennyu eng’ bounatennyu, ak tun otebe ng’echerok che bo laitornatet, oruokyini ortinwek taman ak aeng’ che bo Israel.

Sib kemwaei kole tiitos Petero

³¹ Simon, Simon, keero, kagosom Setani kole konamak, si kosesak ko u nganok:

³² ago kiasa agobo inye, si mabek kayaneng’ung’: ak ye kaiwalage, igimit che otupche.

³³ Ak kolenji inendet, Kiptaiyandani, kaachoboge kebe tuwai korgoret agot meet.

³⁴ Ak kimwa kole, Amwaun Petero, kotom kote kipsoiywet rani, iesioa konyil somok ile, mengena.

³⁵ Ak kilenji ichek, Kingayoktok ko motinye agot lolet, anan suberet, anan kweonik, ko tos kirarta kiy eng’ okwek? Ak kile, Ma raruech kiy.

³⁶ Ak kilenji, Ago inendet ne tinyei lolet koibot nguno, ak u noto suberet agine: ak inendet ne matinyei rotwetab chok, koalda ngoriennyi, si koale.

³⁷ Amu amwawok ale, kit ne kigisir ko kanyol kosulda eng’ ane, kele, Kigiit inendet koboto kiptengeginik: amu tinyei kagesunet ng’alek che kigisir agobo ane.

³⁸ Ak kile, Kiptaiyandani, keero, mi yu rotokab chok aeng’u. Ak kilenji ichek, Kagoyam.

Getsemane

³⁹ Komong’ sang’ anyun, ak kwo agoi tulwetab Emitik, ko u biteennyi; ak kiisub alamalyet inendet.

⁴⁰ Ak ye kingo kagoit oloto, kolenji ichek, Osa si mochut yomset.

⁴¹ Ak kiistoegei ichek ye te ye itei koita ngewirta; ak kigutuny kosa,

⁴² kole, Baba, ngicham, iistoena kikombani: ago ma ko u magennyu, ago ingoyaak ko u mageng’ung’.

⁴³ Ak kimong’ji inendet malaikaiyat ne kibunu kipsengwet kogimit inendet.

⁴⁴ Ak ye kimi inendet nyalilda ne ng’wan, kotes kosa mising’: ak kigergeitu kaotikyik ak korotik che sachin ng’ony.

⁴⁵ Ak kingong’eet eng’ saennyi, konyo ole mi alamalyennyi, ak konyor koruitos amu arogenet,

⁴⁶ ak kilenji ichek, Kalya si oruiye? Ong’eetye, osa, si mochut yomset.

Kenamei Jesu

⁴⁷ Ak kingota ko ng’alali, ogeero, tuiyet, koboto inendet ne kiguure Judas, age eng’ taman ak aeng’, kiindoune ichek; ak korikyi inendet Jesu si kong’utut.

⁴⁸ Ago kilenji Jesu, Judas, ing’wektoi Weritab chi eng’ ng’ututet?

⁴⁹ Ak kingogeer che kimi koboto inendet kit ne machei koyaak, kole, Kiptaiyandani, kieb eng’ rotwetab chok?

⁵⁰ Ak kieb age eng’ ichek otwogindetab tisiindet ne o, kieb itinnyi ne bo tai.

⁵¹ Ago kiwolji Jesu kolenji, Obagakte; kagoyam. Ak kitwa itinnyi, kosoob.

⁵² Ak kilenji Jesu tisiik che eechen, ak kiptainikab hekalut, ak boisiek che kigabwa kogirinda inendet, Kobwa ak rotokab chok ak siarisiek, ko u ye obwanjini rebindet?

⁵³ Ye kiami kobotok betut age tugul eng’ hekalut, ko ma oyogocha eunekwok: ago saing’wong’ ni, ak kimnatet ne bo mesundeito.

Kotiitos Petero Jesu

⁵⁴ Kinam anyun inendet, ak komut kwo gotab tisiindet ne o. Ak kiisubi Petero eng’ ye loo.

⁵⁵ Ak ye kiga kolal mat eng’ kok, koteb ng’ony tugul, ak kitebe Petero kwenunywa.

⁵⁶ Ak kingogeer chepto age inendet kotebyei eng’ ye mi lapkeiyetab mat, kochiilji kong’ inendet, kole, Kimi chichi agine koboto inendet.

⁵⁷ Ago kitiiyo, kole, Kobogoriondoni, mangen inendet.

⁵⁸ Ak ne matia kogeer chito age, ak kole, I agenge aginye eng’ ichek. Ak kile Petero, Chichi, ma bo bichoto.

⁵⁹ Ak ye kingogesgei olo bo sait agenge, kole chito age eng’ kimnatet, Iman kimi chichi agine koboto inendet: amu Galilindet inendet.

⁶⁰ Ago kile Petero, Chichi, mangen cho imwae. Ak kota komwaei, kote kipsoiywet ngunoto.

⁶¹ Ak kiwelelgei anyun Kiptaiyat, ak kogeer Petero. Ak kiibwat Petero ng’olyotab Kiptaiyat, ko u ye kaga komwachi, kole, Kotom kote kipsoiywet rani, iesioa konyil somok.

⁶² Ak kimanda sang’, kwo korir eng’ ng’wanindo.

⁶³ Ak kichombil bik Jesu che kinamei inendet, ak kobir.

⁶⁴ Ak kituch konyekyik, ak koteebe, kole, Ng’orse: ng’o ne kamasin?

⁶⁵ Ak kimwa ng’alek alak che chang’ che yaachen agobo inendet, kochurachuri inendet.

Jesu eng’ taitab tisiik che eechen

⁶⁶ Ak kingo kagoeech, koyumgei boisiekab bichoto, tisiik che eechen ak sirik; ak kiimut inendet kwo kapkiruogenywa, kole,

⁶⁷ Ngo i Kristo, imwawech. Ago kilenji ichek, Agot ndamwawok, ko moyani:

⁶⁸ ak ngot ateebenak, ko mowolu.

⁶⁹ Ago koboch nguno kotebe Weritab chi eutab tai ne bo kamuktaet ne bo Jehovah.

⁷⁰ Ak kile ichek tugul, Tos i Weritab Jehovah anyun? Kolenji ichek, Omwae ole a inendet.

⁷¹ Ak kile ichek, Ta kemage nee baornatet age? Amu kagegas acheget eng’ kutinnyi.