LUKA 1 - BUKUIT NE TILIL

Ng’alek che kindoune

¹ Amu kigonde eunekwak che chang’ kotet ng’alek agobo tuguchoto kigosulda eng’ kwenunnyo,

² ko u ye kigogonech, che ki baorinik che kigeer koboch taunet, ak che ki kiboitinik che bo ng’olyot,

³ kiageer agane ale, mie atetun eng’ siret, ko kaanai agane ole kibiitunda tuguk tugul koboch taunet, ee, inye, ne i toogunot Teopilo;

⁴ si kobiit inai eng’ iman, ng’alechato kiginetin.

Sib kemwaei sigetab Johana Kabatisanindet

⁵ Kimi eng’ betusiek che bo Herod, laitoriatab Judea, tisiindet age ne kigiguure Sakaria, ne bo ripsetab Abija: ak kitinyei osotiot ne kisalu gab Aron, ak kigiguure kainennyi Elisabet.

⁶ Ak ki bo iman ichek tuwai eng’ taitab Jehovah, ak kibendate ng’atutik tugul ak karureiywek che bo Kiptaiyat, ama tinyei lelut.

⁷ Ak kima kotinyei lakwa, amu ki son Elisabet, ak kiga koosegitu tuwai.

⁸ Ak ye kita koyaei boisietab tiseinatet eng’ taitab Jehovah, ko u tetetab ripsennyi,

⁹ ko u biteetab boisietab tiseinatet, ko kigilewen inendet kwo hekalutab Kiptaiyat kobeel nyamdutik.

¹⁰ Ak kimi sang’ tuiyet komugul ne bo bik, kosaei eng’ sait ne kibeele nyamdutik.

¹¹ Ak kimong’ji malakaiyatab Kiptaiyat kotonone komostab tai ne bo kapkorosut ne kibeele nyamdutik.

¹² Ak kingogeer Sakaria inendet koarogen ak koiyweis.

¹³ Ago kilenji malaikaiyat inendet, Ameiyweisie, Sakaria: amu kogegasun someng’ung’, ak ta kosigun osotiondeng’ung’ Elisabet werit, ak iguure kainennyi Johana.

¹⁴ Ak inyoru boiboiyet ak kagasetab ge; ak boiboitu bik che chang’ eng’ sigennyi.

¹⁵ Amu tun egu ne o eng’ taitab Kiptaiyat, ama eei divaik anan maiyek; ago kinyiiti Tamirmiriet ne Tilil, koboch komi moetab kamet.

¹⁶ Ak koweekyi lagokab Israel che chang’ Kiptaiyat Jehovah nenywa.

¹⁷ Ak kowendot eng’ taitab togennyi eng’ tamirmiriet ak kimnatetab Elija, si koweech mugulelwek che bo kwanisiek kotokyigei lagok, ak kowelel ngelelik si kobendat eng’ ng’omnatetab che bo iman; si kochopchi Kiptaiyat bik che chobotin.

¹⁸ Ak kilenji Sakaria malaikaiyat, Anae nee ng’olyondonito? Amu koaositu, ak kigotar kenyisiek che chang’ osotiondennyu.

¹⁹ Ak kiwolji malaikaiyat kolenji, A Gabriel, ne atononi eng’ taitab Jehovah; kagiyokwa ang’alalun, ak aibun logoiywechu miachen.

²⁰ Ak keero, namoksein kut, amemuchi ing’alal, agoi tun betut ne biitu ng’alechu, amu ma iyan ng’alekyuk, che tun isuldoi eng’ betusiekwak.

²¹ Ak kiigen bik Sakaria, kot kokwong’io, amu kiigagei eng’ hekalut.

²² Ak ye kingomong’ sang’, koma komuch kong’alalji ichek, ak kinai ichek kole, kagogeer kaborunet ne bo kwong’et eng’ hekalut: ak king’alaljine bichoto eut, ak kiteb ko namat kut.

²³ Ak ye kingogesgei betusiekab otisiennyi, kwo ga.

