LUKA 11 - BUKUIT NE TILIL

Saet ne kiinet Kiptaiyat bik

¹ Ak ye kita kosaei eng’ oldo age, ak kingoges, kolenji age eng’ alamalyennyi, Kiptaiyandani, inetech kesa, ko u ye kiineti Johana alamalyennyi.

² Ak kilenji ichek, Ye osae, omwa ole, Kwandanyo, ingotililit kaineng’ung’. Ingonyo bounateng’ung’. [Ingoyaak mageng’ung’ ko u eng’ kipsengwet, ko u noto eng’ ng’ony.]

³ Konech amitwogikyok eng’ betut age tugul.

⁴ Ak inyoiywech kaat tengekwogikyok; amu achek kenyochini kaat besenikyok. Amemutech ole mi yomset.

Saet ne kigiilijinige; kalewenet agobo chi ne kiwa ole mi choruennyi kemoi kwen

⁵ Ak kilenji, Ng’o eng’ okwek ne tinyei choruet, ak kwo ole mi kemoi kwen, ak kolenji, Choruani, kona makatinik somok abesen;

⁶ amu kagoit choruennyu ne bunu rutoi, amatinye kiy ne agochini;

⁷ kowolji ne mi go, kolenji, Amat iima: kaager kurget, ak kageruiye ak lagokyuk; ma amuchi ang’eet agonin?

⁸ Amwawok ale, agot ngo mang’eet kogochi, amu choruennyi, ko amu somsennyi ko noto ne igochin kong’eet kogochi kiy tugul ne machei.

⁹ Ak amwawok agane ale, Osom, si kegonok; ocheng’, si onyoru; ogongony, si keyatwok.

¹⁰ Amu age tugul ne somei, kigochin; ak nyoru ne cheng’ei; ak inendet ne igongonyi keyatyin.

¹¹ Ak ng’o eng’ okwek kwanda ne ngo som werit makatiat, ko tos igochi koita? Anan ngo som njiriot, ko tos igochi erenet kogeere njiriot?

¹² Anan ngo som koitab ingok, ko tos igochi melmeldo?

¹³ Ngongen okwek che o yaach ogochi lagokwok tuguk che miach, siirei anyun ne tia kagoitoet ne igochin Kwandang’wong’ ne mi kipsengwet Tamirmiriet ne Tilil ichek che somei inendet!

Kowelu Jesu kataamset ne kegimwa kele boisiei koboto Setani

¹⁴ Ak kion inendet oindet ne namat kut. Ak ye kingo kagomanda oindet, kong’alal anyun ne ki namat kut; ak kikwong’io tuiyosiek.

¹⁵ Ago kile alak, Onei oik eng’ Beelsebul, laitoriat ne bo oik.

¹⁶ Ak kitiem alak inendet komage kaborunet ne bunu kipsengwet.

¹⁷ Ago kinai inendet kabwatutikwak, kolenji, Bororiet age tugul ne pchegei ko ng’emaksei; ak got age tugul ne pchegei kolulei.

¹⁸ Ak ngo pchegei agine Setani, kotonondoi ano bororiennyi? Amu omwae ole, aone oik eng’ Beelsebul.

¹⁹ Ngot aone oik eng’ Beelsebul, koonei werikwok eng’ ng’o? Noto anyun ne igochin icheget koek kiruogikwok.

²⁰ Ago ngot aone oik eng’ mornetab Jehovah, ko kanyonjok anyun bounatetab Jehovah.

²¹ Ak chi ne tinyei kimnatet ak kotinyei karikyik che ribe gonnyi, kotebyei tugukyik eng’ kalyet:

²² ak ye nyonji chito ne kim kosiir inendet, ak koterter, korebe anyun inendet karikyik tugul che cham komang’u, ak kopcheita bareiywekyik.

²³ Inendet ne magimi tuwai kogirindaa; ak inendet ne magiyumi tuwai koiyestooti.

Kanyol keripge agobo tililindo ne ma nyiitat

²⁴ Ye kagomanda tamirmiriet ne muruon eng’ chito, kosiir ole mami beek, kocheng’oti ole imuung’e; ak ye mata konyor, komwa anyun kole, Kaweektege gonnyu ole kiabunu.

²⁵ Ak ye it, konyor kobugot ak ko chobot.

²⁶ Kwo anyun, komut tamirmirik tisab alak che yaachen kosiir inendet; kochut anyun orit ak komeny oloto: ak yaitu kagesunetab chichoto kosiir ne bo tai.

²⁷ Ak ye kita komwaei ng’alechu, komwa kobogoriot age eng’ tuiyet, kole, Iberurot moet ne kisichin, ak kinaik che kiirerie.

²⁸ Ago kile inendet, Iberurotin kosiir che kasei ng’olyotab Jehovah, ak korib.

