LUKA 14 - BUKUIT NE TILIL

Kisoobi eng’ sabato chi ne lolosenot borto

¹ Ak ye kingwo gotab age eng’ bounik che bo Parisaik eng’ betutab sabato, si koamis, koribot ichek inendet.

² Ak ogeero, kimi chi tainnyi ne ki lolosenot borto.

³ Ak kiwolji Jesu ng’omotikab ng’atutik ak Parisaik, kolenji, Tos chamdaat eng’ ng’atutik kisoob chi eng’ betutab sabato, anan achicha?

⁴ Ago kisisyo. Ak kinam inendet, ak kosoob, ak kounda kwo.

⁵ Ak kolenji icheget, Ng’o eng’ okwek ne tinyei sigiriet anan eito ne kagobutyo keringet, ama sutu eng’ sainato eng’ betutab sabato?

⁶ Ak kimata komuch anyun kowolji inendet kogeny agobo tuguchuto.

Kaming’inetab ge ak taagetab toek

⁷ Ak kimwachi kalewenet che kiga kiguur, ye kingogeer ole lewendoi ng’echerok che bo tai; kolenji ichek,

⁸ Ye kaguurjin chi age tugul igortab katunisiet, ko metebe ng’echeret ne bo tai; amu abere kagiguur age ne konyitot kosiirin,

⁹ si ye nyo inendet ne kaguurok okwek tuwai, komwaun kole, Istochige chichi; itau anyun iwe ole bo let eng’ kalilanet.

¹⁰ Ago ye kiguurin, itebe olo bo let; ak ye nyo anyun ne kaguurin, komuchi kolenjin, Choruani, ui olin bo tai: inyoru anyun teegisto eng’ che oamisiei tugul.

¹¹ Amu age tugul ne itororigei kiming’ini; ak inendet ne iming’inegei kitorori.

¹² Kimwachi anyun chichoto kiga kuurso agine, kolenji, Ye ichob amitwogik che bo bet anan che bo koskoleny, ko mat iguur choronoguk, anan che otupche, anan tilionutiguk, anan magorek che bo kokwet; abere tos kuurin agichek, ak koweegun cheguk.

¹³ Ago ye ichob igorta, iguur kibananok, ak che bo mugungon, ak che ing’waldos, ak che koriotin:

¹⁴ si kiberurin; amu matinyei icheget che weegun: amu tun kiweegun eng’ ng’eetyetab che bo iman.

Kalewenet agobo igortab katunisiet

¹⁵ Ak kingogas tuguchuto chito age ne kimi koboto inendet eng’ amisiet, kolenji, Baibai inendet ne tun amisiei eng’ bounatetab Jehovah.

¹⁶ Ago kilenji, Kichob chito age amitwogik che chang’ che bo koskoleny; ak koguur bik che chang’:

¹⁷ ak kiiyokto otwogindennyi eng’ saitab amitwogik, koguur che kiga kemwachi, kolenji, Obwa; amu kagochobogis tuguk tugul.

¹⁸ Ak kotoi tugul eng’ maget agenge komwa kit ne karany. Kilenji chito ne bo tai, Kaal mbaret, kanyolja awo ageer: asomin ale nyoiywa kaat.

¹⁹ Kole age, Kaal eik taman che bo chogit, kawe atiem ichek: asomin ale nyoiywa kaat.

²⁰ Kole age, Kaatunisie, noto anyun mamuchi anyo.

²¹ Konyo anyun otwogindonoto, ak kotetyi kiptaiyandennyi ng’alechuto tugul. Konerech anyun chitab kobo got, ak kolenji otwogindennyi, Ui chakte ortinwek che eechen ak che mengechen che bo nganaset, ak imutu yu kibananok, ak che bo mugungon ak che koriotin ak che ing’waldos.

²² Ak kile otwogindonoto, Kiptaiyandani, kagoyaak kit ne kageng’at, ago ta komi boroindo.

²³ Kolenji anyun kiptaiyat otwogindennyi, Ui ortinwek che eechen ak kiwotosiekab mbarenik, ak ichiich kobwa go, si konyi gonnyu.

²⁴ Amu amwawok ale, mami agot agenge eng’ che kiga kemwachi ne chamjami amitwogikyuk.

Egu chi alamalyetab Jesu eng’ chamdaetab ge ne bo alyet ne o

²⁵ Ak kiba ak inendet tuiyosiek che chang’: ak kiwelelgei inendet ak kolenji,

²⁶ Ngo nyonja chi, ama wech kwanda, ak kamet, ak osotiondennyi, ak lagokyik, ak werik che tupcho, ak chepkametinik, ee ak sobondanyi agine, ko maimuchi koek alamalyennyu.

²⁷ Ak chi age tugul ne maibei kimurtoiyondennyi, ak kosubwa, ko maimuchi koek alamalyennyu.

²⁸ Amu ng’o eng’ okwek, ne machei koteech got ne koi, ama toi koteb ng’ony korok ak koiit tuguk, ngo tinyei che yamei kogesune got?

²⁹ Si ma ye kagotonon lumeiywot, ak koma komuch koges, kotoi kochurachur inendet tugul che keerei,

³⁰ kole, Kitoi chichi koteekso ago ma imuch koges.

³¹ Anan ng’o laitoriat ne wendi kobaregei ak laitoriat age, ama teb ng’ony korok ak korar ole teptoi, ngo tos imuchi inendet ak bik elfusiek taman kotuiyo ak ne setyin inendet ak bik elfusiek tiptem?

³² Anan, ye ta komi age ole loo, koyokto ng’olyot, si koteeb agobo kalyet.

³³ Noto anyun, chi age tugul eng’ okwek ne mabagaktoi tugukyik tugul, ko maimuchi koek alamalyennyu.

³⁴ Miachen munyuk: ago ngo kagogesgei anyinyindanyi, ko ta kianyinye nee?

³⁵ Ma kotilei kiy eng’ emet anan eng’ kapng’atat: kilaktoi. Inendet ne tinyei itik che kastoe, kogas.