²⁴ Ak ye kingogesgei betusiechoto komanach osotiondennyi Elisabet; ak kiunygei arawek mut, ak komwa kole,

²⁵ Koyaiywa ko u nito Kiptaiyat eng’ betusiek che kiibwata, si koistoena reng’sennyu eng’ bik.

Sib kemwaei agobo sigetab Jesu

²⁶ Kiiyokto Jehovah malaikaiyat Gabriel eng’ arawetab lo kwo nganaset ne bo Galili, ne kiguure Nasaret,

²⁷ kwo oldab chepto bergeiyat ne kiga kechamji murenet age ne kiguure Josep, ne bo gotab Daudi; ak kigiguure bergeiyandanato Maria.

²⁸ Ak kinyo ole mi cheboto, ak kolenji, Chamge, inye ne i chamat mising’, mi Kiptaiyat koboten.

²⁹ Ago kiimgei mising’ inendet eng’ mwaonato, ak kiibwat kole, egu nee kagatoni.

³⁰ Ak kilenji malaikaiyat inendet, Ameiywei, Maria: amu kainyoru chamet eng’ Jehovah.

³¹ Ak keero, imanachi, ak isich werit, ak tun iguure kainennyi JESU.

³² Egu ne o inendet, ak tun kiguure Weritab Inendet ne Toror Mising’: ak kigochin Kiptaiyat Jehovah ng’echeretab laitornatet ne bo kwandanyi Daudi:

³³ ak tun laitorane gotab Jakobo koigeny; ama tinyei ole igesunegei bounatennyi.

³⁴ Ak kilenji Maria malaikaiyat, Egundoi ano ng’olyondoni, amu mangen muren?

³⁵ Ak kiwolji malaikaiyat kolenji, Nyonjinin Tamirmiriet ne Tilil ak kouurin kamuktaetab Inendet ne Toror Mising’: noto anyun kiguure ne tilil, Weritab Jehovah, inendet ne tun kisichei.

³⁶ Ak keero, managat agine Elisabet tupcheng’ung’, tun sichei werit eng’ osindanyi: ne bo lo arawani eng’ inendet ne kigiguure son.

³⁷ Amu mami ng’olyo ne bunu Jehovah ne ma kim.

³⁸ Ak kile Maria, Keero, a chepto ne otwogindetab Kiptaiyat; ingeyaiywa ko u ng’olyondeng’ung’. Ak kiwa malaikaiyat kobagakta inendet.

Kowendi Maria gab Elisabet: “Katororet ne kitorori Kiptaiyat”

³⁹ King’eet anyun Maria eng’ betusiechoto kwo kochakta emetab tulonok, agoi nganasetab Juda;

⁴⁰ ak kiwa agoi gotab Sakaria ak kogat Elisabet.

⁴¹ Ak ye kingogas Elisabet kagatetab Maria, koureren lakwet eng’ moennyi; kinyi anyun Tamirmiriet ne Tilil Elisabet;

⁴² ak komwa eng’ kutit ne o, kole, Iberurot inye eng’ kobogorisiek, ak iberurot inendet ne isiche.

⁴³ Ak katepto ano kot anyoru nito, kot konyonja kametab Kiptaiyandennyu?

⁴⁴ Amu, keero, ye kangoit itikyuk kutitab kagateng’ung’, koureren lakwet eng’ moennyu eng’ boiboiyet.

⁴⁵ Ak baibai kobogoriondonoto iyani; amu tun isuldoi tuguk che kigemwachi inendet che bunu Kiptaiyat.

⁴⁶ Ak kile Maria, Itorori sobondanyu Kiptaiyat,

⁴⁷ Ak kagobaibait tamirmiriennyu eng’ Jehovah Yetindennyu.

⁴⁸ Amu kagogeer nyerotietab otwogindennyi ne chepto: Amu, ogeero, koboch ra koguurena ibinwek tugul ne baibai.

⁴⁹ Amu kagoyaiywa inendet ne bo kamuktaet tuguk che eechen; Ak tilil kainennyi.

⁵⁰ Tebyei rirenennyi eng’ ibinwek agoi ibinwek Eng’ icheget che konyiti inendet.

⁵¹ Kigobor kimnatet eng’ eunnyi; Ak kigoiyesta che menotik eng’ kabwatutikab mugulelwekwak.

