LUKA 13 - BUKUIT NE TILIL

Kigiili bik kosik

¹ Kimi bik alage eng’ betusiechoto che kimwachi inendet agobo Galilik, che kiburuch Pilato korotikwak ak tiseiywekwak.

² Ak kowolji kolenji, Tos olen ki kiptengeginik bichoto bo Galili kosiir Galilik tugul, amu kinyor nyalilwogichu?

³ Amwawok ale, Achicha: ago, ngot ko mosigu okwek, olustosi okwek tugul ko u noto.

⁴ Anan choto taman ak sisiit, che kisieb got ne koi ne bo Siloam, ak kobar, tos olen ki kiptengeginik kosiir bik tugul che kimenyei Jerusalem?

⁵ Amwawok ale, Achicha: ago, ngot ko mosigu ak okwek, olustosi tugul ko u noto.

Kalewenet agobo mogoiywet ne ma yiei kiy

⁶ Ak kimwa kalewenoni, kolenji, Kimi chito age ne kitinyei mogoiywet ne kiga minji mbarennyi ne bo sabibuk; ak kinyo kocheng’ logoekab ketoto, amanyorji kiy.

⁷ Kolenji ribindetab mbaretab sabibuk, Keero, kenyini ko ne bo somok anyone acheng’e logoek eng’ mogoiywoni amanyorune kiy: eb kolul; amu nee si koamei ng’ung’unyek buch?

⁸ Ak kiwolji kolenji, Kiptaiyandani, ingotebi kenyini agine, si kota asemberji ak ande ng’atatek:

⁹ ak ngo ii logoek kong’eete nguno, ko mie; ak ngo maii, ieb anyun kolul.

Kobogoriot ne kigisoob eng’ betuutab sabato

¹⁰ Ak kiinetisiei eng’ sunagogit age eng’ betutab sabato.

¹¹ Ak ogeero, kobogoriot age ne kitinyei tamirmiriet ne bo nyalulet kenyisiek taman ak sisiit; ak kigarigak, ak kima kota komuchi kochuulgei agot kitigin.

¹² Ak kingogeer Jesu inendet, koguur ak kolenji, Kobogoriondoni, kagitiachin eng’ nyaluleng’ung’.

¹³ Ak kiigonoor eunekyik inendet: kochuulak ngunoto, ak kolos Jehovah.

¹⁴ Kinerech anyun bounindetab sunagogit, amu kiisoob Jesu chito eng’ betutab sabato, ak komwachi tuiyet kolenji, Mitei betusiek lo che nyolu koboisie bik: obwa anyun eng’ betusiechoto si kisoobok, ama eng’ betutab sabato.

¹⁵ Ago kiwolji Kiptaiyat, kolenji, Okwek chombilik, tos mayatei age tugul eng’ okwek eitanyi anan sigiriennyi eng’ bii eng’ betutab sabato, ak kokweri koee beek?

¹⁶ Ak kobogoriondoni, ne cheptab Abraham, ne kigorat Setani kenyisiechu taman ak sisiit, tos manyol kitiach eng’ ratutioni eng’ betutab sabato?

¹⁷ Ak ye kingota komwaei tuguchu, kolilanso bunikyik tugul: ago kiboiboitu tuiyet komugul agobo tuguk che tororen che kiyaei inendet.

Kalewenaik agobo karadali ak agobo mermerek

¹⁸ Kimwa anyun, kole, Kergei bounatetab Jehovah ak nee? Ak tos aroge nee?

¹⁹ Kergei ak keswotab karadali, ne kinam chito, ak kominji mbarennyi; ak kibit, agoi koek ketit; ak kitebe taritik che bo barak temenikyik.

²⁰ Ak kimwa kogeny kole, Aroge nee bounatetab Jehovah?

²¹ Kergei ak mermerek, che kinam kobogoriot, ak koburukto busiek che bo kitongok somok, agoi kogut tugul.

Mariich ole kebunei kebendi sobondo

²² Ak kibunot nganasok che eechen ak che mengech, konetisioti, kobunei oret ne wendi Jerusalem.

²³ Ak kilenji chito age, Kiptaiyandani, tos ng’ering’ che tun kisoru? Ak kilenji,

²⁴ Ogiilge obun kurget ne mariich: amu amwawok ale, cheng’ei tun che chang’ kobun yoto, ago matun imuchi.

²⁵ Ak ye tun kang’eet chitab kobo got, ak koger kurget, ak otau anyun otononse eng’ sang’, ak ogongony kurget, ole, Kiptaiyandani, yatwech; ak kowolwok inendet kole, Mangenok, ak ole obunu;

²⁶ otau anyun ole, Kigiamisiei ak kigiee eng’ taing’ung’, ak kiinetisiei eng’ ortinwekyok;

²⁷ ak tun mwaei kole, Mangen ole obunu; oba eng’ ane, okwek tugul yaikab tengek.

²⁸ Koek anyun rirek ak nyeetab kelek, ye tun ogeer Agraham, ak Isak, ak Jakobo, ak maotik tugul, eng’ bounatetab Jehovah, ak kewirjok okweget sang’.

²⁹ Ak tun bwanei kobunu kong’asis ak cherongo, ak murot ne bo katam ak murot ne bo tai, ak koteb ng’ony koamis eng’ bounatetab Jehovah.

³⁰ Ak ogeero, mi che bo let che tun egu che bo tai, ak mitei che bo tai che tun egu che bo let.

Bunyondit ne bo Herod

³¹ Kibwa Parisaik alak eng’ sainato, ak kolenji, Ng’eet mande, ui eng’ oli: amu machei kobarin Herod.

³² Ak kilenji ichek, Oba omwachi lelwandonoto, olenji, Keero, aone oik ak asoobi bik rani ak mutai, ak eng’ betutab somok abegechi.

³³ Ago kanyol awo bandanyu rani ak mutai ak betut ne bo somok: amu manyoljin komechi maotiondo oldo age kobate Jerusalem.

Rirek agobo Jerusalem

³⁴ Ee, Jerusalem, Jerusalem, inye ne ibare maotik, ak ilage koik che kiyogun! Kiamach konyil ata ayum lagoguk, ko u ngogiet ne iyumjin arekyik kebebaikyik, ago kima ocham!

³⁵ Ogeero, kagebagakwok gong’wong’ koek kipkubere: ak amwawok ale, Maogeera, agoi tun ole, Iberurot ne nyonei eng’ kainetab Kiptaiyat.