KOMONG'U 9 - BUKUIT NE TILIL

Koroito ne bo mut agoi ne bo tisab

¹ Kilenji anyun Jehovah Musa, Ui gab Parao, ilenji, Kamwa ko u ni Jehovah, inendet Kamuktaindet ne bo Hebranik kole, Igochi bikyuk koba, koba koboisiewa.

² Amu ngot iete ichek koba, kota irany ichek,

³ keero, mi eutab Jehovah tuga cheguk che mi akwot, ak eng’ mbartanyisiek, ak eng’ sigirok, ak eng’ tambesik, ak eng’ akwotisiek, ak eng’ kechirek: amei ichek koroito ne ng’wan.

⁴ Ak ibestos Jehova tugab Israel eng’ tugab Misri: si mame kiy agot agenge eng’ tugul che bo lagokab Israel.

⁵ Ak kiinde Jehovah ye egune, kole, Yaei Jehovah kii mutai eng’ emet.

⁶ Ak kiyai Jehovah kioto eng’ betut ne kiisubi noto, ak kibek tuga tugul che bo Misri: ago ma me agot agenge eng’ tugab lagokab Israel.

⁷ Ak kiiyokto Parao bik, ak ogeero, ma me agot agenge eng’ tugab Israel. Ago kiuuiit muguleldab Parao, ak ma chamji bik koba.

⁸ Ak kilenji Jehovah Musa ak Aron, Oram orekab mat ne o, ak ingoseerji Musa barak eng’ taitab Parao.

⁹ Ak egu choto temburiek che buspus eng’ emet komugul ne bo Misri, ak koek ondirik che mong’u kobwandos eng’ bik ak eng’ tiong’ik eng’ emet komugul ne bo Misri.

¹⁰ Kiib anyun ichek orekab mat ne o, ak koba kotononso eng’ taitab Parao; ak kiiseerji Musa barak; ak kiek ondirik che mong’u kobwandos eng’ bik ak eng’ tiong’ik.

¹¹ Ak kima imuch kotononso bik che ng’omen che ng’orsei eng’ taitab Musa amu ondirichoto; amu kinam ondirik bik che ng’omen che ng’orsei, ak Misrik tugul.

¹² Ak kiiuuiit Jehovah muguleldab Parao, ak kima kas ichek; ko u ye kiga komwachi Jehovah Musa.

¹³ Ak kilenji Jehovah Musa, Ng’eet, muste karon, ak iwe itonone taitab Parao, ak ilenji, Kamwa ko u ni Jehovah, inendet Kamuktaindet ne bo Hebranik kole, Unde bikyuk koba, koba koboisiewa.

¹⁴ Amu ayokyini muguleldang’ung’ korotwekyuk tugul ak otwogiguk, ak biguk; si kobiit inai ile mami ne u ane eng’ ng’ony komugul.

¹⁵ Amu kata achuule eunnyu, abarin ak biguk eng’ koroito, ak kata kageisten ibet eng’ ng’ony:

¹⁶ ago iman kaachamun itebi, si kobiit aborun kimnatennyu, ak si kobiit kemwaita kainennyu eng’ ng’ony komugul.

¹⁷ Ak ta ilosuge eng’ bikyuk, ak maigochi koba?

¹⁸ Keero, agonu korobon mutai kote ni asis koikab ropta che eechen, che tomo kegeerei eng’ Misri koboch ole kigoi.

¹⁹ Iyokte anyun, keget akwotisieguk kobwa, ak tugul che itinye che mitei akwot; amu chorjingei koikab ropta ak barei kobek chi age tugul ak tiony age tugul ne mi timin, ngot ko magiget anan kimut konyo ga.

²⁰ Inendet ne kiiywei ng’olyotab Jehovah eng’ otwogikab Parao ko kiimweito otwogikyik ak akwotisiekyik koba gorik:

²¹ ak inendet ne kima iit ng’olyotab Jehovah ko kibagakta otwogikyik ak akwotisiekyik eng’ timin.

²² Kilenji Jehovah Musa anyun, Chuul eung’ung’ tokyi kipsengwet, si kobiit koikab ropta eng’ emetab Misri komugul, kobir bik, ak tiong’ik, ak ngwot age tugul ne mi emet, eng’ emet komugul ne bo Misri.

²³ Ak kichuul Musa siarinnyi kotokyi kipsengwet: ak kiiyok Jehovah tulet ak koikab ropta ak kichorgei mat konyo kobun ng’ony: ak kiisurur Jehovah koikab ropta korong’ji emetab Misri.

²⁴ Kibiit anyun koikab ropta, ak mat ne burugotgei ak koikab ropta ne korom kot, ne kitomo kobiitu eng’ emetab Misri komugul koboch ngobiit koek boror.

²⁵ Ak kibir koikab ropta tugul che kimi timin eng’ emet komugul ne bo Misri, chi ak tiony; ak kibir ngwot age tugul ne mi emet, ak kiiri ket age tugul ne bo timin.

²⁶ Emetab Gosen inegei, ole kimi lagokab Israel, ne ma it koikab ropta.

²⁷ Ak kiiyokto Parao keguur Musa ak Aron, kolenji, Kaayai tengekto eng’ nito: bo imanda Jehovah, ago a kiptengekyo koboto bikyuk.

²⁸ Osa Jehovah; amu kagoyam tulosiechu kimen ak koik; si agonok obe, amata ogage.

²⁹ Ak kilenji Musa inendet, Ye kaamande eng’ nganaset, eng’ yoto anyun aiitochi eunekyuk Jehovah; si kosis tulet, ak komung’do koiyat; si kobiit inai ile bo Jehovah ng’ony.

³⁰ Ago angen ale, ne u inye ak otwogiguk, kotom oiywei Jehovah Kamuktaindet.

³¹ Ak kigibir mabutek ak sairik: amu kigaba met sairik ak kiga iyesio taptok.

³² Ago kima kibir nganok ak bek alak che kiguure kusemet: amu kitomo koeegitu.

³³ Ak kimanda Musa eng’ nganaset kwo eng’ ole mi Parao, ak kiitochi eunekyik Jehovah: ak kisisio tulosiek ak koikab ropta, ak mata korobonji ng’ony.

³⁴ Ak ye kingogeer Parao kole ma komi ropta ak koikab ropta ak tulosiek, kogetyigei koyai tengekto, ak kouuiit muguleldanyi, inendet ak otwogikyik.

³⁵ Ak kiuuiit muguleldab Parao, ak kima igochi lagokab Israel koba; ko u ye kiga komwa Jehovah eng’ Musa.