LUKA 16 - BUKUIT NE TILIL

Ribindet ne kima ko bo imanda

¹ Ak kilenji inendet alamalyennyi kogeny, Kimi chi anum ne ki magorio, ne kitinyei ribindet ne kitononjin gonnyi; ak kigimwaita chichoto eng’ tainnyi kele, iserseri tugukab magoriondonoto.

² Ak kiguur inendet kolenji, Nee ni agase agobo inye? Konu koitetab ripseng’ung’; amu ma iegu ribindet kogeny.

³ Ak kile ribindonoto eng’ muguleldanyi, Ayae nee anyun, amu kagoistaa kiptaiyandennyu eng’ boisiet? Amatinye kimnatet ne abatisie; ak ngale, Asomso, alilani.

⁴ Kaanai kit ne ayae, si ye kageona eng’ boisiet, kotaacha eng’ gorikwak.

⁵ Ak kingoguur age tugul eng’ besenikab kiptaiyandennyi, kolenji ne bo tai, Kiibesen ata tugukab kiptaiyandennyu?

⁶ Kole, Terenik bogol che bo mwanik. Ak kilenji, Nam kartasing’ung’, ak iteb ng’ony si isir konom, ichokyi.

⁷ Yeityo kolenji age, Kiibesen ata inye? Kole, Terenik bogol che bo nganok. Kolenji, Nam kartasing’ung’, si isir tamanwogik sisiit.

⁸ Ak kiichoi kiptaiyandennyi otwogindonoto kima ko bo imanda amu kayai eng’ ng’omnatet: amu ng’omen werikab ng’onyuni eng’ ibindanywa kosiir werikab lapkeiyet.

Ole kiboisietoi komie magornatet

⁹ Ak amwawok ale, Oyachige choronok eng’ oretab magornatosiek che ma bo imanda; si ye tun igesgei, ko tun kotaachak eng’ gorik che bo koigeny.

¹⁰ Inendet ne kiyani eng’ che ng’ering’, kiyani agine eng’ che chang’: ak inendet ne magiyani eng’ che ng’ering’ ko magiyani agot eng’ che chang’.

¹¹ U noto anyun, ngo kima oegu che kiyani eng’ magornatosiek che ma bo imanda, ko ng’o ne tos iyanak eng’ magornatosiek che bo imanda?

¹² Ak ngo kimata oegu che kiyani eng’ tugukab chito age, ko tos ng’o anyun ne konok tuguk che chekwok?

¹³ Ma mi otwogindet ne imuchi koot kiptainik aeng’: amu tos wech age, ak kocham age; anan konamgei ak age, kosas age. Momuchi oot Jehovah ak magornatet.

Kigerei kong’ Parisaik

¹⁴ Ak kigas Parisaik tuguchuto tugul. Kichamei siling’isiek icheget, ak kororechi inendet.

¹⁵ Ak kilenji, Okweget che omieitige eng’ taitab bik; ago ingen Jehovah mugulelwekwok: amu kit ne itorori bik ko wegot mising’ eng’ taitab Jehovah.

¹⁶ Kitebi Ng’atutik ak maotik agoi koit Johana: koboch betunoto keamdoi logoiywek che miach che bo bounatetab Jehovah, ak komong’jin chi tugul eng’ kimnatet.

¹⁷ Ago nyamnyum kosiirto kipsengwet ak ng’ony, kosiir kobut sirutiet agenge ne bo Ng’atutik.

¹⁸ Age tugul ne onei osotiondennyi, ak kotun age, ko kabaigei: ak chito ne ituni inendet ne kigoon manong’otiot ko kabaigei.

Magoriot ak Lasaro kibananiat

¹⁹ Ak kimi chi anum ne ki magorio ne kiilaachi ngoroik che arusen ne birir, ak che bo katanit ne kararan, ak kibaibai betut age tugul, ak kotalbisi:

²⁰ ak kimi kibanania ne kigiguure Lasaro ne kigimogoni eng’ kurgennyi, ak ki nyiitat mook bortanyi,

²¹ ak kimachei kebae tuguk che ibutos eng’ mesetab magoriondonoto; ee, kibwa agot sesenik ak komel mookyik.

²² Ak kime kibananiandanato betut age, komut inendet malaikaisiek konde tegetab Abraham: ak kime agine magoriondonoto, ak kigitub.

²³ Ak ye kimi oldab che kigobek konyal barak, komi nyalilda ne o, kogeer Abraham komi ole loo, komi Lasaro tegennyi.

²⁴ Ak kiite kole, Baba Abraham, rirena, ak iyogu Lasaro, koting’e beek walitab mornennyi, si kotiswa ng’elyeptanyu, amu ami ng’wanindo mising’ eng’ mai lalei.

²⁵ Ago kile Abraham, Weri, ibwat ile kingota isobe ko kiinyoru tuguguk che miach, ki u noto Lasaro, kinyoru tuguk che yaach: ago nguno kigoigoi inendet eng’ yu, ago inye, imi ng’wanindo ne o.

²⁶ Ak ne siirei chu tugul, ko kiginde chemng’eisut ne o ne ioitosech achek ak okwek, si che machei kolong’ olo omi ko maimuchi, ak che machei kolong’ ole kimi ko maimuchi.

²⁷ Ak kile, Asain anyun, baba, ale, iyokte inendet kwo oldab baba;

²⁸ amu atinye che kitupche mut; kwo koteechi ichek, si mabwa ole mi nyalilda ne o.

²⁹ Ak kilenji Abraham, Tinyei ichek Musa ak maotik; ingogas ichek.

³⁰ Ago kile, Achicha, baba Abraham: ago ngot kwo chi ole mi ichek ne bunei oldab che kigobek, kosigu.

³¹ Ak kilenji, Ngot ko magas Musa ak maotik, koesioi koyan agot chito ne ng’eetei eng’ che kigobek.