LUKA 10 - BUKUIT NE TILIL

Boisiet ne kigiyoktoe alamalyet tamanwogik tisab, ak koweeksei

¹ Kingobata tuguchu kolewen Kiptaiyat bik alak tamanwogik tisab agichek, ak koyokto kobee aeng’ kole, kondoe inendet koba nganaset age tugul ak komosta age tugul ole tun bunoti.

² Ago kilenji ichek, O kesisiet ago ng’ering’ kesik: noto anyun osom Kiptaiyat ne bo kesisiet, si kobiit koyokyi kesik kesisiennyi.

³ Oba: ogeero kaayoktok ko u arekab kechirek eng’ kwenutab suik.

⁴ Amoib lolet, anan suberet, anan kweonik: amogat chi eng’ oret.

⁵ Ak got age tugul ne omong’jini, omwa ole, Ingoteb kalyet eng’ goi.

⁶ Ak ngo mitei weritab kalyet yoto, kotebe kalyeng’wong’ inendet: ak ngo mami, koweekyinogei okwek.

⁷ Ak otebe goyoto anyun, ak tuguk che konok, oam ak oee: amu nyoljin kiboitiot melektanyi. Amoitote gorik.

⁸ Ak nganaset age tugul ne omong’jini, ak kotaachak, oam tuguk che kindoi taing’wong;

⁹ ak osoob che miandos eng’ oloto, ak olenji ichek, Kagorikyok bounatetab Jehovah.

¹⁰ Ago nganaset age tugul ne omong’jini, ama taachak, omande obe ortinwekyik ak omwa ole,

¹¹ kagibukyok temburiek che bo nganaseng’wong’, che kanam kelyekyok; ago onai ni, ole, kagorik bounatetab Jehovah.

¹² Ago amwawok ale, Tun kaigaitu Sodom eng’ betunoto, kosiir nganasanato.

¹³ Bwa we, Korasin! Bwa we, Betsaida! Amu nda kiga kiyai eng’ Turo ak Sidon boisionik che bo kamuktaet ko u che kogiyai eng’ okwek, ta kiga kosik keny, ak kotebe orek kolaachi kuniok.

¹⁴ Ago tun kaigaitu Turo ak Sidon eng’ kiruoget, kosiirok.

¹⁵ Ak inye Kapernaum, tos tun kitororin iwe kipsengwet? Kiwirjinin ng’ony kot iit oldab che kigobek.

¹⁶ Inendet ne kasok kogasa agane; ak inendet ne esiok koesioa agane; ak inendet ne esioa koesioi inendet ne kiiyokwa.

¹⁷ Kiweek anyun bichoto tamanwogik tisabu eng’ boiboindo, ak komwa kole, Kiptaiyandani, agot oik kogasech it eng’ kaineng’ung’.

¹⁸ Ak kilenji, Kiageer Setani kochorugei eng’ kipsengwet ko u kalyelet.

¹⁹ Ogeero, kaagonok kamuget si kobiit otiech erenok ak melmelwek, ak oterter kimnatet tugul ne bo bunyot: ak mami kiy ne imuchi kong’emak.

²⁰ Ago amoboiboitu amu ng’olyondoni, amu kasok it oik; ago oboiboitu amu sirotin kainaikwok eng’ kipsengwet.

Komwaei Jesu kongoi

²¹ Eng’ sainato kobaibait Jesus eng’ Tamirmiriet ne Tilil, ak kole, Aweegun kongoi, ee Baba, Kiptaiyat ne bo kipsengwet ak ng’ony, amu kiiung’e tuguchu che ng’omen ak che ingen, ak kiing’ang’ji manyurunik: ee, Baba; amu kichamak ko u noto eng’ taing’ung’.

²² Kigogona tuguk tugul Baba: ak mami chi ne ingen Werit kole ng’o, kobate Kwanda; ama nai chi Kwanda kole ng’o, kobate Werit, ak chi age tugul ne chamei Werit, kong’ang’jin.

²³ Ak kiweleljigei alamalyet, ak kolenji eng’ ung’ot, Iberurotin konyek che keerei tuguk che ogeere:

²⁴ amu amwawok ale, kimachei maotik che chang’ ak laitorinik kogeer tuguk che ogeere, ago kima keer; ak kimachei kogas tuguk che ogase, ago kima kas.

Ole kinyorundoi sobondab koigeny

²⁵ Ogeero, kitonon ng’omotiot age ne bo ng’atutik koyom inendet, kole, Konetindoni, ayai nee si tun anyoru sobondab koigeny?

²⁶ Ak kilenji, Kigisir nee eng’ Ng’atutik? Isomandoi ano?

²⁷ Ak kiwolji inendet kolenji, Cham Kiptaiyat Jehovah neng’ung’ eng’ muguleldang’ung’ komugul, ak eng’ sobondang’ung’ komugul, ak eng’ kimnateng’ung’ komugul, ak eng’ ng’omnateng’ung’ komugul; ak icham chitab kokweng’ung’ ko u ye ichamdoige.

²⁸ Ak kilenji, Kewolu komie: yai ko u noto, si isob.

²⁹ Ago ye kimachei komieitgei, kolenji Jesu, Ng’o chitab kokwennyu?

Kalewenet agobo Samarindet ne mie

³⁰ Kowolji Jesu kolenji, Kichortaegei chito age Jerusalem kwo Jeriko; ak kotuiyo ak rebik, che kirebe ngoroik ak kobir, ak koba, kobagakta ko negit kome.

³¹ Ak kichortaegei tisiindet age oranato: ak kingogeer inendet korob taban.

³² Ak ye kingoit Lawindet yoto, ak kogeer, korob taban agine ko u noto.

³³ Ago ye kita kowendi Samarindet age eng’ bandanyi, koit ye mi chichoto: ak ye kingogeer inendet, korire,

³⁴ kwo ole mi inendet, koratyi ole kagibir, ak kosachinot mwaita ak divaik; ak kiganapchi chichoto sigiriennyi, ak komut kwo gotab toek, ak korib inendet.

³⁵ Ak mutai konem denarisiek aeng’, kogochi chitab kobo got, ak kolenji, Rib inendet; ak tuguk alak tugul che inyae che siirei chu, kotun kaweege, anyo ayaagun.

³⁶ Eng’ chuto somok, ilen ng’o ne kiek chitab kokwennyi eng’ chichoto kituiye rebik?

³⁷ Ak kile, Inendet ne kiriregei chichoto. Ak kilenji Jesu, Ui, iyai ko u noto.

Marta ak Maria

³⁸ Ak ye kita komi bandanywa, komong’ji anyun nganaset age: ak kitaach eng’ gonnyi kobogoriot age ne keguure Marta.

³⁹ Ak kitinyei chepkamet ne kiguure Maria, ne kitebyei eng’ ole bo kelyekab Kiptaiyat, kogasei ng’olyondennyi.

⁴⁰ Ago kiimgei Marta eng’ boisionik che chang’; ak konyonji inendet ak kolenji, Kiptaiyandani, meiti kiy ak kabagakta tupchennyu abois anege? Mwachi anyun kotoreta.

⁴¹ Ago kiwolji Kiptaiyat kolenji, Marta, Marta, igereri met ak iimige agobo tuguk che chang’:

⁴² ago kit agenge ne kemachei: amu kagolewen Maria kebeberta ne mie, ne magirebe.