⁵² Kagochoor bounik eng’ ng’echerokwak, Ak kagoeet che nyerotin.

⁵³ Kagobae che amei rubet tuguk che miachen: Ak kagoon magorek koba buch.

⁵⁴ Kagotoret otwogindennyi Israel, Si kobwat rirenetab ge,

⁵⁵ Ko u ye king’alalji kwanisiekyok, Eng’ Abraham ak iyotennyi agoi koigeny.

⁵⁶ Ak kitebi Maria koboto Elisabet ne negit arawek somok; yeityo koweek kwo ga.

Sigetab Johana Kabatisanindet: “Kaberuret ne kiberuri Kiptaiyat”

⁵⁷ Kiit anyun betut ne sigisie Elisabet; kosich werit.

⁵⁸ Ak kogas bikab kokwennyi ak bikab orennyi kole kagotesyi Kiptaiyat rirenennyi kwonyoto; ak kiboiboitu koboto inendet.

⁵⁹ Ak kingoit betut ne bo sisiit, kobwa ichek koyatita lakwet; kimachei koguure Sakaria, kemwaitae kainetab kwandanyi.

⁶⁰ Ak kiwol kamet kole, Achicha; kiguure Johana.

⁶¹ Ak kilenji ichek inendet, Mami chi eng’ oreng’wong’ ne keguure kainanato.

⁶² King’alaljine ichek eut kwanitab lakwet, koteebe kainet ne machei ketochi.

⁶³ Kosom kit ne kisirei, ak kisir, kole, Johana kainennyi. Ak kikwong’io tugul.

⁶⁴ Koyatak anyun kutinnyi ngunoto, ak kotiagak ng’elyeptanyi, ak kitwek kolos Jehovah.

⁶⁵ Ak kinyonji kaiyweisiet tugul che kimenyei komoswekwak; ak kigimwaita ng’alechuto tugul koyom emetab tulonok ne bo Judea.

⁶⁶ Ak kigonore mugulelwekwak ng’alechato ichek tugul che kigas, kole, Tun egu nee anyun lakwani? Amu kimi koboto inendet eutab Kiptaiyat.

⁶⁷ Kinyi anyun Tamirmiriet ne Tilil kwandanyi Sakaria, ak kimaoten, kole,

⁶⁸ Iberurot Kiptaiyat, Jehovah ne bo Israel; Amu kagorutochi bikyik ak koyachi katiaget ichek,

⁶⁹ Kagong’eetwech kuinetab yetunet Eng’ gotab Daudi kiboitiondennyi

⁷⁰ (Ko u ye kimwa eng’ kutuswekab maotikyik che tililen che kimi koboch ko kagitoi ng’ony),

⁷¹ Si kosoruech eng’ bunikyok, ak eng’ eunekab tugul che wechech;

⁷² Si korire kwanisiekyok, Ak kobwat kayomisennyi ne tilil;

⁷³ Kayosiet ne kiiyosiechi kwandanyo Abraham,

⁷⁴ Si kobiit kogonech, ko kagosoruech eng’ eunekab bunikyok, Keboisiechi inendet ama eng’ kaiyweisiet,

⁷⁵ Eng’ tililindo ak eng’ imanda eng’ tainnyi eng’ betusiekyok tugul.

⁷⁶ Ee lakwani, kiguurenen maotiotab Inendet ne Toror Mising’: Amu iwendi eng’ taitab Kiptaiyet indoi, si kobiit ichob ortinwekyik;

⁷⁷ Si igochi bikyik naet ne bo yetunet Eng’ nyoetab kaat ne bo tengekwogikwak,

⁷⁸ Amu muguleldo ne riregei ne bo Jehovah nenyo, Si kochorjech lapkeiyet ne bunu barak,

⁷⁹ Si koluuchi icheget che tebyei eng’ mesundeito ak che mi uruetab meet; Si kondochi kelyekyok kot koit oretab kalyet.

⁸⁰ Ak kiner lakwanato, ak kotesak kimnatet eng’ tamirmiriet, ak kimeng’oti surkwen agoi betut ne kiiborjigei Israel.