LUKA 19 - BUKUIT NE TILIL

Sakayo

¹ Kimong’ji anyun Jeriko ak kobun kwenut.

² Ak ogeero, chito ne kiguure Sakayo; ak ki ne o inendet eng’ taagikab aisurut, ak ki magorio.

³ Ak kicheng’ei kole kogeer Jesu si konai kole ng’o inendet; ago kima imuch amu tuiyet, amu ki nwach.

⁴ Ak kilabat kondo, kwo kolany mogoiywet si kogeer inendet: amu kinyo kosiirtoe oranato.

⁵ Ak ye kingoit Jesu yoto, konyal ketoto, ak kolenji, Sakayo, choruge, chogu; amu kanyolja aru gong’ung’ ra.

⁶ Ak kichok, kochorgei, ak kotaach inendet eng’ boiboindo.

⁷ Ak ye kingogeer bichoto, kong’unyng’ung’so tugul, kole, Kawa kotebi eng’ gotab chito ne kiptengekyo.

⁸ Ak kitonon Sakayo, ak kolenji Kiptaiyat, Keero, Kiptaiyandani, agochini kibananok kebebertab tugukyuk; ak ngo kiaibe chi age tugul kiy eng’ ng’alset, aweekyini konyil ang’wan.

⁹ Ak kilenji Jesu, Kagonyo yetunet rani goi, amu weritab Abraham agine inendet.

¹⁰ Amu kinyo Weritab chi kocheng’ ak kosor ne kiga kobet.

Kalewenet agobo fedaisiek

¹¹ Ak ye kingota kogasei ichek tuguchu, kotes komwa kalewenet, amu ki negit Jerusalem, ak kiibwati icheget kolen toogu bounatetab Jehovah ngunoto.

¹² Kimwa anyun kole, Kiwa chi anum ne toogunot emet ne loo, kwo konam bounatet kobunji, ak koweek.

¹³ Yeityo koguur otwogikyik taman, ak kogochi fedaisiek taman, ak kolenji, Oboisie agoi tun aitu.

¹⁴ Ago kiwech inendet bikab emennyi, koyokto ng’olyot kosube inendet, kole, Magimache chichi koboiywech.

¹⁵ Ak ye kingoweek kogeny, ko kagonam bounatet, kong’at keguur otwogichoto, chu kiga kigochi fedaisiek, kobwa ole mi inendet, si kobiit konai che kinyor bichoto eng’ boisiet.

¹⁶ Ak kinyo tainnyi chito ne bo tai, kole, Kiptaiyandani, kigonyor fedaiyandeng’ung’ fedaisiek alak taman.

¹⁷ Ak kilenji inendet, Kiiyai ne mie, otwogindoni mie: amu kiiegu ne kiyani eng’ kit ne ming’in mising’, bou nganasok taman.

¹⁸ Ak kinyo ne bo aeng’, kole, Kiptaiyandani, kigonyor fedaiyandeng’ung’ fedaisiek mut alak.

¹⁹ Ak kilenji noto agine, Bou nganasok mut aginye.

²⁰ Ak kinyo age, kole, Kiptaiyandani, keero, ineni fedaiyandeng’ung’ ne kigaratyi anget ak agonor:

²¹ amu kiaiywein, amu i chi ne kolgol: inemu ne kima inde ng’ony, ak igese che kima igol.

²² Kolenji anyun inendet, Aruogun agobo ne kemwa eng’ kuting’ung’, otwogindoni ya. Kiingen ile a chi ne kolgol, anemu ne kima ande ng’ony, ak agese che kima agol;

²³ kilya anyun si mende fedaisiekyuk ole kiwalawale, ta kaanyoru ko kaitu koboto che kitesak?

²⁴ Ak kimwachi ichek che kitonondos eng’ ye negit, kolenji, Orebe inendet fedaiyat, ak ogochi inendet ne tinye fedaisiek taman.

²⁵ Ak kilenji ichek inendet, Kiptaiyandani, tinyei inendet fedaisiek taman.

²⁶ Amwawok ale, chi age tugul ne tinyei, kigochin; ago inendet ne matinyei, kerebe agot ne tinyei.

²⁷ Ago omutu anyun bunichuchuk kobwa yu, che machamei aboi, si obar eng’ tainnyu.

Kowendi Jesu Jerusalem kilosunoti

²⁸ Ak ye kiga komwa ko u noto, kwo kondo, kotogostoi Jerusalem.

²⁹ Ak ye kingo kagorikta Betpage ak Betania, eng’ tulwet ne kiguure tulwetab Emitik, koyokto aeng’ che bo alamalyennyi,

³⁰ kolenji, Oba agoi oit nganaset ne mi taing’wong’; ak ye oit ogeer moitab sigiriet ne ratat, ne tom kolany chi: otiach, ak ogetu.

³¹ Ak ngo teebenak chi age tugul, kole, Kalya si otiach? Olenji anyun, Makyingei Kiptaiyat.

³² Koba anyun che kaga kiyokto, ak konyor ko u ye kaga mwachi inendet ichek.

³³ Ak ye kita kotiachi moitab sigiriet, kolenji bikab kobo, Kalya si otiach moitab sigiriet?

³⁴ Ak kilenji, Makyingei Kiptiyat.

³⁵ Ak kiget konyo ole mi Jesu: yeityo koiito ngoroikwak eng’ moata bo sigiriet, ak koganapchi Jesu barak.

³⁶ Ak ye kiwendi, koiitoot ngoroikwak eng’ oret.

³⁷ Ak kingorikta tegeiyatab tulwetab Emitik, kotoi tuiyet tugul ne bo alamalyet koboiboitu ak kolos Jehovah eng’ kutit ne o agobo boisionik tugul che bo kamuktaet che kiga kogeer;

³⁸ kolen, Iberurot Laitoriat ne nyonei eng’ kainetab Kiptaiyat: kalyet eng’ kipsengwet, ak lilindo eng’ ole toror mising’.

³⁹ Ak kilenji Parisaik alage che bo tuiyet inendet, Konetindoni, ker kong’ alamalyeng’ung’.

⁴⁰ Ak kiwolji kolenji, Amwawok ale, ngot kosisyo chu, koboldos koik.

Korir jin Jesu Jerusalem

⁴¹ Ak kingorik, kogeer nganaset ak korirji,

⁴² kolen, Nda kengen eng’ betuni, agot inye, tuguk che bo kalyet! Ago nguno ko kagoung’ogis eng’ konyeguk.

⁴³ Amu tun bwanjinin betusiek che teechei buniguk irimet koyiemin komoswek tugul, ak kogerjin go eng’ komosta age tugul,

⁴⁴ ak kowirjin ng’ony, ak lagoguk che mi oring’ung’; ama bagagun agot koita agenge ne mi baragutab age; amu kima inai betutab rutochineng’ung’.

Kotilili Jesu hekalut

⁴⁵ Ak kiwa hekalut orit, ak kotoi koon komanda che kialdoisiei,

⁴⁶ kolenji ichek, Kigisir kele, Egu gonnyu gotab saet: ago kaoyai koek kebenetab rebik.

⁴⁷ Ak kiinetisiei betut age tugul eng’ hekalut. Ago kicheng’ tisiik che eechen ak sirik ak che toogunotin eng’ bik, kobar inendet:

⁴⁸ ak manyor kit ne kiimuchi koyai; amu kiepchin it bik tugul inendet mising’.