LUKA 17 - BUKUIT NE TILIL

Mwaosiek alak che bo Jesu

¹ Kilenji alamalyennyi anyun, Bwanei kanagutik matiny: ago bwa eng’ chichoto bunu!

² Kita kaigai eng’ inendet kirooch kaatinnyi koitab bai ne o ak kewirji nyanjet, kosiir ye inachi age eng’ chu mengech.

³ Oripge: ngochiliilun ne otupche, iger kong’; ak ngo sik, inyochi kaat.

⁴ Ak ngo chalwogenjin konyil tisab eng’ betut agenge, ak ngo week ole imi konyil tisab kolen, Kaasigu; inyochi kaat.

⁵ Ak kilenji che kiyoktoi Kiptaiyat, Teswech kayanennyo.

⁶ Ak kile Kiptaiyat, Ndotinye kayanet ne u keswotab karadali, ko ye omwachi mogoiywoni, olenji, Kitutin, ak keminin eng’ nyanjet; kogasok it.

⁷ Ago mi ng’o eng’ okwek ne tinyei otwogindet ne ibatisiei anan ne iyagi kechirek, ne lenjin, ye kait kobunu mbar, Nyo ngunoto ak itebi ng’ony iamisie?

⁸ Tos ma kaigai kolenji inendet, Chobwa tuguk che aame, kermenge, ak iboisiewa, agoi aamisie ak aeeise; si yeityo iamisie ak ieeise aginye?

⁹ Tos weekyin otwogindonoto kongoi amu kayai tuguk che kaga king’at?

¹⁰ U noto tun ak okwek, ye kaoyai tuguk tugul che kaging’atak, omwa ole, Ki otwogik che matilei kiy; kageyai che kanyoljinech keyai.

Kisoobi Jesu bik taman che amei mogondosik

¹¹ Ak ye kimi oret kowendi Jerusalem, kobun kwenutab Samaria ak Galili.

¹² Ak kingomong’ji nganaset age, kotuiyo ak murenik taman che kiamei mogondosik, che kitonondos eng’ ole loo:

¹³ ak kiwaach kole, Jesu Kiptaiyat, rirenech.

¹⁴ Ak kingogeer ichek, kolenji, Oba oborjige tisiik. Ak ye kingab kaba, kotililitu.

¹⁵ Ak kingogeer age eng’ ichek kole kagosob, koweek, kolosunonu Jehovah eng’ kutit ne o;

¹⁶ ak kiibutyi kelyekyik kogochi kongoi; ak ki Samarindet chichoto.

¹⁷ Ak kiwol Jesu kole, Kama kitilil taman? Ago mi ano chugai sogolu?

¹⁸ Tos ma biit agot agenge ne kaweek kogochi kalosunet Jehovah, kobate toondoni?

¹⁹ Ak kolenji inendet, Ng’eet, si iwe: kagosoobin kayaneng’ung’.

Nyonunetab bounatetab Jehovah

²⁰ Ak kingoteebe Parisaik kole nyonei au bounatetab Jehovah, kowolji ichek kolenji, Manyonei bounatetab Jehovah kegeeronu:

²¹ ama kimwaei kele, Ogeero, mi oli! Anan mi olin! Amu, ogeero, mi bounatetab Jehovah kwenung’wong’.

²² Ak kilenji alamalyennyi, Tun bwanei betusiek, che tun omache ogeer betut agenge ne bo Weritab chi, ak mogeere.

²³ Ak tun lenjinok, Ogeero, mi olin! Ogeero, mi oli! Amat obe, anan osub ichek:

²⁴ amu u kalyelet, ne ilyelune komosta age eng’ kipsengwet, ak koluu agoi komosta age ne bo kipsengwet; tun u noto Weritab chi agine eng’ betunnyi.

²⁵ Ago kanyol konyalil eng’ tuguk che chang’ ak koesio inendet ibini.

²⁶ Ak ko u ole kibiitunda eng’ betusiekab Noa, ko tun u noto eng’ betusiekab Weritab chi.

²⁷ Kiamisiei, kieeisei, kiitunisiei, ak kiigoitoi kitun, agoi betut ne kiwa Noa melit orit, ak kinyo maranet, ak kobar tugul.

²⁸ U noto agine, ole kibiitunda betusiekab Lot; kiamisiei, kieeisei, kialisiei, kialdoisiei, kigolsei, ak kiteeksei;

²⁹ ago eng’ betut ne kimanda Lot eng’ Sodom korobon mat ak koik che laldos che kibunu kipsengwet, ak kobar tugul:

³⁰ u noto eng’ betut ne kiboru Weritab chi.

³¹ Eng’ betunoto, ko mat kochorgei inendet ne mi got barak, koib tugukyik che mi go; amat koweek agine inendet ne mi mbar.

³² Obwat osotiotab Lot.

³³ Age tugul ne cheng’ei kosor sobondanyi kobeeti: ak age tugul ne ibeeti sobondanyi koribei.

³⁴ Amwawok ale, Tun ruitos bik aeng’u eng’ itogut agenge eng’ kemounoto; kimuti age, kebagakta age.

³⁵ Tun ng’oisei kobogorisiek aeng’u kibagenge; kimuti age, kebagakta age.

³⁶ Tun mi bik aeng’u mbar: kimuti age, kebagakta age.

³⁷ Ak kiwolji inendet kolenji, Ano, Kiptaiyandani? Ak kilenji, Ole mi musto, koyumjingei oloto motong’wek agichek.