LUKA 2 - BUKUIT NE TILIL

Signet Jesu

¹ Kibun anyun ng’atutiet Kaisari Agusto eng’ betusiechoto, kole, kesir kainaikab bik tugul.

² Ne bo tai sirisioni ye ki bounindetab Suria, Kurenio.

³ Kiba anyun tugul si kesir, chi tugul eng’ nganasennyi.

⁴ Kitogos agine Josep eng’ Galili, kobunu nganasetab Nasaret, agoi Judea, kot koit nganasetab Daudi, ne kiguure Betlehem, amu ki bo inendet gotab Daudi, ak ki bo orennyi;

⁵ si kobiit kesir inendet koboto murerennyi Maria, ne ki chio.

⁶ Ak kiit sigetab lakwet, kota komi oloto.

⁷ Ak kisich werinnyi ne bo tai; ak kolaakyi ngoroikab lakwandit, ak komogonji kaptugut, amu kima komi boroindo eng’ gotab toek.

⁸ Ak kimi emonoto mestowek che kitebyei eng’ kewet koribei akwenywa ne bo kechirek kemoi.

⁹ Ak kitonon malaikaiyatab Kiptaiyat eng’ ole negite ichek, ak kiiluuchi lilindab Kiptaiyat komoswekwak tugul: koiyweis anyun mising’.

¹⁰ Ak kilenji malaikaiyat ichek, Amoiyweisie; ogeero, aibwok logoiywek che miach che bo boiboiyet ne o ne ityin bik tugul:

¹¹ amu kagisikwok Yetindet rani, eng’ nganaset ne bo Daudi, noto Kristo Kiptaiyat.

¹² Ak nit kaborunet eng’ okwek: Onyoru lakwet ko kagilaakyi ngoroikab lakwandit, korue moinget ne amisie tuga.

¹³ Ak kimi eng’ sainato koboto malaikaiyandanato chang’indab lugosiekab kipsengwet che kiilosu Jehovah kolen,

¹⁴ Bo teegisto Jehovah, eng’ ole toror mising’, Ak kalyet eng’ ng’ony eng’ bik che chamotin eng’ inendet.

¹⁵ Ak kingo kagoweek malaikaisiek koba kipsengwet, kolenjigei mestowechoto, Ongebe nguno agoi Betlehem, si kobiit kegeer ng’olyondonito kagoyaak, ne kagoboruech Kiptaiyat.

¹⁶ Ak kibwa anyun kochok, ak kinyor Maria ak Josep, ak lakwet korue moinget ne amisie tuga.

¹⁷ Ak ye kingogeer kobarta mwaet ne kaga kemwachi agobo lakwanato.

¹⁸ Ak kikwong’io tugul che kigas ng’alechato kimwachi mestowek.

¹⁹ Ago kirib Maria ng’alechato tugul, kobwatoti eng’ muguleldanyi.

²⁰ Ak kiweek anyun mestowek, kotorori Jehovah ak kolosunoti eng’ tuguk tugul che kagogas ak che kagogeer, ko u ye kaga kemwachi.

²¹ Ak kingoit betusiek sisiit che kiyatitoe inendet, keguure kainennyi JESU, ko u ye kiga kotochi malaikaiyat kotomo kemanach.

Kagoitoetab Jesu eng’ hekalut

²² Ak kingo kagobata betusiekab katililenywa ko u Ng’atutietab Musa, komut inendet konyo Jerusalem, si kogochi Kiptaiyat

²³ (ko u ye kigisir eng’ Ng’atutietab Kiptaiyat, kele, Kiguure ne itabanat agobo Kiptaiyat werit age tugul ne yatei iyotet),

²⁴ ak kogoito korosiot ko u ye kigimwa eng’ Ng’atutietab Kiptaiyat, kele, Cheptugenik aeng’, anan arek aeng’ che bo cheptugenik.

Simeon ak ng’lekyik

²⁵ Ogeero, kimi chito age Jerusalem, ne kigiguure Simeon; ak ki chito ne bo iman ak kigonyiti Jehovah, ne kiigeni kagaigaetab Israel: ak kitebe Tamirmiriet ne Tilil inendet.

²⁶ Ak kiga kong’ang’ji inendet Tamirmiriet ne Tilil, kole, mageerei meet, kotom kogeer Kristo ne bo Kiptaiyat.

