LUKA 15 - BUKUIT NE TILIL

Kechiriet ne kibet

¹ Ak kirikyi inendet taagikab aisurut tugul ak kiptengeginik si kobiit kogas inendet.

² Ak kiing’unyng’ung’so Parisaik ak sirik, kole, Taachei chichi kiptengeginik, ak koamisiei tugul.

³ Ak kimwachi ichek kalewenoni, kolenji,

⁴ Ng’o chi eng’ okwek, ne tinyei kechirek bogol, ak ngobeet agenge eng’ choto, ko tos mabagaktoi choto tamanwogik sogol ak sogol eng’ surkwen, ak kwo kocheng’at noto kabet, agoi konyor?

⁵ Ak ye kigonyor, konde tigikyennyi, ak kobaibait.

⁶ Ak ye kagoit ga, koguur choronokyik koboto bikab kokwennyi koyumgei, ak kolenji, Ongeboiboitu tugul, amu kaanyoru kechiriennyu ne koga bet.

⁷ Amwawok ale, egu ko u noto tun agine boiboiyet eng’ kipsengwet agobo kiptengekyot agenge ne kasik, ne siirei bik che bo iman tamanwogik sogol ak sogol, che mamage kiy sigunet.

Fedaiyat ne kbet

⁸ Ng’o kobogoriot ne tinyei fedaisiek taman, ak ngobeet fedaiyat agenge, kotos mainaami tait ak kobuch got, ak kocheng’ mising’ agoi konyor?

⁹ Ak ye kagonyor, koguur anyun choronokyik koboto bikab kokwennyi koyumgei ak kole, Ongeboiboitu tugul, amu kaanyoru fedaiyandennyu ne koga kobet.

¹⁰ U noto anyun, amwawok ale, mi boiboiyet eng’ taitab malaikaisiekab Jehovah eng’ kiptengekyot agenge ne kasik.

Werit ne kibetot

¹¹ Ak kimwa kole, Kimi chi anum ne kitinyei werik aeng’:

¹² ak kilenji werit ne ming’in kwandanyi, Aba, kona tuguk che ka tatun bunjina. Ak kipchechi ichek tugukyik.

¹³ Ak kingobata betusiek che matia koyum weroto ming’in tugukyik tugul, ak kwo emet ne loo; kwo koserser eng’ oloto tugukyik eng’ atepto ne ya.

¹⁴ Ak kingo kagogesta tugul, konyo rubet ne o emonoto; kotoi anyun kobanan.

¹⁵ Ak kiwa kogakta chito age ne bo emonoto; ak kiiyokto kwo koyaga torok eng’ mbaret.

¹⁶ Ak kimachei mising’ kole kobiyo metetek che kiamei torok: amu ma igochi chi kiy.

¹⁷ Ak kingobwat, komwa kole, Tia otwogik che bo baba che tinyei amitwogik che yamei kot kosiir, ago ane, ko kabara rubo eng’ yu!

¹⁸ Ang’eete ak awe oldab baba, alenji, Baba, kiachalwogenji kipsengwet ak kiachalwogen eng’ taing’ung’:

¹⁹ ma ko nyoljina kota keguurena wering’ung’: ingaek ko u age eng’ otwogiguk.

²⁰ King’eet anyun kwo oldab kwandanyi. Ago, ye kita komi ole loo, kogeer inendet kwandanyi, ak korire inendet, ak kilabat kwo kosuub kaatit, ak kong’utut.

²¹ Ak kilenji werit, Baba, kiachalwogenji kipsengwet, ak kiachalwogen eng’ taing’ung’: ma ko nyoljina kota keguurena wering’ung’.

²² Ago kilenji kwanda otwogikyik, Oibu ochogune ngoriet ne kararan ne siirei tugul, ak olaakyi; ak ondechi peteit mornennyi, ak olaakyi kweonik:

²³ ak ogetu moita ne nerat, ak oeny, si keam, ak keboiboitu:

²⁴ amu werinnyu ni, ne kiga kome, ago kagosob kogeny; kiga kobet, ak kagobiit. Kitoi anyun koboiboitu.

²⁵ Ak kimi werinnyi ne o mbar: ak kingorik ye negit got, kogas cheetab tiendo ak ureriet.

²⁶ Ak kiguur age eng’ otwogik, ak koteebe kole, nee tuguchu.

²⁷ Ak kilenji, Kagoit ng’etab komet; ak kagoeng’ji kwandang’ung’ moita ne nerat, amu kagotaach inendet kochamegei.

²⁸ Ago kinerech, ak kiesio kwo go: ak kimong’ sang’ kwandanyi, kogaigai.

²⁹ Ago kiwolji kwandanyi kolenji, Keero, kiaotin eng’ kenyisiechu chang’, ama abut ng’atutieng’ung’: ak kima igona arua, si keboiboitu ak choronokyuk:

³⁰ ago ye kangonyo weritang’ung’et, ne kigoam tuguguk ak chepkugonik, ieng’ji anyun moita ne nerat.

³¹ Ak kilenji, Weri, kimi tuwai kotugul, ak tugukyuk tugul ko cheguk.

³² Ago kanyolu keboiboitu ak kigasge: amu kiga kome weri otupche, ago kagosob kogeny; kiga kobet, ago kagobiit.