Kateunet agobo bik che cheng’ei kaborunoik

²⁹ Ak ye kingoyumjingei inendet tuiyosiek, kotoi komwa kole, Ibini, ko ibinda ne ya: cheng’ei kaborunet; ago magigochin kaborunet kobate kaborunetab Jona.

³⁰ Amu ko u ye kiek kaborunet Jona eng’ bikab Ninebe, ko u noto Weritab chi eng’ ibini.

³¹ Tun ng’eetei laitoriat kobogoriot ne bo murot ne bo tai eng’ kiruoget koboto bikab ibini, ak koruokyi ichek: amu kibun tabanwekab emet konyo kogas ng’omnatetab Solomon; ak ogeero, mitei yu ne o kosiir Solomon.

³² Tun tonondos bikab Ninebe ak ibini eng’ kiruoget, ak koruokyi: amu kisik ichek eng’ amdaetab Jona; ak ogeero, mi yu ne o kosiir Jona.

Ng’alek che kinetegei tait

³³ Mami chi ne ngo kagonaam tait, konde ole ung’at, anan kitonget orit, ago indoi kit ne tonone, si kobiit kogeer lapkeiyet che bendi go.

³⁴ Taitab bortang’ung’ kondang’ung’: ngo mie kondang’ung’, ko nyiitat bortang’ung’ komugul lapkeiyet; ago ngo ya kondang’ung’ ko nyiitat bortang’ung’ agine mesundeito.

³⁵ Keer anyun ngo lapkeiyet ne mi oring’ung’ ko mesundeito.

³⁶ Ngo nyiitat bortang’ung’ komugul lapkeiyet, ama tinyei ye imen, kolapkeitu anyun bortang’ung’ tugul, ko u ye konin lapkeiyet tait ne ikweng’sei komie.

Kogerei kong’ Jesu Parisaik ak sirik

³⁷ Ak ye kita kong’alali, koguur Parisaindet age kwo koamis tuwai: ak kiwa go ak koteb ng’ony koamis.

³⁸ Ak ye kingogeer Parisaindet, kokwong’, amu kiamis ama iun eut korok.

³⁹ Kolenji Kiptaiyat, Okwek Parisaik, ouni barak kikombet ak sanit; ago nyiitat oring’wong’ rebisiet ak yaitiet.

⁴⁰ Okwek che o berber, inendet ne kiyaei sang’ ko ma ne kiyaei orit agine?

⁴¹ Ogoite kagochinoik che bo tuguk che mi orit; ak ogeero, tililitu tuguk tugul eng’ okwek.

⁴² Ago bwa okwek Parisaik! Amu ogoitoi kebebertab taman ne bo heduosmon ak ketik che mengech che ng’uu, ak che bo sogek alak tugul, ak ometoi kiruoget ak chamnyetab Jehovah: ago kita nyolu oyai chuto, amomete chun alak.

⁴³ Bwa okwek Parisaik! Amu ochame ng’echerok che tororen eng’ sunagogisiek, ak kagatosiek che kigatok eng’ oldinwekab aldaisiet.

⁴⁴ Bwa okwek! Amu o kerge ak kererisiek che matoogu, ama naei bik che bunoti barak.

⁴⁵ Ak kiwolji ng’omotiot age ne bo ng’atutik, kolenji, Konetindoni, ngot imwa ko u noto ko ketewerech agachek.

⁴⁶ Ak kole, Bwa okwek ng’omotikab Ng’atutik! Amu oganapchini bik lautik che bichien eng’ laiset, ago okwek ko motwae lautichoto agot eng’ mornet agenge.

⁴⁷ Bwa okwek! Amu oteeche kererisiekab maotik, ago kibarei kwanisiekwok.

⁴⁸ Kioegu anyun baorinik ak ochamnyechini boisionikab kwanisiekwok: amu icheget che kibarei ak oteeche okwek kererisiekwak.

⁴⁹ Kile anyun ng’omnatetab Jehovah amu noto, Tun ayokyini maotik ak che kiyoktoi; ak kobar alak eng’ ichek ak kousaus alak;

⁵⁰ si kobiit komage ibini, korotikab maotik tugul, che kigitumda koboch ko kagilumda ng’ony;

⁵¹ koboch korotikab Abil agoi korotikab Sakaria, ne kime eng’ kwenutab kaptisisiet ak gotab Jehovah: ee, amwawok ale, tun kimage ibini.

⁵² Bwa okwek ng’omotikab ng’atutik! Amu kioib yateiywot ne bo ng’omnatet ama obe orit okweget, ak kioger che kita mong’jin.

⁵³ Ak ye kingomong’ eng’ oloto, kotoi sirik ak Parisaik koriich inendet mising’, ak kogilgilye, si kobiit komwa ng’alek che chang’;

⁵⁴ korib kole tamangab konyor ng’olyo ne mong’une kutinnyi.