LUKA 18 - BUKUIT NE TILIL

Kiruogindet ne kima ko bo imanda

¹ Kimwachi anyun kalewenet kole, Kanyol kosa betusiek tugul, amat chorirenso;

² kolenji, Kimitei nganaset age kiruogindo, ne kima koiywei Jehovah, ak kima koiiti chi:

³ ak kimi mosoget age nganasanato; ne kinyonei ole mi kotugul, kolen, Ibesiewa kiruoget ne bo iman eng’ bunyondennyu.

⁴ Ak kiesio eng’ betusiek alak: ago eng’ let, komwa eng’ orinnyi kole, Agot ngo maiywei Jehovah, amaiiti chi;

⁵ ago amu inyalila mosogani, abesiechini anyun, si ma konyonei kotugul koiima.

⁶ Ak kile Kiptaiyat, Ogas kit ne kimwa kiruogindet ne ma bo imanda.

⁷ Tos mayachin Jehovah imanda che lewenotin, che rirjin inendet bet ak kemoi, ak muitoi inendet eng’ ichek?

⁸ Amwawok ale, yachin inendet ichek imanda kochokyin. Ago ye tun nyo Weritab chi, ko tos nyoru kayanet eng’ ng’ony?

Parisaindet ak taagindetab aisurut

⁹ Ak kimwachi kogeny kalewenoni alak che kiimang’ugei kole, ki bo imanda, ak kosasei bik tugul,

¹⁰ kolenji, Kitogosta bik aeng’u hekalut koba kosa; Parisaindet age, ko taagindetab aisurut age.

¹¹ Kitonon Parisaindet kosa kong’alal inegei ko u ni kole, Jehovah, amwaun kongoi, amu ma ki kergei ak bik alak, che rebik, che ma bo iman, che ibegei, anan taagindoni bo aisurut.

¹² Arugutige konyil aeng’ eng’ wigit; agoitoi kebeberta ne bo taman eng’ tuguk tugul che anyoru.

¹³ Ago kitonon taagindetab aisurut eng’ ye loo, ak ma cham agot konyal kipsengwet, ago kiluch tegennyi, kole, Jehovah, rirena, a kiptengekyo.

¹⁴ Amwawok ale, kichortagei chichoto gonnyi ko kagoek ne bo imanda kosiir nin age: amu chi age tugul ne itororigei kiming’ini; ak age tugul ne iming’inigei ko tun kitorori.

Koberuri Jesu manyurunik

¹⁵ Ak kiimutyi bik inendet manyurunik, si kobiit kotwa ichek: ago ye kingogeer alamalyet, koger kong’.

¹⁶ Ago kiguur Jesu ichek kobwanji, ak kolenji, Ochamji lagok che mengech kobwanja, amat oete: amu bo che u chu bounatetab Jehovah.

¹⁷ Amwawok iman ale, Age tugul ne mataachei bounatetab Jehovah ko u lakwet ne ming’in, ko magoi mong’ji oloto matiny.

Sobondab koigeny; imuchi magornatosiek konach bich

¹⁸ Ak kiteebe inendet bounindet age, kole, Konetindoni mie, ayai nee si kobiit anyor sobondab koigeny?

¹⁹ Ak kilenji Jesu, Amu nee si iguurena ne mie? Mami ne mie, kobate agenge, noto ko Jehovah.

²⁰ Ingen Ng’atutik, Amoipge, Amerumisie, Amechorse, Amebaorian lembech, Teech kwandang’ung’ ak komet.

²¹ Ak kile, Kiarib tuguchuto tugul koboch ko a neran.

²² Ak ye kingogas Jesu, kolenji, Ta ko rartaat kit agenge eng’ inye: alde tugul che itinye, ak ipchechi kibananok, si inyoru konoruet eng’ kipsengwet: ak inyo, isubwa.

²³ Ago ye kingogas inendet tuguchu, koarogen mising’; amu ki magorio kot.

²⁴ Ak kingogeer Jesu inendet, komwa kole, Bichii ne tia eng’ che tinyei magornatosiek komong’ji bounatetab Jehovah!

²⁵ Amu nyamnyum eng’ tambesiet kochut kondab katet, kosiir komong’ji magoriot bounatetab Jehovah.

²⁶ Kimwa anyun che kigasei, kole, Ng’o anyun ne kesoru?

²⁷ Kile, Tuguk che maimugaksei eng’ bik komugaksei eng’ Jehovah.

²⁸ Kole Petero, Keero, kigebagakte tugukyok, ak kisubun.

²⁹ Ak kilenji ichek, Amwawok iman ale, Mami chi ne kibagakta got, anan osotiot, anan che tupcho, anan sigik, anan lagok, agobo bounatetab Jehovah,

³⁰ ne manyoru che chang’ kosiir eng’ betusiechu, ak sobondab koigeny eng’ betusiek che tun bwanei.

Sib komwaei Jesu ne bo somok agobo meennyi

³¹ Ak kiimut taman ak aeng’ kobwa ole mi, ak kolenji, Ogeero, kitogostoi Jerusalem, ak kosulda tuguk tugul che kisir maotik agobo Weritab chi.

³² Amu kindoi inendet eunekab Bororiosiek, si kechurachur, ak kitewer, ak kesing’ilji:

³³ ak kobire kipcharitit, ak kobar: ak kong’eet kogeny eng’ betutab somok.

³⁴ Ak kima iguiyo icheget tuguchuto, agot agenge; ak kiung’ak mwaonito eng’ ichek, ak kima ibesio tuguk che kiga kimwa.

Kosoobi Jesu kipkoratiat

³⁵ Ak kingorikyi Jeriko, ko kitebyei ng’ony kipkoratia eng’ oret taban kosomsei:

³⁶ ak kingogas kosiirtoi tuiyet, koteeb kole, Nee chu?

³⁷ Ak kimwachi ichek inendet kolenji, Jesu ne bo Nasaret ne siirtoi.

³⁸ Ak kiwaach, kole, Jesu, Weritab Daudi, rirena.

³⁹ Ak kiger kong’ inendet anyun che kiindoi, kole kosis: ago kites kowaach mising’ kole, Weritab Daudi, rirena.

⁴⁰ Ak kitonon Jesu, ak kong’at kimut inendet kwo ole mi: ak ye kiga rik, koteebe inendet,

⁴¹ kole, Imache ayaun nee? Ak kile, Kiptaiyandani, amache ageerto.

⁴² Ak kilenji Jesu, Keerte: kagosoobin kayaneng’ung’.

⁴³ Kigeerto anyun ngunoto, ak kosub inendet, kolosunoti Jehovah: ak kingogeer tuiyet komugul, kogonyit Jehovah.