²⁷ Kinyo anyun hekalut eng’ Tamirmiriet: ak ye kingomut sigik lakwet Jesu, si kobiit koyachi inendet ko u biteetab Ng’atutiet,

²⁸ konam anyun lakwet eng’ eunekyik, ak kolos Jehovah, kole,

²⁹ Ee, Kiptaiyat, ichamjini nguno otwogindeng’ung’ kwo Eng’ kalyet, ko u ng’olyondeng’ung’;

³⁰ Amu kagogeer konyekyuk yetuneng’ung’,

³¹ Ne kiichob eng’ taitab bik tugul;

³² Lapkeiyet ne bo ng’ang’utiet ne king’ang’jin Bororiosiek, Ak torornatetab biguk Israel.

³³ Ak kikwong’io Josep ak kametab lakwet agobo tuguchoto kagimwa agobo inendet;

³⁴ ak kiiberur Simeon ichek, ak kolenji Maria kamennyi, Keero, kaginde lakwani si kobutyo che chang’ ak kong’eetyo che chang’ eng’ Israel; asi koek kaborunet ne tun kiesioi;

³⁵ (ee agot inyendet ko tun torei rotwetab chok muguleldang’ung’;) si kobiit kong’ang’ogis kabwatutikab mugulelwekab bik che chang’.

³⁶ Ak kimitei agine Ana, chebo Panuel, ne ki maotio, ne bo oretab Aser (ne kiga koosit mising’; kitebi ak manong’otiot kenyisiek tisab koboch ngitun.

³⁷ Ak kitebi ko mosok kenyisiek tamanwogik sisiit ak ang’wan), ko mamandoi eng’ hekalut, ak kolosu, koboto karugutetab ge, ak somutik, kemoi ak bet.

³⁸ Ak kinyo eng’ sainato ak kogochi Jehovah kongoi, ak king’alalji tugul che kiigeni katiaget eng’ Jerusalem agobo inendet.

Ana

³⁹ Ak kingo kagoges tugul ko u Ng’atutietab Kiptaiyat, koweektagei koba Galili, agoi nganasenywa Nasaret.

⁴⁰ Ak kiner lakwet, ak kotesak kimnatet, ak kinyi ng’omnatet: ak kimi mieindab Jehovah koboto inendet.

Ming’inatetab Jesu

⁴¹ Kicham kobendi sigikyik kenyit age tugul Jerusalem eng’ igorta ne bo paska.

⁴² Ak ye ki bo kenyisiek taman ak aeng’, kotogosta ichek koba Jerusalem ko u biteet ne bo igorta;

⁴³ ak ye kingowong’ betusiek, ye kiweeksei, kong’et lakwet Jesu eng’ Jerusalem: ak kima nai sigikyik;

⁴⁴ ago kilen mi koboto bik che kibendi tugul, koba anyun bandab betut komugul; ak kicheng’ inendet eng’ kwenutab bikab orenywa ak che kiingengei:

⁴⁵ ak ye kimanyor inendet, koweektagei Jerusalem, kocheng’at.

⁴⁶ Ak ye kingogesgei betusiek somogu, konyorji inendet hekalut, kotebyei eng’ kwenutab konetik, koepchin it ng’alekwak, ak koteepse icheget:

⁴⁷ ak kikwong’io ichek tugul che kiepchin it inendet amu naennyi ak wolunaikyik.

⁴⁸ Ak ye kingogeer inendet, kokwong’io: ak kilenji kamennyi inendet, Lakwani, kalya si iyaiywech ko u ni? Keero, kogicheng’in ane ak kwandang’ung’ eng’ arogenet.

⁴⁹ Ak kilenji ichek, Amu nee si ocheng’a? Ma onai ole kanyolja atebe boisietab Baba?

⁵⁰ Kima iguiyo ichek ng’olyondonoto kamwachi.

⁵¹ Kichorgei anyun koboto icheget, ak kiit Nasaret; ak kigase it ichek: ak kigonor kamet ng’alechato tugul eng’ muguleldanyi.

⁵² Kitesak ng’omnatetab Jesu, ak etunatet, ak mieindo eng’ Jehovah ak eng’ bik.